ވޮޝިންޓަން (ޖެނުއަރީ 7) - އެމެރިކާގެ ފަސްޓް ލޭޑީއެއްގެ ގޮތުގައި ޚިދުމަތް ކުރުމަކީ މިހާތަނަށް ލިބުނު އެންމެ ބޮޑު ޝަރަފު ކަމަށާއި އެ މަސައްކަތުގައި ރައްޔިތުން ފަޚުރުވެރި ކޮށްދެވުނު ކަމަށް އުއްމީދު ކުރައްވާ ކަމަށް މިޝޭލް އޮބާމާ ވިދާޅުވެއްޖެ އެވެ.
ވައިޓް ހައުސްގައި ބޭއްވި ވަދާއީ އިވެންޓެއްގައި ވާހަކަ ދައްކަވަމުން މިޝޭލް ވަނީ ޒުވާނުންނަށް ނަސޭހަތްތެރިވެފަ އެވެ. އެކަމަނާ ވަނީ ޒުވާނުން ކުރިމަގަށް ވިސްނާ ބިރު ކަނޑާލުމަށް ފަހު އަޒުމާއި ހިތްވަރާ އެކު ކުރާ ކަމަކަށް ފޯކަސް ކުރުމަށް އެދިވަޑައިގެންފަ އެވެ. އަދި އަމިއްލަ ނުފުސު ބާރުވެރި ކުރުވައި ތައުލީމު އުނގެނި އެ ތައުލީމުގެ މައްޗަށް ގައުމު ބިނާ ކުރުމަށް ވަނީ އެދިވަޑައިގެންފަ އެވެ.
މިޝޭލް މި މޭރުމުން ވާހަކަ ދައްކަވާފައި ވަނީ މި އަހަރުގެ ސްކޫލް ކައުންސިލާ އޮފް ދި އިޔާ އިވެންޓުގަ އެވެ. މިއީ ލީޑަޝިޕް ހުނަރު ދައްކުވައިދީފައިވާ ހައި ސްކޫލް ކައުންސިލަރުންނަށް 2015 ވަނަ އަހަރު އެކަމަނާ ތައާރަފްކުރެއްވި ޕްރޮގްރާމެކެވެ. މިޝޭލް ވައިޓް ހައުސްގަައި ހޭދަ ކުރެއްވި މުއްދަތުގައި އެކަމަނާ ވަނީ ތައުލީމަށާއި ފިޓްނަސް ފުޅާ ކުރުމަށް ވަރަށް ބޮޑު އިސްކަމެއް ދެއްވައިފަ އެވެ.
ރައީސް ބަރަކް އޮބާމާގެ ރިޔާސީ ދެ ދައުރަށް ފަހު އެމަނިކުފާނުގެ އާއިލާ ވައިޓްހައުސް އިން ނުކުމެވަޑައިގަންނަވާނީ މި މަހު 20 ވަނަ ދުވަހު އެވެ.