އަފީފާއި ބޮންޑޭ އަށް ޕީޕީއެމްގެ ދައުވަތެއް

އެމްޑީޕީގެ ދެ މެމްބަރުން ކަމަށްވާ ވިލުފުށީ ދާއިރާގެ ހަސަން އަފީފާއި މާފަންނު މެދު ދާއިރާގެ އިބްރާހިމް ރަޝީދު (ބޮންޑޭ) އެ ޕާޓީގައި ތިއްބަވަން ބޭނުން ނުވާ ކަމަށް ވިދާޅުވުމުން، އެމްޑީޕީ ދޫކުރައްވައި، އިދިކޮޅު ޕީޕީއެމާ ގުޅިވަޑައިގަތުމަށް އެ ޕާޓީގެ ނައިބު ރައީސް އާދަމް ޝަރީފް މިއަދު ދައުވަތު ދެއްވައިފި އެވެ.

އެމްޑީޕީގެ އަސާސްތަކާ ދެކޮޅަށް އެ ޕާޓީން މިހާރު އަމަލު ކުރަމުން ގެންދާ ކަމަށް ވިދާޅުވެ، އެމްޑީޕީއާ ދުރަށް ވަޑައިގަތުމުގެ ޝައުގުވެރިކަން، އެމްޑީޕީގެ ރައީސް މުހައްމަދު ނަޝީދުގެ ފެކްޝަންގެ އިސް އެ ދެ ބޭފުޅުން ފާޅުކުރެއްވީ ސަރުކާރު ފަރާތުން ފުލުހުންގެ ގާނޫނަށް ހުށަހަޅާފައިވާ އިސްލާހަކަށް ރައްޔިތުންގެ މަޖިލީހުގެ މިއަދުގެ ޖަލްސާގައި ބަހުސް ކުރައްވަމުންނެވެ.

ބޮންޑޭ ވިދާޅުވީ، އެމްޑީޕީއަކީ އިންސާފާއި ނަޒާހަތްތެރިކަމާއި ހަމަހަމަކަން ގެނެސްދިނުމަށްޓަކައި މަސައްކަތް ކުރާ ޕާޓީއެއް ކަމަށާއި އެއާ ހިލާފަށް ހުށަހަޅާ ބިލްތަކަށް ވޯޓެއް ނުދެވޭނެ ކަމަށެވެ. އޭނާ ވަނީ ޕާޓީން ވަކިވުމަށް ފަހު ހުންނަވާނީ "ފިކުރެއްގެ ދިރުން" އާ އެކީ ކަމަށް ވެސް ވިދާޅުވެ ވާހަކަ ދައްކަވައިފަ އެވެ.

Afeef aai Bonde vidhaalhuvanee mihaaru MDP gai thibbevumuge shaugeh neiy kamah

The most trusted news source in the Maldives

Mihaaru

ޕާޓީގައި ހުންނަވަން ބޭނުންވެވަޑައިނުގަންނަވާ ކަމަށް އިޝާރާތް ކުރައްވައި އަފީފް ވިދާޅުވީ، ފިޔަވަޅު އަޅައި ޕާޓީން ވަކި ކުރިޔަސް މިހާރު މައްސަލައެއް ނެތް ކަމަށެވެ.

އެ ވާހަކަތަކަށް ރައްދު ދެއްވައި ކުރީގެ ޑިފެންސް މިނިސްޓަރު އާދަމް ޝަރީފް ކުރެއްވި ޓްވީޓެއްގައި ވަނީ އެ ދެ ބޭފުޅުން ޕީޕީއެމާ ގުޅުމަށް ދައުވަތު ދެއްވައިފަ އެވެ.

މަޑުއްވަރި ދާއިރާގެ މެމްބަރުކަން ވެސް ކުރައްވާ އާދަމް ޝަރީފް ވިދާޅުވިގޮތުގައި، އަފީފާއި ބޮންޑޭ އަކީ ވެސް ވަރަށް ތަޖުރިބާ ހުރި ދެ ބޭފުޅުން ކަމަށާއި ވެރިކަން މިހާރުގެ ވެރިކަން ބަދަލުކުރުމަށް އެ ދެ މެމްބަރުން މުހިންމު ވާނެ ކަމަށެވެ.

އެމްޑީޕީން ވަކިވުމުގެ ވާހަކަ އަފީފާއި ބޮންޑޭ ދައްކަވާއިރު، އެ ޕާޓީގެ ވިޕްލައިންތަކާ ހިލާފުވި މައްސަލާގައި އެމްޑީޕީގެ ޕާލަމެންޓްރީ ގުރޫޕުން މިހާރު ވެސް ވަނީ އެކި ފަހަރުގެ މަތިން ފިޔަވަޅު އަޅައިފަ އެވެ. ޕީޖީން މިހާރު އަންނަނީ އަޅާ ފިޔަވަޅުތައް އިތުރަަށް ހަރުކަށިކޮށް، އެމްޑީޕީގެ އެތެރޭގެ އިންތިހާބުތަކުގައި ވާދަ ނުކުރެވޭ ގޮތް ހަދަން ވެސް މަސައްކަތް ކުރަމުންނެވެ.

ނަޝީދުގެ "ފިކުރެއްގެ ދިރުން" ފެކްޝަން އެމްޑީޕީގެ ރިޔާސީ ޕްރައިމަރީ ނާކާމިޔާބުވުމަށް ފަހު ދަނީ އިންތިހާބުގައި ރައީސް އިބްރާޙިމް މުހައްމަދު ސޯލިހާ ދެކޮޅަށް މަސައްކަތް ކުރަމުންނެވެ.