އިސްކަންދަރުން ތިން މެޗުން 64 ގޯލް ޖަހައިފި، ބައިކޮޅަށް ގޯލެއް ނުވަދޭ!

މިހާރު ކުރިއަށްދާ، އެފްއޭއެމް 15 އަހަރުންދަށުގެ އިންޓަ ސްކޫލް ފުޓްބޯޅަ މުބާރާތުގެ ގުރޫޕް ސްޓޭޖުގައި ބައިކޮޅަށް ލަނޑެއް ވަނަ ނުދީ، ތިން މެޗުން ޖުމުލަ 64 ލަނޑު އިސްކަންދަރު ސްކޫލުގެ ޓީމުން ޖަހައިފި އެވެ.

ރޭ، ބިލަބޮންގް ސްކޫލާ ދެކޮޅަށް ކުޅުނު މެޗުން އިސްކަންދަރު މޮޅުވީ 17-0 އުންނެވެ. މިދިޔަ ހުކުރު ދުވަހު ގިޔާސުއްދީން ސްކޫލާ ދެކޮޅަށް ކުޅުނު މެޗުން މޮޅުވީ 18-0 އިންނެވެ. އަދި ގުރޫޕް ސްޓޭޖް ފުރަތަމަ މެޗުގައި އަމީނިއްޔާ ސްކޫލްގެ މައްޗަށް ކުރި ހޯދީ 29-0 އިންނެވެ.

ބިލަބޮންގާ ދެކޮޅަށް ރޭ ކުޅުނު މެޗުގައި، އިސްކަންދަރްގެ މުހައްމަދު އިލާން އިމްރާން 8 ލަނޑު ޖެހި އެވެ. ގުރޫޕް ސްޓޭޖްގެ ތިން މެޗުގައި އޭނާ ވަނީ 25 ލަނޑު ޖަހައިފަ އެވެ. އެ ޓީމުގެ ފުރަތަމަ މެޗުގައި އަމީނިއްޔާ އާ ދެކޮޅަށް އޭނާ 13 ލަނޑު ޖެހި އެވެ. ގިޔޔާސުއްދީން ސްކޫލާ ދެކޮޅަށް ކުޅުނު މެޗުގައި އޭނާ ހަތަރު ލަނޑު ޖެހި އެވެ.

މިދިޔަ އަހަރު ބޭއްވި އެފްއޭއެމް 14 އަހަރުން ދަށުގެ މުބާރާތުގައި ވެސް އެންމެ ގިނަ ލަނޑު ޖެހި ކުޅުންތެރިޔާގެ އެވޯޑް ހޯދި އިލާން ވަނީ އެ މުބާރާތުގައި 35 ލަނޑު ޖަހައިފަ އެވެ.

މިދިޔަ އަހަރު ސައުދީ އަރަބިއާގައި ބޭއްވި އޭއެފްސީ ކޮލިފައިން އަށް ދިޔަ 17 އަހަރުން އަހަރުން ދަށުގެ ގައުމީ ޓީމުގެ އެންމެ ޒުވާން ކުޅުންތެރިޔާ، އީތަން އިބްރާހިމް ޒަކީ ވެސް ވަނީ ރޭގެ މެޗުގައި ފަސް ލަނޑު ޖަހައިފަ އެވެ. ކުރިން ގިޔާސުއްދީނާ ދެކޮޅަށް ކުޅުނު މެޗުގައި ވެސް އޭނާ ފަސް ލަނޑު ޖެހި އެވެ. އަދި އަމީނިއްޔާ އާ ދެކޮޅަށް ކުޅުނު މެޗުގައި ހަ ލަނޑު ޖަހައި ދެ ހެޓްރިކް ވެސް އޭނާ ހެދި އެވެ.

ރޭގެ މެޗުގައި އެ ޓީމުގެ އަނެއް ހަތަރު ލަނޑު ޖެހީ އަބްދުﷲ އައިދާން ސާޖިދު އާއި ދާނިޔަލް މުހައްމަދު އެވެ. އައިދާން ވަނީ ދެ ލަނޑު ޖަހައިފަ އެވެ.

އިސްކަންދަރުގެ ސްޕޯޓްސް ސްޕަވައިޒަރު އަދި ކުރީގެ ޑިފެންޑަރު ޔޫސުފް އަޒީމް (ޔޫއްޓޭ) ގެ ކޯޗުކޮށްދޭ މި ޓީމަކީ ރާއްޖޭގެ ފުޓްބޯޅައިގެ މުސްތަގުބަލަށް ކުޅުންތެރިން ނެރޭނެ ޓީމެއް ކަމަށް ތަޖުރިބާކާރުން އުއްމީދު ކުރެ އެވެ. ރާއްޖޭގެ 16 އަހަރުން ދަށުގެ ގައުމީ ޓީމަށް ވެސް ގިނަ ކުޅުންތެރިން ނަގަނީ މި ޓީމުންނެވެ.