ސްޓްރާޑާގެ ގުދަނުގައި ހުރި މުދަލަށް ލިބުނު ގެއްލުމުގެ ބަދަލު ނަގައިދެވެން ނެތް ކަމަށް ހުކުމްކޮށްފި

މާލެ ރާޅުގަނޑު ސަރަހައްދުގައި ބްރިޖު ވިއު ޕްލެޓްފޯމާ އިންވެގެން ހަދާފައި ހުރި، ނިއުޕޯޓް ރެސްޓޯރެންޓް ހިންގި ކުންފުނި ކަމަށްވާ ސްޓްރާޑާ ޕްރައިވެޓް ލިމިޓެޑްގެ ގުދަނުގައި ހުރި މުދަލަށް ލިބުނު ގެއްލުމުގެ ބަދަލު މާލޭ ސިޓީ ކައުންސިލުން ނަގައިދެވެން ނެތް ކަމަށް ސިވިލް ކޯޓުން އިއްޔެ ހުކުމްކޮށްފި އެވެ.

ސްޓާރާޑާ އިން މިދިޔަ އަހަރު އެ މައްސަލަ ސިވިލް ކޯޓަށް ހުށަހެޅީ، އެއްވެސް އެންގުމަކާ ނުލައި މާލޭ ސިޓީ ކައުންސިލުން އެ ގުދަން ރޫޅާލައި އެތަނުގައި ހުރި މުދާތައް އެ ކައުންސިލުގެ ބެލުމުގެ ދަށަށް ގެންގޮސްފައިވާ ކަމަށް ބުނެ އެވެ.

އެއީ ސިޓީ ކައުންސިލަށް ލިބިފައިވާ ބާރުގެ ބޭރު އަމަލެއް ކަމަށް ކަނޑައަޅައިދިނުމަށާއި އެ ގުދަނުގައި ހުރި މުދާތަކަށް އެ ކައުންސިލުން ޒިންމާވާން ޖެހޭ ކަމަށް ކަނޑައަޅައި ދިނުމަށާއި އަދި ލިބުނު ގެއްލުމުގެ ބަދަލުގެ ގޮތުގައި ކައުންސިލުން އެ ކުންފުންޏަށް 741،820 ޑޮލަރު (11،438،864ރ.) ދައްކަން ޖެހޭ ކަމަށް ކަނޑައަޅައިދިނުމަށް އެދުނެވެ.

އެ ދައުވާގެ ޖަވާބުގައި ސިޓީ ކައުންސިލުން ކޯޓުގައި ބުނީ ދައުވާގައި ބަޔާންކޮށްފައިވާ މުދާ އެތަނުގައި ބެހެއްޓުމުގެ ހައްގު ސްޓާރާޑާ އަށް ލިބިގެން ނުވާ ކަމަށާއި މާޗު 7، 2019 އިން ފެށިގެން އެތަން ބޭނުންކުރުމުގެ ހައްގު އެ ކުންފުންޏަށް ލިބިގެން ނުވާ ކަމަށް ސިވިލް ކޯޓާއި ހައި ކޯޓުގެ ގަސިއްޔާގައި ކަނޑައަޅާފައިވާކަން ސާފުކޮށް އެނގެން އެބަ އޮތް ކަމަށެވެ.

އެތަނުގައި އެއްވެސް އެއްޗެއް ބެހެއްޓުމުގެ ހައްގެއް ނެތް ފަރާތަކަށް ލިބޭނެ ބަދަލެއް ނޯންނާނެކަން ގާނޫނީ ހަމަތަކަށް ބެލުމުން އެނގޭ ކަމަށާއި އެ ބިން ބޭނުންކުރުމުގެ ހައްގު އެ ކުންފުންޏަށް ލިބިގެން ނުވާކަން ކޯޓުތަކުގެ ނިންމުންތަކުގައި ކަނޑައަޅާފައި ވާތީ، އެ ބިމުގައި ހުރި އިމާރާތްތަކާ މެދު ދައުލަތުން ބޭނުންވެއްޖެ ހިނދެއްގައި ބޭނުން ގޮތަކަށް މުއާމަލާތްކުރުމަކީ ދައުލަތަށް ނުވަތަ ސިޓީ ކައުންސިލަށް ގާނޫނީ ގޮތުން ލިބޭ ބާރެއް ކަމަށް ވެސް ބުންޏެވެ.

ސިޓީ ކައުންސިލުން ބުނި ގޮތުގައި އެ ގުދަން ނަގަން ޖެހުނީ، އެ ގުދަނުގެ ފުރާޅާއި ބިތްގަނޑުގެ ބައެއް މާލެ އަށް ކުރި ވިއްސާރައިގައި ގަދަވަޔާ އެކު އެއްލާލައި، ބައެއް ޓިނުތައް ވަޔާ އެކު މަގުމައްޗަށް ދިއުމުގެ ސަބަބުން އެ ސަރަހައްދުން ދަތުރުކުރާ ވެހިކަލްތަކަށާއި އާންމުންނަށް ބިރަކަށްވެ، ގެއްލުން ވެދާނެ ކަމަށް ފެނިގެން ކަމަށެވެ.

New port huree city council ge bimehga: Nareesh

The most trusted news source in the Maldives

Mihaaru

އެ މައްސަލައިގައި އިއްވި ހުކުމުގައި ބުނީ އެ ގުދަން ރޫޅާލައި، އެތަނުގައި ހުރި މުދާތައް ސިޓީ ކައުންސިލުގެ ބެލުމުގެ ދަށަށް ގެންގޮސްފައި ވަނީ އެ ކައުންސިލަށް ލިބިފައިވާ ބާރުގެ ބޭރުން ކަމަށެވެ. ނަމަވެސް ސްޓްރާޑާ އަށް ލިބުނު ގެއްލުން ކަމަށް ބުނެ ހުށަހެޅި ކަންކަމުން، ލިބުނު ގެއްލުމުގެ މިންވަރު ޝަރީއަތަށް ސާބިތުކޮށްދެވިފައި ނުވާ ކަމަށް ހުކުމުގައިވެ އެވެ. ހުކުމުގައިވާ ގޮތުން، ލިބުނު ގެއްލުން ބަޔާންކުރުމަށް ހުށަހަޅާފައިވާ ލޮސް އެސެސްމަންޓް ރިޕޯޓްގައި ބަލާފައިވަނީ ސްޓްރާޑާ އިން ދީފައިވާ އިންވޮއިސްތަކާއި އިންވެންޓްރީ ލިސްޓަކަށް ކަމަށާއި ފަސް އިންވޮއިސްގެ ތެރޭގައި އޮތީ ސްޓްރާޑާގެ ނަމުގައި އޮތް އެންމެ އިންވޮއިސްއެއް ކަމަށާއި ދެން ހުރީ ސްޓްރާޑާ ކޮންސްޓްރަކްޝަން އާއި އެއް ހިއްސާދާރު ޒާހިދު ރަމީޒްގެ ނަމުގައި ހުރި އިންވޮއިސްތަކެއް ކަމަށެވެ.

ނިއުޕޯޓް ހިންގި ބިމާއި އެތަނާ ގުޅިފައިވާ އެހެން ބިންތަކުގެ މައްސަލަތަކެއް ވެސް ކައުންސިލާ ދެކޮޅަށް ކޯޓުތަކުގައި ދަނީ ހިނގަމުންނެވެ.