ވެލާނާ އިންޓަނޭޝަނަލް އެއާޕޯޓުގައި ތަރައްގީ ކުރި ސީޕްލޭން ޓާމިނަލް "ނޫވިލު" މިއަދު ރަސްމީކޮށް ހުޅުވައިފި އެވެ.
އެ ޓާމިނަލް ރަސްމީކޮށް ހުޅުވައިދެއްވީ ނައިބު ރައީސް ފައިސަލް ނަސީމެވެ. ރާއްޖޭގެ ކަނޑުގެ ކުލަތައް ރަމްޒުކޮށްދޭ، ދިވެހިވަންތަ ސިފަތަކަކާއި ޒަމާނީ ކުލަވަރު ފެންނަ އެ ޓާމިނަލަކީ 55 މިލިއަން ޑޮލަރުގެ މަޝްރޫއެކެވެ.
މިއަދު ހުޅުވި އެ ޓާމިނަލުގައި ވައިއިޕީ ބަޔަކާ 42 ލައުންޖު ހިމެނެ އެވެ. އޭގެ ތެރެއިން ދެ ލައުންޖު ފިޔަވާ ހުރިހާ ލައުންޖަކީ ރިސޯޓުތަކަށް ކުއްޔަށް ދީފައިވާ ތަންތަނެވެ. ބާކީ ދެ ލައުންޖަކީ އެމްއޭސީއެލްގެ ދެ ލައުންޖެކެވެ. އެއީ "ވިލު" ބިޒްނަސް ލައުންޖާއި، "ނީރު" ލައުންޖެވެ.
ރާއްޖޭ އަކީ ދުނިޔޭގެ އެންމެ ބޮޑު ސީޕްލޭން އޮޕަރޭޝަން ހިންގާ ގައުމަށް ވާއިރު އެ ފަދަ ޓާމިނަލެއް އޮތުމަކީ މުހިންމު ކަމެއްގެ ގޮތުގައި އެމްއޭސީއެލުން ވަނީ ބުނެފަ އެވެ. ސީ ޕްލޭން ޓާމިނަލް ދުވާލެއްގެ މައްޗަށް ބޭނުން ކުރާ މީހުންގެ އަދަދު 4،000 އާއި 6،000 އަށް ދެމެދަށް އަރަ އެވެ. އަދި ލޯ ސީޒަންގައި ދުވާލެއްގެ މައްޗަށް 300 ފްލައިޓް ދަތުރު ކުރާ އިރު ހައި ސީޒަންގައި 600 ފްލައިޓު ދަތުރު ކުރެ އެވެ.
ސީޕްލޭން ޓާމިނަލް މިއަދު ހުޅުވާފައި ވަނީ އެއާޕޯޓުގައި ތަރައްގީ ކުރި އާ ރަންވޭގެ އޮޕަރޭޝަން ފެށުމާއި ގުޅިގެންނެވެ.