ފޮރިން ސާވިސްއާ ގުޅޭ މައުލޫމާތު ދިނުމަށް ޕްރޮގްރާމްތަކެއް ބާއްވަނީ

ފޮރިން ސާވިސް އިންސްޓިޓިއުޓް (ފޮސިމް) އިން ރާއްޖޭގެ ހާރިޖީ ސިޔާސަތުގެ މުހިންމު މައްސަލަތަކާ ގުޅޭގޮތުން މައުލޫމާތު ހިއްސާކުރުމުގެ ޕްރޮގްރާމްތަކެއް އަންނަ އަހަރު ބާއްވަން ނިންމައިފި އެވެ.

ފޮރިން މިނިސްޓްރީން މިއަދު ބުނީ އެ ޕްރޮގްރާމްތަކުގައި ހާރިޖީ ސިޔާސަތާއި އެ ސިޔާސަތާ ގުޅޭ މުހިންމު މައްސަލަތަކާ ގުޅޭގޮތުން ދައުލަތުގެ އިދާރާތަކަށާއި ސްކޫލް ކުދިން ހޭލުންތެރިކުރުވުމުގެ މަސައްކަތް ކުރާނެ ކަމަށެވެ.

މި އަހަރުގެ އޮކްޓޯބަރު 27 ގައި އަމަލުކުރަން ފެށި ރާއްޖޭގެ ފޮރިން ސާވިސް ގާނޫނުގައިވާ ގޮތުން، ފޮސިމްގެ ޒިންމާތަކުގެ ތެރޭގައި ރާއްޖޭގެ ހާރިޖީ ސިޔާސަތާއި އެ ސިޔާސަތާ ގުޅޭ މުހިންމު މައްސަލަތަކާ ގުޅޭ ގޮތުން ސަރުކާރު ވުޒާރާތަކާއި ސްކޫލުތަކާއި އަދި ޔުނިވާސިޓީތަކުގެ ދަރިވަރުން އަހުލުވެރިކޮށް، ހޭލުންތެރިކަން އިތުރުކުރުމަކީ އެ އިދާރާގެ މަސައްކަތްތަކުގެ ތެރޭގައި ހިމެނޭ ކަމެކެވެ.

އެ ޕްރޮގްރާމްތަކުގައި ބައިވެރިވުމުގެ ދައުވަތު މިނިސްޓްރީތަކާއި ގައުމީ ޔުނިވާސިޓީއަށް މިހާރު ދީފައިވާ ކަމަށް ވެސް ފޮރިން މިނިސްޓްރީން ބުންޏެވެ.

"އައުޓްރީޗް ޕްރޮގްރާމްގައި ހިންގޭ ސެޝަންތަކުގެ ތެރޭގައި، ރާއްޖޭގެ ހާރިޖީ ސިޔާސަތާއި ބައިލެޓެރެލް މަލްޓިލެޓެރަލް ގުޅުންތަކާއި ކޮމާޝަލް ޑިޕްލޮމަސީ އާއި ކޮންސިއުލާ އަދި ޕްރޮޓޮކޯލްތަކާ ބެހޭގޮތުން މައުލޫމާތު ހިއްސާކުރުމުގެ ސެޝަންތައް ކުރިއަށް ގެންދާނެ އެވެ،" މިނިސްޓްރީން ބުންޏެވެ.

ފޮރިން ސާވިސްގެ ގާނޫނާ އެކު، ކުރިން ފޮރިން މިނިސްޓްރީގެ ދަށުން ހިންގައިމުން އައި ފޮސިމް މިހާރު ވަނީ އަމިއްލަ ބާރުލިބިގެން ހިންގާ އިދާރާއަކަށް ބަދަލުވެފަ އެވެ.