ރާއްޖެ އިން އިންޑިއާއަށް ކަނޑައަޅާފައި ހުންނެވި ސަފީރު އިބްރާހިމް ޝަހީބް: އޭނާ ވިދާޅުވި ގޮތުގައި އިންޑިއާގެ އިމިގްރޭޝަނުން ދިވެއްސަކު ހިފެހެއްޓި މައްސަލައިގެ މައުލޫމާތު އަންނަނީ އޮޅުންފިލުވަމުން ކަމަށް.
13 ފެބުރުއަރީ 2023 - 12:34
37 comments
އިންޑިއާއާ ދެކޮޅަށް ރާއްޖޭގެ އިދިކޮޅު ޕާޓީ، ޕީޕީއެމުން ހިންގާ ކެމްޕޭންގައި އިސްކޮށް އުޅޭ އެކްޓިވިސްޓަކު އެ ގައުމުގެ އިމިގްރޭޝަނުގެ ބެލުމުގެ ދަށަށް ގެންދިޔަ ސަބަބެއް އަދި ނޭނގޭ ކަމަށާއި އެ ގައުމަށް ދަތުރުކުރާ ދިވެހިންނަށް، ކެމްޕޭނަކާ ހެދި ނުރައްކަލެއް ނުވަތަ ދަތިތަކެއް ކުރިމަތިވެދާނެ ކަމަކަށް ނުބެލެވޭ ކަމަށް އިންޑިއާގައި ހުންނަވާ ދިވެހި ސަފީރު އިބްރާހިމް ޝަހީބް މިއަދު ވިދާޅުވެއްޖެ އެވެ.
ޕީޕީއެމްގެ ހުޅުމާލެ ގޮފީގެ ރައީސް އަބްދުއްސަމަދު އިންޑިއާގައި ހިފެހެއްޓީ އާއިލާ އެކު ބޭސްފަރުވާއަށް ގޮސް އުޅެނިކޮށެވެ. އަނބިދަރިންނާ ވަކިން އެ ގައުމުގެ އިމިގްރޭޝަންގެ ބެލުމުގެ ދަށަށް އޭނާ ގެންގޮސް ވީތަނެއް ރެއާ ހަމައަށް އާއިލާއަށް ނާންގާ ކަމުގެ ކަންބޮޑުވުން ޕީޕީއެމުން ވަނީ ފާޅުކޮށްފަ އެވެ.
ސަމަދާ ގުޅޭ މައުލޫމާތު އާއިލާ އަށް ދޭން ޕީޕީއެމުން ސަރުކާރަށް ގޮވާލައިފި https://t.co/5Ao7WJvWGm
— Mihaaru (@Mihaarunews) February 12, 2023
ސަމަދު، އިންޑިއާގެ އިމިގްރޭޝަންގެ ބެލުމުގެ ދަށަށް ގެންދިޔައީ ޕާސްޕޯޓުގައި މައްސަލައެއް އުޅޭ ކަމަށް ބުނެފައި ކަމަށް އޭނާ އާންމުކުރި ވީޑިއޯއެއްގައި ބުނެފައިވެ އެވެ. އެ ގައުމުން އޭނާ އިއްޔެ ޑިޕޯޓްކޮށްލާނެ ކަމަށް މައުލޫމާތު ދީފައި ވިޔަސް އެކަމެއް ނުކުރެ އެވެ. ޕީޕީއެމްގެ ބައެއް އިސް ބޭފުޅުން ވިދާޅުވާ ގޮތުގައި އޭނާ އަދިވެސް ހުންނެވީ އިމިގްރޭޝަންގެ ބެލުމުގެ ދަށުގަ އެވެ.
ރާއްޖެއަށް މިއަދުގެ ފްލައިޓަކުން ސަމަދު ފޮނުވާލާނެ ކަމަށް ވެ އެވެ.
ޕީޕީއެމް ހުޅުމާލޭ ގޮފީގެ ރައީސް ސަމަދު: އޭނާ އިންޑިއާގެ އިމިގްރޭޝަންގެ ބެލުމުގެ ދަށަށް ގެންދިޔަ ސަބަބެއް ނޭނގެ. --- ފޮޓޯ/ސޯޝަލް މީޑިއާ
މިއީ، ރާއްޖޭގައި ތިބޭ އިންޑިއާގެ ސިފައިން ބޭރުކުރުމަށް ގޮވާލައި އިދިކޮޅު ކޯލިޝަނުން ފަށާފައިވާ އިހުތިޖާޖުގައި އަޑުއުފުލަމުންދާ އެކި މީހުންނަށް އަމާޒުކޮށް އިންޑިއާގެ ސަރުކާރުން ހިންގާ "ލާއިންސާނީ" އަމަލުތަކުގެ ތެރޭގައި ހިމެނޭ ކަމެއް ކަމަށް ޕީޕީއެމުން ރޭ ނެރުނު ނޫސްބަޔާނުގައި ބުންޏެވެ.
އެކަމަކު އެފަދަ އެއްވެސް ކަމަކާ ގުޅިގެން ދިވެހިންނާ ދޭތެރޭގައި އިންޑިއާ އިން ފިޔަވަޅު އަޅާފާނެ ކަމަށް އެ ގައުމުގައި ހުންނަ ދިވެހި ހައި ކޮމިޝަނުން ނުދެކެ އެވެ.
ހައި ކޮމިޝަނާ ޝަހީބް "މިހާރު" އަށް ވިދާޅުވީ ރާއްޖެއިން ވަރަށް ގިނަ ދިވެހިން އެކި ކަންކަމުގައި އިންޑިއާއަށް ދަތުކުރާއިރު ވަކި ކަމާ ގުޅުވައި އެ ގައުމުން ނުރައްކާ ކުރިމަތިވެ، ފިޔަވަޅު އަޅަން ފަށާފައިވާ ކަމަށް ނުބުނެވޭނެ ކަމަށެވެ.
މި ފަހުން ހިނގައިދިޔަ ކޭސްގައި ވެސް ވަކި ބަޔަކަށް އަމާޒުކޮށްގެން ނުވަތަ ހުރިހާ ދިވެހިންނަށް ފިޔަވަޅު އަޅަނީއޭ ނުބުނެވޭނެ ކަމަށާއި އެ ޔަގީންކަން އެބައޮތް ކަމަށް ވެސް ވިދާޅުވި އެވެ.
ސަމަދު އިންޑިއާގެ އިމިގްރޭޝަންގެ ބެލުމުގެ ދަށަށް ގެންދިޔަ ސީދާ ސަބަބެއް މިހާތަނަށް އިންޑިއާގައި ހުންނަ ދިވެހި ހައި ކޮމިޝަނަކަށް ވެސް ނާންގާ ކަމަށް ސަފީރު ވިދާޅުވި އެވެ. އޭނާ ވިދާޅުވީ އިންޑިއާއަށް އެތެރެވުމާ ގުޅޭ މައްސަލައެއް އޮތް ނަމަ އެކަމުގައި ވާހަކަ ދައްކާނީ ސީދާ އެ މީހަކާ ކަމަށެވެ.
"އެންޓްރީގައި އިޝޫއެއް އުޅެންޏާ އޮތޯރިޓީއާ އެ މިހަކާ އެ މައުލޫމާތު ޝެއާކޮށް ހަދާނީ ވެސް. އަޅުގަނޑުމެންނާ ނުކުރާނެ،" ސަފީރު ވިދާޅުވި އެވެ.
ސަމަދު ހިފެހެއްޓި ސަބަބު، ޝަހީބް ވިދާޅުވި ގޮތުގައި، އިދާރާތަކާ ވާހަކަ ދައްކައިގެން އަންނަނީ ބަލަމުންނެވެ.
"އެ ކަހަލަ އެއްވެސް ހަބަރެއް އަޅުގަނޑުމެންނަކަށް ނެތް އިނގޭތޯ އަދި ލިބިފައެއް،" އިންޑިއާ އައުޓް ކެމްޕޭނާ ގުޅިގެން އެޅި ފިޔަވަޅެއްތޯ އެހުމުން ސަފީރު ވިދާޅުވި އެވެ.
ޝަހީބް ޔަގީންކަން ދެއްވި ގޮތުގައި ރާއްޖޭގައި ހިންގި ކެމްޕޭނަކާ ގުޅިގެން ދިވެހިންނަށް އިންޑިއާގައި ދަތިކޮށް ފިޔަވަޅު އަޅާފާނެ ކަމަކަށް ވެސް ނުބެލެވޭ ކަމަށާއި ވިސާއާ ނުލައި އަދިވެސް އިންޑިއާއަށް އެކި ކަންކަމުގައި ދިވެހިންނަށް ދަތުރުކުރެވޭނެ ކަމަށެވެ.
އިންޑިއާ އައުޓް ކެމްޕޭންގައި ޕީޕީއެމުން އަޑުއުފުލަނީ: މި ކެމްޕޭން ހުއްޓުވަން ރައީސް އިބްރާހިމް މުހައްމަދު ސޯލިހް ވަނީ ގަރާރެއް ނެރުއްވާފައި.
މި ސަރުކާރު ވެރިކަމަށް އައި ފަހުން އިންޑިއާއާ އޮންނަ ގުޅުން އާދަޔާ ޚިލާފަށް ގާތެވެ. ޚާރިޖީ ސިޔާސަތުގައި ވަކި ގައުމަކާ މިހާ ގާތްގުޅުމެއް ބޭއްވުމަކީ މިނިވަންކަމަށް ނުފޫޒު ފޯރުވަން ދޭ ޖާގައެއް ކަމުގެ ކަންބޮޑުވުމާ އެކު އިދިކޮޅުގެ "އިންޑިއާ އައުޓް" ކެމްޕޭން ފެއްޓެވީ ޕީޕީއެމްގެ ރައީސް އަބްދުﷲ ޔާމީން އިސްވެ ހުންނަވަ އެވެ.
މާލޭގައި މުޒާހަރާތަކަށް ފަހު، ރަށްރަށުގައި ވެސް މި ކެމްޕޭން ފުޅާކޮށް ހިންގި އެވެ. އަމާޒަކީ މި ގައުމުގައި ތިބި އިންޑިއާ ސިފައިން ބޭލުން ކަމަށާއި އިންޑިއާގެ އަޅުވެތިކަމުން ރާއްޖެ ސަލާމަތްކުރާނެ ކަމަށް ވެސް އެމަނިކުފާނު ގެންދެވީ ވިދާޅުވަމުންނެވެ.
ޔާމީންގެ ގެކޮޅުގައި "އިންޑިއާ އައުޓް" ބެނާއެއް ވެސް ނެގި އެވެ. އެކަމަކު ކޯޓު އަމުރެއް ހޯދައި ފުލުހުން ވަނީ އެ ބެނާ އެ ގެކޮޅުން ނަގައިފަ އެވެ.
އިންޑިއާ އައުޓް ބެނާތަކާއި ދިދަތައް ހިފައިގެން ކުރި މުޒާހަރާތައް ހުއްޓުވީ ރައީސް އިބްރާހިމް މުހައްމަދު ސޯލިހް ނެރުއްވި ގަރާރަކުންނެވެ. އެ ގަރާރުގައި ބުނީ އެއްވެސް ޖާއިޒު މަގުސަދެއް ނެތި ސިޔާސީ ބޭނުމެއްގައި ވަކި ގައުމަކާ ދެކޮޅަށް ރާވައިގެން ހިންގާ ކެމްޕޭންތަކަކީ، ގައުމީ ސަލާމަތާ ގުޅުން ހުރި އަދި ނުރައްކާ އޮތް ކަމެއް ކަމަށާއި ވަކިވަކި ގައުމުތަކާ ދެކޮޅަށް ނަފްރަތު އުފެއްދުމަށް ހިންގޭ މިފަދަ ހަރަކާތްތަކަކީ ގާނޫނު ތަންފީޒު ކުރާ އިދާރާތަކުން ހުއްޓުވަން ޖެހޭނެ ހަރަކާތެއް ކަމުގައި ކަނޑައެޅުމަށް ގައުމީ ސަލާމަތާ ބެހޭ މަޖިލީހުން ނިންމާފައިވާ ކަމަށެވެ.
އިތުރު ލިޔުންތައް
މަގްބޫލް ލިޔުންތައް
Mihaaru Print Edition
Download Mihaaru News App
Offline Alerts
SMS 'sub mihaaru' to 5454
ކޮމެންޓްތައް
ދިވެހިންލޮލޭ
15 February 2023
އެހެން ދީން ތަކަށް އަޅުކަންކުރުން ރާއްޖޭގަ މަނާ. އެކަމަކު ކޮންމެ ދުވަހަކު ހެނދުނު 7 ޖަހާއިރުން ފެށިގެން އާތިފިސަލް ބީޗުގެ ގުރާކޮއްޓާ ދިމާ އަތިރިމަތީ ސިމެންތި ގޮނޑިއެއްގައި ދެފައި ވައްކޮށްގެން އިރު އަރާތަނަށް ބަލަފައި ދެލޯ މަރަގެން އިނދއިނދެ ބާރަށް އޯމް އޯމް ހަރި އޯމް ހަރި ކިރިސްނާ ހަރި ރާމާ ކިޔާ މީހަކު އެބަ އިނދޭ. ފެންނަ މީހަކު ނެތް.
ލޮލްޓި
14 February 2023
ސަފީރު އެހެންވިއްޔާ އައްސަވާބަލަ ކީއްވެތޯ އިންޑިޔާގަ ހިންގާ ޖަމުއިއްޔާތަކަށް އިންޑިޔާގެ ހާރިޖިއްޔާއިން އަންގަނީ ސާކު އިވެންޓުތައް ނުބާއްވާ ބީމްސްޓެކް އިވެންޓު ބަދަލުގަ ބާއްވަން؟ ސާކު ގައުމުތަކުގެ ލިސްޓުން އަފްޣަނިސްތާނާ ޕާކިސްތާނާ ދިވެހިރާއްޖެ އުނިކޮށްފަ ތައިލެންޑާ މިޔަންމާރު އިތުރު ކުރިމާ އެއީ ބިމްސްޓެކް. ތިނޫހުންވެސް މިކަން ބަލާބަލަ!
މަހޭބެ
14 February 2023
ހަމަ ހިފަހައްޓަންވި ކޮންފަދަކަމެއް ދިވެހިން މިހާރު ތަންކޮޅެއް ތަހްޒީބުކޮށް އުޅެން ދަސްކުރަންވެއްޖެ
ކަލޭ ނުދެކެމުތަ
14 February 2023
ތަހުޒީބު ވީމަ ކުރާ ކަންކަން އެއީ. ކަލެޔަށް ތަހުޒީބު ނޭނގެނީ. އެމެރިކާގެ ރައީސުންނަށް ޖޯކްޖަހައި އިންޑިޔާ މީހުން ނެރޭ ވީޑިޔޯ ކަލޭ ނުދެކެމުތަ؟ އެމެރިކާ ދެކެ އަންނަ ރުޅިން އެތާގެ ވެރިންގެ ސޫރަޔާއި އެތާގެ ދިދަ އަންދައި ހަދާތަނެއް ކަލޭ ނުދެކެމުތަ؟ އެހެނޭ ކިޔާފައި އިންޑިިޔާ މީހަކު އެމެރިކާއަށް ދިޔުމުން ހިފަހައްޓައި ފިޔަވަޅުއެޅިތަން ކަލޭ ދުށީމުތަ؟
ާއުނިމާ
14 February 2023
ނުބެލެވުނަސް ރިޔަލިޓީއަކީ އެކަން އެގޮތައް ކޮށްފިކަން
ލިލިއަން
14 February 2023
މީނާއަކީ ހާދަހާވާ މޮޅު ސަފީރެކޭ.. މަށަށް ވެސް މިހެން ޚިޔާލީ ވާހަކަ ދެއްކިދާނެ. ބަލަގަ ސަފީރުގެ ޒިންމާއެއް ނޫންތަ އެމީހާ ބަންދުކުރީ ކީއްވެކަން ބެލުމަކީ. ދެން އިންޑިޔާ ސަރުކާރުން ޖަވާބު ނުދޭނަމަ އެއުޅޭ ޝާހިދު ވެއްޖެ އެއްނު މާލޭގަ ހުންނަ އިންޑިޔާ ސަފީރު ފޮރިން މިނިސްޓްރީއަށް ހާޒިރުކޮށްގެން ވެސް މިވެގެން އުޅޭ ގޮތެއް ބަލަން؟
އާމީނީ މަގުގެ ތާރުގަނޑު
13 February 2023
ޙެހެހެ އެގޮތަކަށް ވެސް ނުކުރާނެ. ޔާމިން އިރު އެތާ ކައުންސިލް ބޭރެގަ އަވީގައި ބޮޑެތި ކިޔު ހަދުވައިގުން ގަނޑަރެޅުވި ބައެއްގެ ވާހަކަ ތިކިޔަނީ
ސޭކް
13 February 2023
މިކަހަލަ ވާހަކަދައްކާމީހުންނަށް މުސްކުޅިން ކިޔަނީ ބަތާހަރާމީއެކޭ.
ކަނބިލި
13 February 2023
ސަފީރު ހާދަ ޒިންމާދާރުކަން ކުޑަ ޖަވާބެކޭ ތިޔަ ދިނީ. ދިވެހި ރައްޔިތަކު ނިޒާމުން ގެއްލިގެން އެކަމާ ކަންބޮޑުވުން ފާޅު އެކުރަނީ. އިއްޔެ ސަމަދު. މާދަމާ ކާކުކަމެއް ނޭގެ "ގެއްލޭނީ". ތިޔަ ގެންގުޅޭ ފަސްޓް ޕޮލިސީން ދިވެހިން ދެވަނަ ދަރަޖައިގެ ބަޔަކަށް ބަދަލުވެއްޖެ. ދިވެހިންގެ ހައްގުތަކާއި ކަރާމާތެއްނެތް. ސަފީރު ތިޔަ ބުނަނީ އަދިވެސް ހިޔެއްނުވޭ. އިންޑިއާއަކީ ޑިމޮކްރަޓިކު ޚިޔާލުފާޅު ކުރުމުގެ މިނިވަންކަން އޮންނަ ގައުމެކޭ ބުނޭ. ދިވެހިންނަށް މި ހައްގުވެސް ނެތީދޯ
ޖުމުހޫރީމައިދާނުން
13 February 2023
ޢިންޑިޔާގެ ބޭސް ފަރުވާ ވ އަގުބޮޑު، ފައިސާއާ ޕުރޮޖެކްޓާ ތަރައްގީގެ ނަމުގައި ގައުމާއި ދިނާ ވަޠަން ދުކޮށް ނުލެވޭނެ. 1945 ގައި ޖަޕާނަށް ދިޔަ އެމެރިކާ ސިފައިން އަދިވެސް ނުބޭލެ. 2003 ގައި އިރާގަށް ދިޔަ ސިފައިން އަދިވެސް ނުބޭލެ.
އިބޫއަށް ވެދުން
13 February 2023
އިންޑިއާ ފަސްޓް ޕޮލިސީއެއް ބޭނުމެއް ނޫން! ބޭނުންވަނީ މޯލްޑިވްސް ފަސްޓް ޕޮލިސީއެއް ގެންގުޅޭނެ ސަރުކާރެއް! ބޭރުގެ އިންވެސްޓްމަންޓްތައް ގެނެސް ރާއްޖޭގެ އުފެއްދުންތެރިކަން ކުރިއަރުވައި ދިވެހިން ކައިރި ކަރަތަކަށް ބަރޯސާވުން ކުޑަކޮށްދޭނެ ސަރުކާރެއް. އެއްވެސް ގައުމެއްގެ ޕަޕެޓު ސަރުކާރަކަށް ދިވިހިންގެ ކަރާމާތެއް ، ހައްގެއް ހިމާޔަތް ކޮށެއް ނުދެވޭނެ. ކުރެވޭނެހާވެސް ކަމަކީ މާސްޓަރުގެ އިޝާރާތަކަށް ނެށުން!