ފަރެސްމާތޮޑާގައި އިއްޔެ ބޭއްވި ރަސްމިއްޔާތުގައި ހެލްތު މިނިސްޓަރު ނަސީމް ވާހަކަދައްކަވަނީ.-- ފޮޓޯ: މިހާރު
07 ޖުލައި 2022 - 12:26
18 comments
ނަފްސާނީ ބަލިން ސަލާމަތްވުމަށް ކައުންސެލިން ބޭނުންވާ 80،000 ވަރަކަށް މީހުން އެބަތިބި ކަމަށާއި އެ މީހުންނަށް އެހީ ދެވޭނެ ގޮތްތައް ބަލަމުން އަންނަ ކަމަށް ހެލްތު މިނިސްޓަރު އަހުމަދު ނަސީމް އިއްޔެ ވިދާޅުވެއްޖެ އެވެ.
ގދ. ފަރެސްމާތޮޑާގައި ހެދި "ހެރަހަމަގު ބަގީޗާ" ހުޅުވުމަށް އެ ރަށުގައި ބޭއްވި ރަސްމިއްޔާތުގައި މިނިސްޓަރު ވިދާޅުވީ އެންމެ ފަހުން ހެދި ދިރާސާތަކުން ނަފްސާނީ އެހީ ބޭނުންވާ ގިނަ ބަޔަކު ތިބިކަން އެނގިގެން ދިޔަ ކަމަށެވެ. އެކަމުން އަރައިގަތުމަށް އެ މީހުންނަށް ގޮތްތަކެއް ހޯދައިދިނުމުގެ މަސައްކަތް ކުރަމުން އަންނަ ކަމަށް މިނިސްޓަރު ވިދާޅުވި އެވެ.
އޭނާ ވިދާޅުވީ ތޮއްޖެހިފައިވާ މާލޭގައި ހިތްހަމަޖައްސާލުމަށް ޕާކެއް ހެދުމުގެ މަސައްކަތްކުރި ކަމަށެވެ. އެ ފަދަ ޕާކްތަކަކީ ނަފްސާނީ މައްސަލަތަކުން އަރައިގަތުމަށް ބޮޑު އެހީއެއް ކަން ނަސީމް ފާހަގަކުރެއްވި އެވެ.
"މިއީ ފެށުމެއް، ވަރަށް ބޮޑު ފެށުމެއް. މި ފެށުމަކީ އަޅުގަނޑުމެންނަށް މިހާރު އިހުސާސް ވަނީ އަޅުގަނޑުމެން މި އުޅޭ ދިރިއުޅަމީ ވަރަށް ހަލަބޮލި، ވަރަށް ބުރަކޮށް މަސައްކަތްކޮށްގެން އަޅުގަނޑުމެންގެ ދިރިއުޅުން ހަމަޖައްސައިގެން އުޅޭ ބައެއްކަން. މިހާރު އަޅުގަނޑުމެންނަށް މި ވިސްނެނީ. އެހެންވީމަ ކޮންމެހެން ވެސް އެބަ ޖެހޭ މި ކަހަލަ ތަންތަން ކޮންމެ ރަށެއްގައި ވެސް ހުންނަން،" މިނިސްޓަރު ވިދާޅުވި އެވެ.
"އަޅުގަނޑުގެ އިލްތިމާސްއަކީ، އަޅުގަނޑުގެ އުފަލަކަށް ވާނީ މި ކަހަލަ ތަންތަން އެހެން ރަށްރަށުން ވެސް ފެނުން."
ނަސީމް ވިދާޅުވީ ރަށްރަށުގައި މީހުން ހެލިފެލިވެ އުޅޭތަން ދެކެން ބޭނުންވާ ކަމަށެވެ. ކުރިން ރަށްރަށުގައި މީހުން ހެލިފެލިވެ އުޅުނު ނަމަވެސް ޓެކްނޮލޮޖީގެ ސަބަބުން މަސައްކަތްތައް މަދުވެފައިވާ ކަމަށް އޭނާ ވިދާޅުވި އެވެ.
މާލޭގައި ވެހިކަލްގައި އުޅުމުގެ ބަދަލުގައި ހިނގާފައި ތަންތަނަށް ދިއުމަކީ ހިތްފަސޭހަ ކަމެއްގެ ގޮތުގައި ދެކެން ޖެހޭ ކަމަށާއި އިންޖީނުލީ އުޅަނދުފަހަރު ގިނަވެ ވައި ތަޣައްޔަރުވުމުގެ ސަބަބުން ނޭވާލުމަށް ވެސް އުނދަގޫވެފައިވާ ކަމަށް މިނިސްޓަރު ވިދާޅުވި އެވެ.
ސިއްހީ ގޮތުން ވަރަށް ގިނަ މައްސަލަތައް އެބަހުރި ކަމަށާއި ތަފާތު އެކި ވައްތަރުގެ ކެންސަރު ގިނަވެގެން ދާއިރު އެކަންކަމާ މެދު ވިސްނަންޖެހޭ ކަމަށް އޭނާ ވިދާޅުވި އެވެ.
"ފައިބަރުގްލާސް މަސައްކަތް ކުރުމުގައި ވެސް ކޮންމެ ތަނެއްގައި އެ މަސައްކަތް ކުރަންވީ. އެހެން ހައްދަވައިގެން ނުވާނެ. އަޅުގަނޑުމެންގެ އުއްމީދަކީ މި ރަށުގައި މިކަމަށް ވެސް އިސް ނަގައިގެން އެ ކަހަލަ މަސައްކަތްކުރާ ތަންތަން ވަކިން ރައްޔިތުން އުޅޭ ހިސާބާ ދުރުގައި ކުރުވާ،" ނަސީމް ވިދާޅުވި އެވެ.
އިންޑިއާގެ 260 މިލިއަން ރުފިޔާގެ އެހީގައި ކުރިއަށްގެންދާ 45 މަޝްރޫއުގެ ތެރޭގައި ހިމެނޭ ފަރެސްމާތޮޑާ ބަގީޗާގައި ކުޑަކުދިން ކުޅޭނެ ތަނަކާއި ބެޑްމިންޓަން ކުޅުމަށް ހާއްސަ ދަނޑެއްގެ އިތުރުން އައުޓްޑޯ ޖިމަކާއި ހިތްހަމަޖައްސައިލުމަށް އެކި މައިޒާންތައް ހަދާފައިވެ އެވެ. މި ތަނަށް އިތުރު ފުރިހަމަކަމެއް ލިބެނީ މި ސަރަހައްދުގެ ބޮޑު ފެންގަނޑުންނެވެ.
އިތުރު ލިޔުންތައް
މަގްބޫލް ލިޔުންތައް
Mihaaru Print Edition
Download Mihaaru News App
Offline Alerts
SMS 'sub mihaaru' to 5454
ކޮމެންޓްތައް
ނަދުރު
07 July 2022
ދުނިޏޭގެ ނިސްބަތުން އެންމެ ނަފްސާނީ ބަލިމީހުން ގިނަ ޤަޢުމު. އެހެންދިމާވަނީ ކޮންމެ މީހެއްވެސް އެމީހެއްގެ އަސްލު އޮޅުވާލައިގެން ހިތުން އެހެން އުސޫލުތަކެއްގެ މަތީގައުޅޭތީ.
ޑޮކްޓާރ. ބަނާނާ
07 July 2022
މުޅިރާއްޖޭގެ އާބާދީ ގައި ތިބި އެންމެން ނަފުސާނީ ބަލީގެ ޝިކާރަޔަކަށް ނުވަނީސް ނަސީމްބެ ތިޔާ ކަން އެންމެންގެ ސަމާލު ކަމަށް ގެނައިތީ ޝުކުރު ދަންނަވަން. ތިޔާ ފަދަ ނުރައްކާތެރި ބަލިތައް މިދުވަސް ކޮޅު ފެތުރެމުންދާތީވެ ސިޔާސީ މަގާމުތަކުގައިވެސް ތިޔަފަދަ ބައްޔަކަށް ފަރުވާ ދޭންޖެހޭ ބޭފުޅުން ތިއްބެވިނަމަ އަވަސް ފަރުވާގެ ގޮތުގައި ނަމަވެސް ތިޔާ ފަރުވާ ދޭން ފެންނަކަމަށް ދަންނަވަން.
ާއުނިމާ
07 July 2022
ކޮންހަޔާތަކުންތޯ؟ ވެރިކަން ނިމުނީމަތޯ؟ ޑޮކްޓަރަށް ނުދެއްކި ބަލި މީހުންތައް މިއޮތް އަވަދިވަނީ..ސަރުކާރަށް ވާކަމެއް ކުރެވޭކަމެއް ހަރާމް..ހުރިހާ ކަމެއްވެސް ކުރަނީ ހުސް އަގައިން
ކޮރަލް
07 July 2022
ނަފްސާނީ ބަލި ގިނަ ވާނެ އެވެ. ކަރަންޓް ބިލް ފެން ބިލް އަދި ކުލި ނުދެއްކޭނަމަ ނަފްސާނީ ބަލި ގިނަ ވާނެ އެވެ. ފްލެޓް ކުލި 8500 ރުފިޔާ އެވެ. ސިވިލް ސާވިމް މުސާރަ އާދައިގެ މީހަކަށް 6000 ރުފިޔާ އެވެ. ރައްޔިތުންގެ އެތައް ބިލިއަނެއް ކައިފިއެވެ. އެމްއެމްޕީއާރސީ އިން ވެސް ސަރުކާރަށް ހޯދުނު ފައިސާ އެއް ނެތެވެ.
ދަލޭކަ ދައިތަ
07 July 2022
ނަސީމު މެންނަކަށް ނުވިސްނޭނެ،،، ޕާކަށް ވަނީމަވެސް ހިންހަމަޖެހުމެއް ލިބޭނީ ހަމަ ތިފަދަ ބޭފުޅުންނަށް. ނިކަމެތިން އުޅެނީ ޒަރޫރީ ބޭނުން ނުފުދިގެން. ލިބޭ އެއްޗަކަށް ވުރެން ދިރިއުޅުމުގެ ޚަރަދުތައްބޮޑު. ލިބޭހާއެއްޗެއް ނަސީމުވެސް ބޯހިޔާވަހިކަމަށް ޚަރަދުކުރައްވާ އެއްޗެއް ވިސްނިވަޑައިގަންނަވާނީ އޭރަށް... ކޮންމެ ސަރުކާރެއްވެސް އުޅެނީ ރައްޔިތުން ލޮލުގަ އަނދުންއަޅުވާފައި ޖީބައްއެއްޗެއް އެޅޭތޯ.
ހަމްކް
07 July 2022
80ހާހަށް އެރީމަވެސް އެބުނަނީ އެކަން ބަލަމުންނޭ ދަނީ؟؟ލަހެއް ނުވެ ރާއްޖޭގެ މުޅި ރައްޔިތުން ނަފްސާނީ ވާނެ.ޖީއެސްޓީ ބޮޑުކުރީ ތެޔޮ އަގު ބޮޑުކުރީ..ކާނާގެ ހުރިހާ ބާވތެއް އަގުބޮޑު..ދަތުރުފަތުރު އަގުބޮޑުކޮށްފި..
ޑިސްއޮނަރަބަލް ޑީޑީ
07 July 2022
ނަސީންބޭ. ތީދިރާސާއެއްގެ މައްޗަށް ބިނާކޮށް ޖެހިނަންބަރެއްތަ ނޫނީ އަދުރޭކުލާހުން ދަސްވެނިވެގެންއައިސް ޖަހައިގެންއުޅޭ ހިސާބެއްތަ؟
ސޭކުބެ
07 July 2022
މިހާރު މިއެގެނީ ދިވެހިންގެ އީމާންތެރިކަން ބަލިކަށިވެފަވާ މިންވަރު. ބަރާބަރަށް އީމާންވެގެން ހުންނަ އެއްވެސް މީހަކު ނަފުސާނީވެގެންނުވާނެ. އެމީހަކަށް މިންވަރަށް އީމާންވެވޭނަމަ މިބަލި ނެތިގެންދާނެ. ހައްލަކީ މީހުންގެ އަޤީދާ ވަރުގަދަ ކުރުން. ދީނަށް ހުރުމަތްތެރިކޮށް ހިތުމާ ދީނީ ކަންކަމުގައި ގިނައިން އުޅުން. ރޫޙާނީ ބައި ވަރުގަދަ ކުރުމާ އެކު މާއްދިއްޔަތަށް ފުރަގަސް ދިނުން. މަސްތުވާފަދަ ބޭސްތަކަކީ ހައްލެއްނޫން.
ސުއްލަވާރު
07 July 2022
ސޭކުބެ މޮޔަ ނުގޮވާ. އީމާންތެރިކަން ކިތަންމެ ވަރުގަދަޔަސް މާތްﷲ މިދުނިޔެމަތީގައި ލައްވާފައިވާ ބައްޔެއް އެ ބައްޔެއްޖެހެން އިރާދަފުޅުގައި ހުރި މީހަކަށް ޖެހޭނެ. އެއީ ޢަގީދާއަކާ އީމާންތެރިކަމަކާ ގުޅުމެއް ހުރި ކަމެއްނޫން. އުފަލާއި ހިތާމައާއި ވޭނާއި ހިތްދަތިކަން އިންސާނުންނާއި އެހެނިހެން މަޚުލޫގުންގެ ކިބައިގައި ވެސް ލެއްވި ﷲ ސުބުޙާނަހޫ ވަތަޢާލާ އެކަން މޮޅަށް ދެނެވޮޑިގެންވާނީ. ތިއީ ދިވެހީންގެ ދޫދޫމަތީން ކިޔަމުން އަންނަ އެއްޗެއް. ޢިލްމީ ވިސްނުމެއް ނޫން.
ބީރުބޮލު ވަޒީރު.
07 July 2022
ހުރިހާވެސް މައްސަލައަކީ މީސްތަކުން މަގުފުރެދިގެން ދިއުން. މިއީ ނުރައްކާތެރި ޒަމާނެއް. މަގުފުރެދުމާއި މަގުފުރެއްދުން އޮތް ޒަމާނެއް. މުސްލިމުންގެ ޢަގީދާ ފާސިދުވުމުގެ ނަތީޖާ މިއީ. އަހަރުމެންގެ ކާބަފައިންގެ ތެރޭގައި ނެތް ތިއަބުނާ ނަފްސާނީ ބައްޔެއް. އުނުއޮރިޔާން ނިވާކޮށްލާނެފަދަނެތި އަދި ބަނޑުހައިކަން މަތީ ތިބެ އެމީހުންގެ ދިރިއުޅުން ހޭދަކުރީ ﷲ ގެ ދީން ދޫނުކޮށް މި ދީނުގެ ބާރުހޯދައިގެން.
ހަބޭސް12
07 July 2022
އެންމެ ބޮޑަށް ކައުންސެލިން ބޭނުންވަނީ ހެލްތު މިނިސްޓަރއައި ފިނޭސް މިނިސްޓަރއަށް!