އޮގަސްޓް 27، 2022: ލީބިޔާގެ ދެ ސަރުކާރުގެ ހަނގުރާމަވެރިންގެ މެދުގައި ހިނގި ކުރިމަތިލުންތަކުގެ ތެރޭގައި އެއްގަމު އުޅަނދުތަކެއްގައި ރޯކޮށް އަންދާލާފައި. --އޭއެފްޕީ
28 އޯގަސްޓް 2022 - 11:42
ލީބިޔާގައި ވަކި ވެރިކަމެއް ގާއިމުކުރުމަށް މަސައްކަތްކުރާ ހަނގުރާމަވެރި ދެ ޖަމާއަތުގެ މެދުގައި އިއްޔެ މެންދުރު ފެށުނު ހަމަލާ ބަދަލުކުރުންތަކުގައި މަދުވެގެން 23 މީހަކު މަރުވެ 160 އަށް ވުރެ ގިނަ މީހުން ޒަޚަމްވުމާ އެކު، އެ ގައުމުގައި އަނެއްކާ ވެސް ހަނގުރާމައެއް ފެށިދާނެ ކަމުގެ ބިރު އުފެދިއްޖެ އެވެ.
ހަމަލާތައް ބަދަލުކުރެވުނީ، ވެރިރަށް ޓްރިޕޮލީގައި ގާއިމުކޮށްފައިވާ ގައުމީ އެއްބައިވަންތަކަމުގެ ސަރުކާރުގެ ސިފައިންނާއި، އެ ގައުމުގެ އިރުމަތީ ސަރަހައްދުގައި ގާއިމުކޮށްފައިވާ ސަރުކާރުގެ ސިފައިންނާ ދެމެދުގަ އެވެ. ވިލާތުގެ ގައުމުތަކުންނާއި އދ. މަޖިލީހުން ބަލައިގެންފައިވަނީ، ބޮޑުވަޒީރު އަބްދުލްހަމީދު އައްދުބައިބާގެ ވެރިކަމުގައި އޮތް ގައުމީ އެއްބައިވަންތަކަމުގެ ސަރުކާރެވެ.
އިރުމަތީ ސަރަހައްދުގައި، ބޮޑުވަޒީރު ފަތުހީ ބަޝާޣާގެ ވެރިކަމުގައި އުފައްދާފައި އޮތް ސަރުކާރު ހިންގަނީ، އެ ގައުމުގެ ގާނޫނު ހަދާ މަޖިލީހުގެ ތާއީދު ލިބިގެންނެވެ. އޭގެ އިތުރުން، އިރުމަތީ ސަރަހައްދުގައި ނުފޫޒު ގަދަ ކުރީގެ ޖެނެރަލް ޚަލީފާ ހަފްތަރާއި އޭނާ އަށް ވަފާތެރި ހަނގުރާމަވެރިން ވެސް ތާއީދު ކުރަނީ ބޮޑުވަޒީރު ފަތުހީ ބަޝާޣާގެ ސަރުކާރަށެވެ. މި ދެ ސަރުކާރުން ވެސް ދެކޭ ގޮތުގައި އަނެއް ސަރުކާރަކީ ޣައިރު ގާނޫނީ ސަރުކާރެކެވެ.
އޮގަސްޓް 27، 2022: ލީބިޔާގެ ދެ ސަރުކާރުގެ ހަނގުރާމަވެރިންގެ މެދުގައި ހިނގި ކުރިމަތިލުންތައް ކުރިއަށް ދިޔަ ވަގުތު، ގައުމީ އެއްބައިވަންތަކަމުގެ ސަރުކާރަށް ނިސްބަތްވާ ހަނގުރާމަވެރިންތަކެއް އުޅަނދެއްގައި ދަތުރުކުރަނީ. --އޭއެފްޕީ
އިއްޔެގެ ކުރިމަތިލުންތައް ފެށުނީ، ވެރިރަށް ޓްރިޕޮލީގެ މަގަކުން ދުއްވާފައި ދިޔަ، ގައުމީ އެއްބައިވަންތަކަމުގެ ސަރުކާރުގެ ސިފައިންގެ އުޅަނދުތަކަކަށް، އިރުމަތީ ސަރުކާރުގެ ސިފައިންގެ ބަޔަކު ހަމަލާ ދިނުމުންނެވެ. އެ ހަމަލާތައް ދިން އިރު، އިރުމަތީ ސަރުކާރުގެ އިތުރު ސިފައިންތަކެއް ވެރިރަށް ޓްރިޕޮލީގެ ރަށްބޭރު ސަރަހައްދަކަށް ޖަމާވެފައި ތިއްބެވެ.
ހަމަލާ ބަދަލުކުރަން ފެށުމާ އެކު، ރަށްބޭރުގައި ތިބި އިރުމަތީ ސަރުކާރުގެ ސިފައިން ޓްރިޕޮލީ އަށް ވަދެގަނެ، ގައުމީ އެއްބައިވަންތަކަމުގެ ސަރުކާރުގެ ސިފައިންނަށް ހަމަލާ ދޭން ފެށި އެވެ. ބޮޑުވަޒީރު ފަތުހީ ބަޝާޣާ ވިދާޅުވާ ގޮތުގައި ދާޚިލީ ހަނގުރާމަ ހުއްޓުމާ ބެހޭ ގޮތުން، ހަނގުރާމަވެރި ޖަމާއަތްތަކުގެ މެދުގައި ކުރެވުނު މަޝްވަރާތަކަށް ފަހު އެކުލަވައިލި ގައުމީ އެއްބައިވަންތަކަމުގެ ސަރުކާރު މިހާރު ވަނީ މުއްދަތު ހަމަވެގެން އުވިފަ އެވެ.
އެހެންކަމުން، ގާނޫނު ހަދާ މަޖިލީހުގެ ތާއީދާއެކު އެކުލަވާލާފައި އޮތް ސަރުކާރާ ވެރިކަން ހަވާލު ކުރުމަށް ފަތުހީ ބަޝާޣާ ގެންދަވަނީ ގޮވައިލައްވަމުންނެވެ. ނަމަވެސް ގައުމީ އެއްބައިވަންތަކަމުގެ ސަރުކާރު ހިންގާ ބޮޑުވަޒީރު ދުބައިބާ ވިދާޅުވަމުން ގެންދަވަނީ، ރައްޔިތުން އިންތިޚާބުކުރާ ސަރުކާރަކަށް މެނުވީ ވެރިކަމުގެ ބާރުތައް ނުދެއްވާނެ ކަމަށެވެ.
އޮގަސްޓް 27، 2022: ލީބިޔާގެ ދެ ސަރުކާރުގެ ހަނގުރާމަވެރިންގެ މެދުގައި ހިނގި ކުރިމަތިލުންތައް ކުރިއަށް ދިޔަ ވަގުތު، ގައުމީ އެއްބައިވަންތަކަމުގެ ސަރުކާރަށް ނިސްބަތްވާ ހަނގުރާމަވެރިންތަކެއް އުޅަނދެއްގައި ދަތުރުކުރަނީ. --އޭއެފްޕީ
އިއްޔެ ހިނގި ކުރިމަތިލުންތަކުގައި ވެރިރަށް ޓްރިޕޮލީގައި ހުރި އެތައް ހޮސްޕިޓަލަކަށް ވެސް ބޮޑެތި ގެއްލުންތަކެއް ލިބުނެވެ. އޭގެ އިތުރުން އާންމުން ދިރިއުޅޭ އެތައް އިމާރާތަކަށް ބޮޑެތި ގެއްލުންތައް ލިބި، މަގުތަކުގައި ހުރި އެތައް އުޅަނދުތަކެއްގައިވަނީ ހުޅު ޖަހައި އަންދާލައިފަ އެވެ.
ލީބިޔާގެ ކުރީގެ ޒައީމް ކާނަލް މުއްމަރުލް ގައްޒާފީގެ ވެރިކަމާ ދެކޮޅަށް، ނޭޓޯގެ މަދަދާ އެކު އެ ގައުމުގެ އިދިކޮޅު ސިޔާސީ ބޭފުޅުން 2011 ވަނަ އަހަރު ފެއްޓެވި މުޒާހަރާތައް މުޅި ގައުމަށް ފެތުރި، ގައްޒާފީގެ ވެރިކަން ވެއްޓުމާއެކު، ލީބިޔާ ވަނީ ދާޚިލީ ބޮޑު ހަމަނުޖެހުމެއްގެ ތެރެއަށް ވެއްޓިފަ އެވެ. އެމެރިކާ އާއި ނޭޓޯގެ ސިފައިން ލީބިޔާ އަށް އަރައި ކުރި ހަނގުރާމައިގައި، ގައްޒާފީ އަވަހާރަކޮށްލީ އޮކްޓޫބަރު 20، 2011ގަ އެވެ.
ގައްޒާފީގެ ވެރިކަމުގެ ދުވަސްވަރު ލީބިޔާއަކީ، އެފްރިކާގެ އެންމެ މުއްސަނދި އެއް ގައުމެވެ. ގައްޒާފީގެ ވެރިކަމުގައި ލީބިޔާގެ ރައްޔިތުންނަށް ތައުލީމާއި ސިއްހީ ޚިދުމަތް ހިލޭ ފޯރުކޮށްދިނެވެ. ނަމަވެސް ގައްޒާފީގެ ވެރިކަމަށް ފަހު ދާޚިލީ ހަނގުރާމަ ފެށުމާއެކު، ލީބިޔާގެ ދިރިއުޅުމުގެ ޚަރަދުތައް ވަނީ ވަރަށް ބޮޑަށް މައްޗަށް ގޮސްފަ އެވެ.
Copyright © 2024 Mihaaru · Terms and Conditions · Privacy Policy
ކޮމެންޓްތައް
ބީރުބޮލު ވަޒީރު.
28 August 2022
އެއޮތީ ހަބަރުގަވެސް ސާފުކޮށް ބުނެފަ ނޭޓޯގެ އެހީތެރިކަމާއެކީގައޭ ގައްޒާފީގެ ވެރިކަން ވައްޓާލަން ނިކުތީ. އެހެންވީމަ ނޭޓޯ މިއީ ނުލަފާވެގެންވާ ޖަމާޢަތެއް. ޕޫޓިންގެ ވެރިކަން ވައްޓާލަން ޔޫކުރޭނުގަ މަރުކަޒު ހަދަން އުޅެނިކޮށް ނޭޓޯގެ ފަތްކޮޅު މުގުރިއްޖެ. އަލްހަމްދު لله
އިބުރާ
28 August 2022
"ގައްޒާފީގެ ވެރިކަމުގެ ދުވަސްވަރު ލީބިޔާއަކީ، އެފްރިކާގެ އެންމެ މުއްސަނދި އެއް ގައުމެވެ. ގައްޒާފީގެ ވެރިކަމުގައި ލީބިޔާގެ ރައްޔިތުންނަށް ތައުލީމާއި ސިއްހީ ޚިދުމަތް ހިލޭ ފޯރުކޮށްދިނެވެ. ނަމަވެސް ގައްޒާފީގެ ވެރިކަމަށް ފަހު ދާޚިލީ ހަނގުރާމަ ފެށުމާއެކު، ލީބިޔާގެ ދިރިއުޅުމުގެ ޚަރަދުތައް ވަނީ ވަރަށް ބޮޑަށް މައްޗަށް ގޮސްފަ އެވެ." މިއޮތީ ހުޅަނގުގެ ޑިމޮކްރަސީގެ ނަތީއްޖާގެ ފޮނިމީރުކަން އޮންނަ ގޮތް
ސަލީމު އިދުރީސް
29 August 2022
ގައުމު މުއްސަދި ކަމައް ވާނީ ރައްޔިތުން ފުއްދުން ތެރި ބަޔަކައް ހެދުނީމަ މިހާރުވެސް ލީބިޔާ؛ ނައިޖޭރިއާ ފަދަ ގައުމުތައް މުއްސަދި އެމަކު ރައްޔިތުނައް ގައުމުގަ ހުރި މުއްސަދިކަން ފެނަންނީ ޑިމުކުރަސީ ރަނގަޅައް ހިނގާ ގައުމުތަކުން
48343
28 August 2022
ލީބިޔާރައްޔިތުން އަދިވެސް މައިތިރިވާކަށްނުވޭތޯ؟
އަފްރާސިޔާބު
28 August 2022
ރަނގަޅަށް ބާރަށް ކުރިއަށްދޭ. މިރާއްޖެގޮތަށް ހުޅަނގުގެ ޑިމޮކްރަސީ އައުމުގެ ނަސީބު ތިއޮތީ ލިބިފައި. ޑިކްޓޭޓަރު ގައްޒާފީގެ ވެރިކަމުގައި ދުނިޔޭ އެންމެ މުއްސަނދި އަދި އެންމެ ސުލްހަވެރި ގައުމު ތިޔަ ކުރިއަށް ގެންދަނީ.