މާފަރު އެއާޕޯޓު
20 ނޮވެމްބަރ 2022 - 13:45
7 comments
މިއަހަރުގެ މިހާތަނަށް މާފަރަށް 300 ޖެޓު ޖައްސާފައިވާ ކަމަށާއި ކުރިއަށް އޮތް ސީޒަން ތެރޭ ވެސް 80 ޖެޓް އަންނަން ބުކް ކޮށްފައިވާ ކަމަށް އެ އެއާޕޯޓުން ބުނެފި އެވެ.
އެ އެއާޕޯޓުގެ އޮޕަރޭޝަން ބަލަހައްޓާ، މޯލްޑިވިއަންގެ ޖެނެރަލް މެނޭޖަރު މުމްތާޒް އަލީ ވިދާޅުވީ، މިފެށޭ ސީޒަންގެ ގިނަ ދުވަސްތަކަށް ޖެޓްތައް އޮތީ ފުލްކޮށް ކަމަށެވެ.
މާފަރު އިންޓަނޭޝަނަލް އެއާޕޯޓުގައި އެއްފަހަރާ 13 ޖެޓަށް ޕާކު ކުރެވޭނެ އެވެ. ބައެއް ދުވަސްވަރު އެ ކެޕޭސިޓީއަށް ވުރެ އިތުރަށް ވެސް ޖެޓްތައް ޖައްސަ އެވެ. ޕާކު ނުކުރެވޭ ޖެޓްތައް އެ އެއާޕޯޓަށް ޖެއްސުމަށް ފަހު ޕާކުކުރަން ދަނީ އެހެން އެއާޕޯޓުތަކަށެވެ.
މިއަހަރުގެ މިހާތަނަށް ޖެޓް 596 މޫވްމަންޓް ރެކޯޑްކޮށްފައިވެ އެވެ. އަދި މި ފެށޭ ސީޒަންގައި 160 ޖެޓް މޫވްމަންޓް ރެކޯޑް ކުރެވޭނެ ކަމަށް ބެލެވެ އެވެ. މުމްތާޒް ވިދާޅުވީ އަންނަ މަހު ޕްރައިވެޓް ޖެޓްތައް އެއާޕޯޓުގެ ފުލް ކެޕޭސިޓީގައި އަންނާނެ ކަމަށެވެ.
މި ދުވަސްވަރަކީ ރާއްޖެއަށް އަންނަ ޓޫރިސްޓުން ވަރަށް ބޮޑަށް އިތުރު ދުވަސްވަރެކެވެ.
މާފަރަކީ ވެލާނާ އިންޓަނޭޝަނަލް އެއާޕޯޓު ފިޔަވައި އެންމެ ގިނަ ޖެޓް ޖައްސާ އެއާޕޯޓެވެ. މާފަރު އެއާޕޯޓު އޮންނަ ސަރަހައްދަކީ ހައި އިންޑް ގިނަ ރިސޯޓުތަކެއް އޮންނަ ސަރަހައްދެކެވެ. އޭގެ ތެރޭގައި، ވެލާ އާއި ސޮނޭވާ ޖާނީގެ ރަންދެލި ރިސޯޓު ހިމެނެ އެވެ.
މި މަހުގެ މިހާތަނަށް ރާއްޖެއަށް 73،000 ޓޫރިސްޓުން އައިސްފައިވެ އެވެ. މިއީ މިދިޔަ އަހަރުގެ މި މުއްދަތަށް ވުރެ 2،000 ޓޫރިސްޓުން އިތުރު އަދަދެކެވެ. މިއަހަރުގެ މިހާތަނަށް ރާއްޖެއަށް 1.4 މިލިއަން ޓޫރިސްޓުން އައިސްފައިވެ އެވެ. މިއަހަރު ނިމޭ އިރު 1.6 މިލިއަން ޓޫރިސްޓުން ގެނައުމަކީ ސަރުކާރުގެ އަމާޒެވެ.
މާފަރު އެއާޕޯޓު ހުޅުވީ 2019 އަހަރުގެ ޑިސެމްބަރު މަހު އެވެ. އަބޫދާބީ ފަންޑް ފޯ ޑިވެލޮޕްމެންޓް (އޭޑީއެފްޑީ) އިން 60 މިލިއަން ޑޮލަރު ޚަރަދު ކޮށްގެން ހެދި މާފަރު އިންޓަނޭޝަނަލް އެއާޕޯޓަށް ހިންގަނީ ސަރުކާރުގެ އެއާލައިން ހިންގާ ކުންފުނި އައިލެންޑް އޭވިއޭޝަނުންނެވެ. މިއީ އޭ320 އާއި ބޮއިން 737 މަރުކާގެ ބޯޓު ފަހަރަށް ވެސް ޖެއްސޭ ފެންވަރުގެ އެއާޕޯޓެވެ.
އިތުރު ލިޔުންތައް
މަގްބޫލް ލިޔުންތައް
Mihaaru Print Edition
Download Mihaaru News App
Offline Alerts
SMS 'sub mihaaru' to 5454
ކޮމެންޓްތައް
ފަގީރުކުންފުނި
21 November 2022
އެކަމުވެސް އައިލެންޑް އޭވިއޭޝަން އޮންނާނީ ދަރާފަ.
ކޮރަލް
20 November 2022
ޓޫރިޒަމް ރަނގަޅު ވާ ވަރަކަށް ޑޮލަރު ތައް ލިބެނީ ސިޔާސީ މީހުންނާއި ވަގަށް ޑޮލަރު ވިއްކާ މީހުންނަ ށެވެ. މީރާ އަށް ވެސް ލިބެނީ މަކަރު ހަދާފަ ބާކީ ވާ ޑޮލަރު ކޮޅެވެ.
ހުޒާމާ ހަސަން
20 November 2022
މާފަރުން ރާއްޖޭން ބޭރަށް ދެވޭގޮތް ހަދާނީ ކޮންއިރަކުންތަ؟
ޖެޓް
20 November 2022
ކިތަންމެ ޖެޓެއް ޖެއްސިޔަސް ރައްޔިތުންނަށް ވާނެ ފައިދާއެއް ނެތް. ހަގީގީ ފައިދާ ލިބޭނީ މަހުޖަހުންނާއި ބޭރުގެ ކުންފުނިތަކަށް. ރިޒޯޓް ހިއްސާ ނުވިއްކާނަމަ މިކަން އަބަދުވެސް އޮންްނާނީ މިހެން. ރިޒޯޓް ހިއްސާ ނުވިއްކައި ރިޒޯޓްތައް ނުހިންގޭނެ ގޮތަށް ގާނޫނެއް އަންނާނެ ދުވަހެއްގެ އިންތިޒާރުގައި ރައްޔިތުން މިތިބީ. ޑޮލަރުގެ ކަޅުބާޒާރަށްވެސް ލުއިކަމެއް އަންނާނީ ރިޒޯޓް ހިއްސާ ވިއްކައިގެން.
ބޮޑުމީހާ
20 November 2022
އިގްތިސާދީ ވެރިންގެ ވިސްނުން ފެނޭތަ! މި މީހުންގެ ކަމަކީ އާބާދީގެ 200 ހަމަނުވާ ރަށްތަކުގަ 4 ބުރީގެ ފެނަކަ އިމާރާތް އެޅުމާއި، އާބާދީ އާއި ނުބައްދަލު ބަދަރު ހެދުމާއި، ދެން ކިޔާނެކަމެއް ނެތް
48343
20 November 2022
ޖެޓުތައް ދޫނިތަކެއްހެން ތިރިކުރިޔަސް އަހަރެމެންނަށް ވާނެ ފައިދާއެއް ނޯންނާނެއެވެ.
މާހިރު
20 November 2022
ޖެޓު ޖެއްސިއަސް ޕާރކް ކުރާނެ ޖާގަ ނެތްކަން ފޮޓޯއިން ދޭހަވެއެވެ. އެހެންކަމުން ޕާކް ކުރުމުގެ ޖާގަ އިތުރުކޮށް މިހާރަށްވުރެ ރަނގަޅު އިންތިޒާމް ތަކެއް ހަމަޖައްސަން ޖެހޭކަމަށް ފެނެއެވެ.