އައްޑޫ ހިތަދޫ ކުޅި ސަރަހައްދުގައި ވަރަށް ބޮޑަށް މިރޭ އަލިފާން ރޯވެއްޖެ އެވެ.
އައްޑޫ ސިޓީ ކައުންސިލްގެ ސެކްރެޓަރީ ޖެނެރަލް މުހައްމަދު ޝުޖާއު ވިދާޅުވީ ރޯވެފައި ވަނީ އައްޑޫ އިކުއިޓޯރިއަލް ހޮސްޕިޓަލު ކައިރީގައި އޮންނަ އެ ރަށު މާކިޅީގައި ކަމަށެވެ. މީގެ އަހަރެއްހާ ދުވަސް ކުރިން ވެސް އެ ކުޅީގައި ރޯވި ކަމަށް އޭނާ ވިދާޅުވި އެވެ.
"އަލިފާން ރޯވި ސަބަބެއް އަޅުގަނޑުމެންނަކަށް ނޭނގެ. ވަރަށް ގާތީ ބަޔަކު ރޯކޮށްލީ ކަމަށް. އެހެން ނަމަވެސް ސީދާ އެހެން ބުނާކަށް ނޭނގޭ،" ޝުޖާއު ވިދާޅުވި އެވެ.
އޭނާ ވިދާޅުވި ގޮތުގައި ބޮޑު ސަރަހައްދެއްގައި މިހާރު ވެސް ވަނީ ރޯވެފަ އެވެ. އަދި މިހާރު ވެސް އަލިފާންގަނޑު ފެތުރެމުންދާ ކަމަށާއި ނަމަވެސް، އަލިފާންގަނޑު ނިއްވާލެވޭނެ ކަމުގެ ޔަގީން އެމްއެންޑީއެފުން ދޭ ކަމަށް ވިދާޅުވި އެވެ.
"ކުޅި ސަރަހައްދުގައި ނޫޅޭނެ މީހުންނެއް. އެކަމަކު މިހާރު ވައި ހުރި ގޮތުން ދުމުގެ އަސަރު ކުރާނެ ހޮސްޕިޓަލަށް،" ޝުޖާއު ވިދާޅުވި އެވެ.
އަލިފާންގަނޑު ނިއްވުމުގެ މަސައްކަތް އައްޑޫ ސިޓީ ކައުންސިލާއި ފުލުހުންނާއި އެމްއެންޑީއެފް ގުޅިގެން އަންނަނީ ކުރަމުންނެވެ. އެމްއެންޑީއެފުން ބުނީ ކުޅީގައި ރޯވިކަމުގެ މައުލޫމާތު ލިބުނީ މިއަދު ހަވީރު 5:30 ގައި ކަމަށެވެ.
