އިނގިރޭސި ބޮޑުވަޒީރުގެ މަގާމުގެ ވާދަވެރިކަން ބޮޑުވެފައި

އިނގިރޭސި ކޮންޒަވޭޓިވް ޕާޓީގެ އެތެރޭގައި އުފެދުނު ދެބަސްވުންތަކާ ހެދި، ކުރީގެ ބޮޑުވަޒީރު ބޮރިސް ޖޯންސަން އިސްތިއުފާ ދެއްވުމުން، އެ މަގާމާ ހަވާލުވެވަޑައިގެންނެވި ލީޒް ޓްރަސްގެ ސަރުކާރަށް ދެ މަސް ވެސް ނުވަނީސް، މިދިޔަ ބުރާސްފަތި ދުވަހު ލީޒް އިސްތިއުފާ ދެއްވުމާ ގުޅިގެން، އެ މަގާމުގެ ވާދަވެރިކަން ބޮޑުވެއްޖެ އެވެ.

ބޮޑުވަޒީރުގެ މަގާމު ހުސްވުމާ ގުޅިގެން، ކުރީގެ ބޮޑުވަޒީރު ބޮރިސް ޖޯންސަން ކެރީބިއަންގައި ހޭދަކުރައްވަމުން ގެންދެވި ޗުއްޓީ ކެންސަލް ކޮށްލެއްވުމަށް ފަހު، އިއްޔެ ލަންޑަނަށް ވަޑައިގެންފި އެވެ. އަދި އިއްޔެ މެންދުރު ފަހު ވަނީ ބޮޑުވަޒީރު ކަމުގެ މަގާމަށް އެންމެ ބޮޑަށް ވާދަކުރައްވާނެ ކަމަށް ބެލެވޭ، ކުރީގެ މާލީ ވަޒީރު ރިޝީ ސުނަކްއާ އެކުގައި ސިއްރު ބައްދަލުވުމެއް ބާއްވައިފަ އެވެ.

ބޮޑުވަޒީރަކަށް ވެވަޑައިގަތުމަށްޓަކައި، އެންމެ ފުރަތަމަ ހާސިލްކުރައްވަން ޖެހިވަޑައިގަންނަވާނީ ކޮންޒަވޭޓިވް ޕާޓީގެ ލީޑަރުގެ މަގާމެވެ. މިހާރު އިނގިރޭސި ގާނޫނު ހަދާ މަޖިލީހުގެ ގޮނޑިތައް ބެހިފައި އޮތް ގޮތުން ކޮންޒަވޭޓިވް ޕާޓީ އަށް ގާނޫނު ހަދާ މަޖިލީހުގެ ތިރި ގޭގެ ޖުމްލަ 650 ގޮނޑީގެ ތެރެއިން 357 ގޮނޑި ލިބިފައިވާތީ، ބޮޑުވަޒީރުގެ މަގާމަށް އައްޔަންކުރެވޭނީ ކޮންޒަވޭޓިވް ޕާޓީގެ ލީޑަރެވެ.

ބޮރިސް އާއި ރިޝީ ސިއްރު ބައްދަލުވުމެއް ބޭއްވި ނަމަވެސް، ޕާޓީގެ ލީޑަރުކަމަށް ޝައުގުވެރިވެވަޑައިގަންނަވާކަން އެއިން އެއްވެސް ބޭފުޅަކު މިހާތަނަށް އިއުލާނެއް ނުކުރައްވަ އެވެ. ޕާޓީގެ ލީޑަރުކަމަށް ވާދަކުރައްވަން ބޭނުން ނަމަ، މާދަމާގެ މެންދުރު 1:00ގެ ކުރިން، ގާނޫނު ހަދާ މަޖިލީހުގައި ހިމެނޭ އެ ޕާޓީގެ މެމްބަރުންގެ ތެރެއިން މަދުވެގެން 100 މެމްބަރުންގެ ތާއީދު ހޯދަންޖެހޭނެ އެވެ.

އެންމެ ފަހުގެ ޚިޔާލު ހޯދުންތަކުން ދައްކާ ގޮތުގައި، ގާނޫނު ހަދާ މަޖިލީހުގައި ހިމެނޭ ކޮންޒަވޭޓިވް މެމްބަރުންގެ ތެރެއިން 128 މެމްބަރެއްގެ ތާއީދު ވަނީ ރިޝީ އަށް ލިބިވަޑައިގެންފަ އެވެ. ބޮރިސް އަށް ލިބިވަޑައިގެންފައިވަނީ އެންމެ 53 މެމްބަރުންގެ ތާއީދެވެ.

ޕާޓީގެ ލީޑަރުގެ މަގާމަށް ވާދަކުރައްވާނެ ކަމަށް މިހާތަނަށް އިއުލާން ކުރެއްވި ކުރީގެ ދިފާއީ ވަޒީރު ޕެނީ މޯޑައުންޓް އަށް މިހާތަނަށް ލިބިވަޑައިގެންފައިވަނީ އެންމެ 23 މެމްބަރުންގެ ތާއީދެވެ.

ޕާޓީގެ ލީޑަރުގެ މަގާމަށް ބޭފުޅަކު ހޮވުމަށް ބާއްވާ އިންތިޚާބުގެ ފުރަތަމަ ބުރުގެ ވޯޓުލުން އޮންނާނީ މާދަމާ މެންދުރު ފަހު އެވެ. ޕާޓީގެ އެތެރޭގެ އިންތިހާބުގެ ގަވާއިދު ހަމަޖެހިފައި އޮތް ގޮތުން، މިފަހަރުގެ އިންތިޚާބުގެ ފުރަތަމަ ބުރުގައި ވާދަކުރެއްވޭނީ ގިނަވެގެން އެންމެ ތިން ކެންޑިޑޭޓުންނަށެވެ.

މިފަހަރުގެ އިންތިހާބުގައި ވޯޓު ލެވޭނީ އެ ޕާޓީގެ މެމްބަރުންގެ ތެރެއިން، ވޯޓު ލުމަށް އެދި ރަޖިސްޓްރީކުރި 170000 މެމްބަރުންނަށެވެ. މާދަމާ ބާއްވާ ވޯޓުލުމުގައި އެންމެ ގިނަ ވޯޓު ހޯއްދަވާ ދެ ކެންޑިޑޭޓުންގެ މެދުގައި ދެ ވަނަ ބުރުގެ ވޯޓުލުން، މިއަންނަ ހުކުރު ދުވަހު އޮންނާނެ އެވެ.