ސުޒެއިން އާއި ކުރީގެ އެސިސްޓެންޓް ކޯޗާ ދެމެދު ބަހުގެ ހަމަލާތަކެއް

ގައުމީ ފުޓްބޯޅަ ޓީމުގެ ކޯޗު ފްރެންޗެސްކޯ މޮރިއޭރޯގެ އެސިސްޓަންޓް ކޯޗުންގެ ގޮތުގައި މަސައްކަތްކުރަމުން އަންނަ އަލީ ސުޒޭނާއި އެ މަގާމުން ދާދި ފަހުން ވަކިވި ސިމާއޯ ކޮސްޓާއާ ދެމެދު ބަހުގެ ހަމަލާތަކެއް ބަދަލުކޮށްފި އެވެ.

ބަހުގެ ހަމަލާތަކެއް ފެށުނީ ސިމާއޯ އޭނާގެ އިންސްޓަގްރާމުގައި ކުރި ޕޯސްޓަކަށް ކޮމެންޓު ކުރަމުން، ރާއްޖޭގެ ގައުމީ ޓީމުގައި އޭނާ އަދާކުރި މަގާމާއި އޭނާގެ ޒިންމާތަކަކީ ކޮބައިކަމާ މެދު ސުވާލު އުފައްދައި ސުޒެއިން ކުރި ކޮމެންޓަކާ ގުޅިގެންނެވެ.

މުސާރަ ނުދީގެން ގައުމީ ޓީމުގެ އެސިސްޓެންޓް ކޯޗުގެ މަގާމުން މި މަހުގެ ކުރީކޮޅު އިސްތިއުފާދިން ސިމާއޯ ޓީމާ ވަކިވުމަށް ފަހު ވެސް އޭނާ ވަނީ ސޯޝަލް މީޑިއާގައި ރާއްޖޭގެ ފުޓްބޯޅަ ކުރިއެރުވޭނެ ގޮތްތަކާ ގުޅޭގޮތުން ހިޔާލު ފާޅުކޮށްފަ އެވެ. އަދި ފާޅުކޮށްފައިވާ ހިޔާލުތަކަށް ރާއްޖޭގެ ގިނަ ބަޔަކު ތާއީދު ކޮށްފައި ވެސް ވެ އެވެ.

ރަހުމަތްތެރިކަމުގެ މެޗުތައް ރޭވުމުގައި ރާއްޖޭގެ ރޭންކިން އަށް ވުރެ ވަރުގަދަ ޓީމުތަކާ ދެކޮޅަށް މެޗުތައް ހަމަޖައްސަން އިސްކަން ދޭން ވާނެ ކަމަށް ބުނެ ސިމާއޯ ކުރި ޕޯސްޓަށް، ސުޒެއިން ކުރި ކޮމެންޓުގައި ވަނީ، ބައިނަލްއަގްވާމީ ފުޓުބޯޅައިގައި މަސައްކަތް ކުރާއިރު ސިމާއޯގެ ކޮލިފިކޭޝަނަކީ ކޮބައިތޯ އަހައި، ޓީމުގައި އޭނާގެ މަގާމާ މެދު ސުވާލު އުފައްދައިފަ އެވެ.

"ކޯޗުގެ ގޮތުގައި ހުރިންތަ؟ ނޫނީ ތިއީ ހަމައެކަނި ޓްރެއިނަރެއް އަދި ކޯޗު މޮރިއޭރޯގެ ތަރުޖަމާނުތަ؟ ބައިނަލްއަގުވާމީ ފުޓުބޯޅައިގައި މަސައްކަތްކުރާއިރު ކޮލިފިކޭޝަނަކީ ކޮބާ؟ ވަރަށް އިހުތިރާމާ އެކު މި އަހަނީ އެއީ އަހަރެންނަށް އެނގޭ ގޮތުގައި ކޯޗުގެ ލަގަބާ އެކު ރާއްޖޭގައި މަސައްކަތް ކޮށްފައެއް ނުވޭ،" ކްލަބް ފުޓްބޯޅައިގައި ރާއްޖޭގެ އެންމެ ކާމިޔާބު އެއް ކޯޗު ސުޒޭން ލިޔެފައި ވެ އެވެ.

"ކިތަންމެ ދިގު އިބާރާތުން އެއްޗެހި ލިޔުނަސް މައްސަލައެއް ނެތް. އެނގެން ބޭނުމީ ކޯޗު މޮރިއޭރޯގެ ޓްރެއިނަރެއްގެ ގޮތުގައި ރާއްޖޭގެ ސީނިއާ ޓީމުގައި މަދު ދުވަސްކޮޅަކު މަސައްކަތް ކުރުމުގެ އިތުރުން ކޮން މަސައްކަތެއްތޯ ކުރީ އަދި ކޮބާތޯ ޒިންމާތަކަކީ؟ އިންސްޓަގްރާމުގައި ރާއްޖޭގެ ރީތި ފޮޓޯތައް ހިއްސާކޮށް ޕްރޮމޯޓްކުރާތީ ވަރަށް ރަނގަޅު. ޝުކުރިއްޔާ."

އޭގެ ޖަވާބުގައި ސިމާއޯ ބުނީ ސުޒޭން މިހާރުގެ ގައުމީ ކޯޗު ފްރެންސެސްކޯ މޮރިއޭރޯ ދިފާއު ކުރާ ދުވަސް ފެންނާނެ ކަމަށް މީގެ ކުރިން އުއްމީދު ނުކުރާ ކަމަށެވެ. ސުޒެއިން އަށް މޮރިއޭރޯ އިތުބާރު ނުކުރާ ކަމަށާއި، މިއަހަރު އޭޝިއަން ކަޕް ކޮލިފައިންގައި އުޒްބަކިސްތާނާ ދެކޮޅަށް ކުޅުނު މެޗުގައި ބެންޗުން ތެދުވުމާއި މެޗުގައި ކުޅުންތެރިންނާ ވާހަކަ ދައްކައި އިރުޝާދު ދިނުން ސުޒޭން އަށް މަނާކުރީ އެ ސަބަބާހުރެ ކަމަށް ސިމާއޯ ތުހުމަތުކޮށްފައިވެ އެވެ.

"ސީދާ ޕޮއިންޓަށް އަންނަމާ! އަހަރެމެންގެ ކުޅުންތެރިންނާ ވާހަކަ ދެއްކުމާއި، ބެންޗުން ތެދުވެ ކުޅުންތެރިންނަށް އިރުޝާދުދިނުން [ސުޒެއިން އަށް] ކޯޗު އޮތީ އުޒްބަކިސްތާން މެޗުގައި މަނާ ކޮށްފައި. އެއީ އޭނާ އަދިވެސް ސުޒޭން އަށް އިތުބާރު ނުކުރާތީ،" ޖަވާބުގައި ސިމާއޯ ލިޔުނެވެ.

"ރާއްޖޭގެ ފެޑެރޭޝަނުގައި އަހަރެންގެ މަގާމާ ގުޅޭ ގޮތުން ޖަވާބު ދޭނަމަ، އަހަރެންނަކީ ދެ ވަނަ ކޯޗު، އެއްބަސްވުމުގައި ސާފުކޮށް ބަޔާން ކޮށްފައި އެބަ އޮތް، އަހަރެން ވެސް އަހާލަން ބޭނުން ސުޒޭންގެ މަގާމަކީ ކޮބައިތޯ؟"

ސިމާއޯގެ ޖަވާބަށް ރައްދު ދެމުން ސުޒެއިން ބުނީ، އޭނާ އެއްވެސް މީހަކު ދިފާއު ކުރަނީ ނުވަތަ އަމިއްލަ އަށް ޕްރޮމޯޓުވަނީ ނޫން ކަމަށާއި، ބޭނުންވީ ރާއްޖޭގައި މަސައްކަތް ކުރި އިރު ސިމާއޯގެ މަގާމާއި މަސައްކަތަކީ ކޮބައިކަން ދެނެގަންނަން ކަމަށެވެ.

"އަހަރެން ވަރަށް އިހުލާސްތެރިކަމާ އެކު މި މަސައްކަތް ކުރަނީ 1989 އިން ފެށިގެން ދިވެހި ފުޓްބޯޅައިގެ ތެރޭގައި، އެއްވެސް މީހަކަށް އަހަރެންގެ އަގު ވައްޓާލައި، އަހަރެން ހާސިލް ކުރި ކާމިޔާބީތައް ނިގުޅައި ނުގަނެވޭނެ، ކޮންމެ ހާލެއްގައި ވެސް އަހަރެން ދެމި ހުންނާނީ ރާއްޖޭގެ ފުޓުބޯޅައަށް ހިދުމަތް ކުރުމުގައި،" ސުޒެއިން ލިޔެފައި ވެ އެވެ.

"މިހާރު ހުރި ކޯޗު ރާއްޖޭގެ ކޯޗުންނަށް އިތުބާރު ކުރުމުގައި ދަތިތަކެއް ހުރެދާނެ. އެކަމާ އެއްބަސް. އަހަރެންނަށް ހީވަނީ މިއީ އޭނާ އޭޝިއާގެ ޓީމަކާ ހަވާލުވި ފުރަތަމަ ފަހަރު ހެން، އަދި އޭޝިއާގެ މީހުންނާއި ފުޓުބޯޅަ ދަސްކުރަނީ ކަމަށް ވެދާނެ. އިންސާނުން ވީމަ ނުދަންނަ ބަޔަކަށް އިތުބާރު ކުރަން ދަތިވާނެ، އެކަމަކު ރަނގަޅަށް މީހުން ދެނެގަނެވިއްޖެ ނަމަ އެ ތަފާތު ވެސް ފިލައިދާނެ. ތި ފަރާތުގެ ސްޓޭޓްމަންޓަކުން އަހަރެންގެ ސީވީގެ އެންމެ ބަހެއް އަދި އެންމެ މަސައްކަތެއް ވެސް ފޮހެވިގެން ނުދާނެ."

ސުޒެއިންގެ ކޮމެންޓް މިހާރު ރިމޫވް ކޮށްފައި ވުމާ އެކު، ސިމާއޯ ވަނީ އޭނާއަށް ހާއްސަކޮށް އިތުރު ޕޯސްޓެއް ހިއްސާ ކޮށްފަ އެވެ. އަދި މިއީ އެފްއޭއެމްގެ ފަރާތަކާ ގުޅޭގޮތުން އޭނާ ވާހަކަ ދައްކާނެ ފަހު ފަހަރު ކަމަށް މި ޕޯސްޓު ފަށަމުން ސިމާއޯ ލިޔެފައި ވެ އެވެ.

"އިއްޔެ އަހަރެންގެ ޕޯސްޓެއް ކުރުމާ އެކު، ރާއްޖޭގެ ފެޑެރޭޝަނުގައި މަސައްކަތް ކުރާ، އެ މީހަކަށް އަދި އޭނާގެ މަސައްކަތަށް އަހަރެން ވަރަށް އިހުތިރާމުކުރާ ފަރާތެއް ކަމަށްވާ އަލީ ސުޒެއިން އަހަރެންނާ ސުވާލު ކުރީ، ފެޑެރޭޝަނުގައި އަހަރެން ކުރި މަސައްކަތަކީ ކޮބައިތޯ. އަދި އެންމެންނަށް އަންގަން އުޅުނީ އަހަރެންނަކީ ގައުމީ ޓީމުގެ ހެޑް ކޯޗުގެ ތަރުޖަމާނެއްކަން،" ކުރު ވީޑިއޯ ކޮޅަކާ އެކު ސިމާއޯ އޭނާގެ އިންސްޓަގްރާމުގައި ހިއްސާކުރި ޕޯސްޓުގައި ވެ އެވެ.

"އޭނާގެ ނަޒަރުގައި ފާއިތުވި އަށް މަސް ދުވަހު ރާއްޖޭގެ ގައުމީ ޓީމުގައި އަހަރެންނަކީ ހަމައެކަނި ތަރުޖަމާނުކަން. ކޮންމެވެސް މީހަކު (އަހަރެންނަށް އެނގޭ ކާކުކަން) އޭނާއަށް އަމުރު ކުރީ އަހަރެންގެ މަގާމާއި ކޮލިފިކޭޝަން ހާމަކޮށްދޭން."

ލިޔުންކޮޅާ އެކު މިއަދު ހިއްސާކުރި ވީޑިއޯގައި އޭނާ ވަނީ، ސެޓްޕީސްތައް ދިފާއުކުރަން، ގައުމީ ޓީމުގައި އޭނާ މަސައްކަތް ކުރި ދުވަސްވަރުގެ ޓީމުން ގެންގުޅުނު ރޭވުމާއި، އޭނާ ދިއުމަށް ފަހު މިހާރު ގެންގުޅޭ ރޭވުމުގެ ތަފާތު ދައްކުވައިދީފަ އެވެ.

"މި ހުރިހާ ދުވަހަކު ސުޒެއިން ވެސް ހުރި. އެކަމަކު ފަހަރުގައި ވެދާނެ އަބަދު ފޮޓޯ ނަގަން އުޅުމުން ޓީމާ އެކު އަހަރެން ކުރި މަސައްކަތްތައް ސާފު ނުވެ އޮތީ ކަމަށް. ހެޑް ކޯޗުގެ އެދުމުގެ މަތިން ވަރަށް އިހުތިރާމާ އެކު އަބަދުވެސް އަހަރެން އުޅުނީ އޭނާގެ އިރުޝާދުތަކާ އެއްގޮތަށް އަހަރެންގެ ފުޓްބޯޅައިގެ ތަޖުރިބާ ހިއްސާކުރުމުގައި،" ސިމާއޯގެ ޕޯސްޓުގައި ވެ އެވެ.

"ސުޒެއިން އަށް އެނގޭނެ ޑިފެންސިވް ސެޓްޕީސްތަކަށް ޓީމު ތައްޔާރު ކުރުމަކީ އަހަރެންގެ ޒިންމާއެއް ކަން. އަހަރެމެން އަށް މަސް ވަންދެން އެއް މިސްރާބަކަށް މަސައްކަތް ކުރަމުން ގެންދިޔައިން. އެކަމަކު އިއްޔެގެ އެކުވެރިކަމުގެ މެޗުގެ ކުރިން، ކޮންމެވެސް މީހަކު ބޭނުން ވެގެން އެ ހުރިހާ ކަމެއް ބަދަލުކުރަން ނިންމުމުން ވަރަށް ހައިރާންވޭ."

ސިމާއޯ އިތުރަށް ބުނީ ގައުމީ ޓީމާ އެކު އޭނާގެ ދަތުރު ނިންމާލަން ޖެހުނަސް، ޓީމުގެ ކުޅުންތެރިންނާއި ސަޕޯޓަރުންނަށް އޭނާގެ ހިތުން އަބަދުވެސް ހާއްސަ ޖާގައެއް އޮންނާނެ ކަމަށެވެ. ނަމަވެސް ކަން ދިމާކުރި ގޮތުން ޓީމާ އެކު މަސައްކަތް ނިންމާލަން ޖެހުނީ ލިބެންޖެހޭ މުސާރަ ހޯދަން ފީފާ ގައި އެދިގެން ކަން ވެސް އޭނާ ފާހަގަ ކުރި އެވެ.

ސިމާއޯ ވަނީ އޭނާ ރާއްޖޭގެ ގައުމީ ޓީމުގެ އެސިސްޓެންޓް ކޯޗުކަމުގެ މަގާމު ދޫކޮށްލިކަން ހާމަކޮށް ކުރި ޕޯސްޓަށް ފަހު، އޭނާގެ ސޯޝަލް މީޑިއާގައި ރާއްޖޭގެ ޓީމާ ގުޅޭގޮތުން ލިޔެފައިވާ ހުރިހާ ޕޯސްޓެއް ފޮހެލައިފަ އެވެ.