ޚަބަރު / މ. ނިރުފެހިގޭގެ އަލިފާނުގެ ހާދިސާ

އަލިފާނުގެ ހާދިސާގައި މަރުވި އިންޑިއާ 8 މީހުންގެ ހަށިގަނޑު ގައުމަށް ފޮނުވާލައިފި

އަލިފާނުގެ ހާދިސާގައި މަރުވި މީހުންގެ ހަށިގަނޑު ގައުމަށް ފޮނުވާލުމަށް އެމްއޭސީއެލްގެ މުވައްޒަފުން ހަރަކާތްތެރިވަނީ.--

ފާތިމަތު އަޖްފާން، މިހާރު

17 ނޮވެމްބަރ 2022 - 14:57

މ. ނިރުފެހިގޭގައި ހިނގި އަލިފާނުގެ ހާދިސާގައި މަރުވި މީހުންގެ ތެރޭގައި ހިމެނޭ އިންޑިއާ އެންމެންގެ ހަށިތައް އެ ގައުމަށް ގެންގޮސްފައިވާ ކަމަށް އިންޑިއާ ހައި ކޮމިޝަނުން މިއަދު ބުނެފި އެވެ.

ގްރައުންޑް ފްލޯއާ އެކު ތިން ބުރިއަށް ހަދާފައި ހުރި ނިރުފެހި ގޭގައި މި މަހުގެ ނުވަ ވަނަ ދުވަހުގެ ރޭ ދަންވަރު ހިނގި އަލިފާނުގެ ހާދިސާގައި 10 ބިދޭސީއަކު މަރުވި އެވެ. އެއީ އިންޑިއާގެ 8 މީހަކާއި ބަންގްލަދޭޝްގެ ދެ މީހެކެވެ.

މީގެ ކުރިން އިންޑިއާގެ ތިން މީހެއްގެ ހަށިގަނޑު ވަނީ އެ ގައުމަށް ފޮނުވާލައިފަ އެވެ.

އިންޑިއާ ހައި ކޮމިޝަނުން ބުނީ އަލިފާނުގެ ހަދިސާގައި މަރުވި އިންޑިއާ މީހުންގެ ތެރެއިން މިހާތަނަށް އެ ގައުމަށް ނުފޮނުވި ހުރި ހަށިތައް މިހާރު އެ ގައުމަށް ފޮނުވާލާފައިވާ ކަމަށެވެ.

Fire incident in Malé:

Mortal remains of all 8 Indian nationals, who lost their lives in this unfortunate incident, have been repatriated to India.

We thank Maldivian authorities for their support in this regard.
— India in Maldives (@HCIMaldives) November 17, 2022

ފުލުހުން އެންމެ ފަހުން އާންމުކޮށްފައިވާ މައުލޫމާތަށް ބަލާއިރު، އެ ރޭ ދަންވަރު 12:30 ހާއިރު އެ ގޭގަައި އަލިފާން ރޯވިއިރު، އެ ތަނުގައި ތިބީ 26 މީހެކެވެ.

މިހާތަނަށް މާލޭގައި ހިނގި އަލިފާނުގެ އެންމެ ނުރައްކާތެރި މި ހާދިސާގައި އެންމެ ފުރަތަމަ ރޯވި ގަރާޖަކީ ގަވައިދާ ހިލާފަށް ހިންގަމުން ދިޔަ ތަނެކެވެ. ފުލުހުން ބުނި ގޮތުގައި އެއީ ހުޅުމާލޭގައި ހިންގަން ހުއްދަ ދީފައިވާ ގަރާޖެކެވެ.