ކ. މަޑިވަރުގައި ރިސޯޓެއް ތަރައްގީ ކުރަމުންދާ ދޮންކެޔޮ އެންޓަޕްރައިސަސް އަށް ނޭނގި ސަލްޓަންސް ކުންފުނިން ފައިސާ ޚަރަދު ނުކުރުމަށާއި ބޯޑް ރިޒޮލިއުޝަންތައް ފާސް ނުކުރަން ސިވިލް ކޯޓުން އަންގައިފި އެވެ.
ކޯޓުން މިމަހުގެ 11 ވަނަ ދުވަހު މިގޮތަށް އެންގީ ސަލްޓަންސްގެ ހިއްސާ ބަދަލުކުރި މައްސަލައެއްގައި ދޮންކެޔޮ އެންޓަޕްރައިސަސް އިން ދައުލަތާ ދެކޮޅަށް ކުރާ ދައުވާގަ އެވެ.
ސަލްޓަންސްގައި ދޮންކެޔޮ އެންޓަޕްރައިސަސްގެ 50 ޕަސެންޓް ހިއްސާ އޮއްވައި އިކޮނޮމިކް މިނިސްޓްރީން މިދިޔަ އަހަރު ވަނީ އެކަން ބާތިލްކޮށްފަ އެވެ. އެހެންވެ އެ މައްސަލާގައި ދޮންކެޔޮ އެންޓަޕްރައިސަސް އިން ދައުލަތާ ދެކޮޅަށް ދައުވާކުރީ އެވެ.
ގާޒީ އަބްދުއްނާސިރު ޝަފީގުގެ އެންގުމުގައި ވަނީ ހުށަހަޅާފައިވާ މައްސަލަ ނިމެންދެން، ދޮންކެޔޮ އެންޓަޕްރައިސަސްގެ ހިއްސާދާރުންނަށް ނޭނގި ސަލްޓަންސް އިން އެއްވެސް ފައިސާއެއް ޚަރަދު ނުކުރުމަށާއި އަދި ބޯޑް ރިޒޮލިއުޝަންތައް ފާސް ނުކުރުމަށެވެ.
ސަލްޓަންސްއަކީ ބިލިއަނަކާ ގާތްކުރާ އަދަދުގެ ދަރަނި އެ ކުންފުނީގެ މައްޗަށް ސާބިތުވެ، ޝަރުއީ އެކި މަރުހަލާތަކުގައި މައްސަލަ ހިނގަމުންދާ ކުންފުންޏެކެވެ. އެ ކުންފުންޏަކީ ޑީއާރުޕީގެ ކުރީގެ ލީޑަރު އަހުމަދު ތަސްމީނު އަލީގެ އާއިލީ މަސްލަހަތު އޮންނަ ކުންފުންޏެކެވެ.