އާޒިމްގެ ތިން އަހަރު: އެމްޓީސީސީ ހަ ގުނަ އަށް ފުޅާވެއްޖެ!

އެމްޓީސީސީ ހިންގެވުމާ އާދަމް އާޒިމް ހަވާލުވެ ވަޑައިގަތްއިރު، އެ ކުންފުނި އޮތީ ވަރަށް ނާޒުކު ފައްތަރެއްގަ އެވެ. އޭރު ކުންފުނި އޮތީ ވަރަށް ބޮޑަށް އަޑިއަޅާލައި، ގެއްލުންތަކެއްގެ ތެރޭގަ އެވެ. އެކަމަކު، އެ ކުންފުންޏާ ހަވާލުވެވަޑައިގެން އާޒިމް މަސައްކަތް ފެއްޓެވީ ވަރަށް ބޮޑު އުންމީދަކާ އެކު އެވެ. މަގާމާ ހަވާލުވެ ވަޑައިގަތްތާ އަހަރެއްވި އިރު، އެމްޓީސީސީ ދައްކަމުން އައީ މުޅިން ތަފާތު މަންޒަރެކެވެ. ފައިދާވާ ކުންފުންޏަކަށް އެ ކުންފުނި ބަދަލުކޮށް، ރާއްޖޭގެ އެންމެ ބިޒީ ކުންފުންޏަކަށް އެމްޓީސީސީ ބަދަލުވި އެވެ.

އެމްޓީސީސީގެ ހަޔާތުގައި މިހާތަނަށް ދުވަހަކު ވެސް ތަޖުރިބާކޮށްފައި ނުވާ ދުވަސްތަކެއް، ވޭތުވެދިޔަ ތިން އަހަރު އެ ކުންފުނިން ދެކެފި އެވެ. އާޒިމްގެ މޭސްތިރިކަމުގައި ވޭތުވެދިޔަ ތިން އަހަރުގެ ތެރޭ އެ ކުންފުނިން ވަނީ 11 ދުވަހުން ޕްރޮޖެކްޓެއް ނިންމައިފަ އެވެ.

އެންމެ 25 ޕްރޮޖެކްޓް ހިންގަމުން އައި އެ ކުންފުނިން، މިހާރު އެއް ފަހަރާ 140 ޕްރޮޖެކްޓް އެބަ ހިންގަ އެވެ. ގެއްލުމުގައި ހިންގި އެ ކުންފުންޏަކަށް ވޭތުވެދިޔަ ތިން އަހަރު ވެސް، އެވްރެޖުކޮށް 200 މިލިއަން ރުފިޔާގެ ފައިދާއެއް ލިބުނެވެ.

ސިއްރަކީ ކޮބައިހެއްޔެވެ؟ -- މިއީ އާޒިމްގެ ޖަވާބުތަކެވެ.

އާޒިމް: އަޅުގަނޑު އަބަދު ވެސް މި ގެންގުޅެނީ "ޕީޕަލް ފަސްޓް" އެޕްރޯޗެއް. ފުރަތަމަ ވެސް މުވައްޒަފުންނަށް ރަނގަޅު ގޮތްތައް ހޯދައިދީ، މުވައްޒަފުން ބޭނުންވާ ކަންކަން މިކޮށްދެނީ. އެއީ އަބަދުވެސް ކުރާ ކަމަކީ. ފުރަތަމަ ވެސް މުވައްޒަފުންނަށް ރަނގަޅު ވޯކިން އެންވަޔަރުމަންޓެއް ދީ، މުވައްޒަފުންގެ މުސާރަތައް ރަނގަޅުކޮށްދީ، މުވައްޒަފުންނަކީ ގާބިލް، ޑިސިޕްލީން ބަޔަކަށް ހަދަން މަސައްކަތް ކުރަނީ. އެއީ ފުރަތަމަ ބިންގާ އަޅާ ހިސާބަކީ ވެސް.

އެއީ އަޅުގަނޑު ގަބޫލު ކުރަނީ ކުންފުންޏަކީ މުވައްޒަފުން ކަމަށް. މިކަންކަން ނުކޮށްދީ ކުންފުންޏެއް ކުރިއަކަށް ނުގެންދެވޭނެ. ކަންކަން ހިންގުމުގައި ކާމިޔާބު ލިބޭ ސަބަބަކީ މި އެޕްރޯޗު ގެންގުޅޭތީ. އަޅުގަނޑު ކައިރީ އުޅޭ ހުރިހާ އެންމެންނަކީ އަޅުގަނޑަށްވުރެ މާ މޮޅު، ހަވާލުވި އިރަށް ވުރެ މާ މޮޅު ބަޔަކަށް ހަދައިދޭން މަސައްކަތް ކުރަނީ.

އަޅުގަނޑު ގަބޫލެއް ނުކުރަން އެއްވެސް ކަމެއް، އެއީ ކުރަން ޖެހޭ ކަމަކަށް ވާ ނަމަ އެކަމުގައި އުނދަގުލެއް ހުންނާނެ ކަމަކަށް. އަޅުގަނޑު ހަވާލުވި އިރު މިތަނަކީ 1،500 މުވައްޒަފުން ތިބި ތަނެއް. މިހާރު މިތަނުގެ މުވައްޒަފުންގެ އަދަދަކީ 4،200 މީހުން. މި ހުރިހާ މުވައްޒަފުންނަކީ ވެސް ކޮންމެވެސް ކަހަލަ ޓްރެއިނިންއެއް ލިބިފައި ތިބި ބަޔެއް މިއަދު މިތަނުގައި ތިބޭނީ.

އަޅުގަނޑު ގަބޫލުކުރާ ގޮތުގައި ކޮންމެ މުވައްޒަފަކީ ވެސް އާދަޔާ ހިލާފަށް މުހިއްމު މުވައްޒަފެއް.

އަޅުގަނޑު ދެކޭ ގޮތުގައި ކުންފުނީގެ އެންމެ އާދައިގެ މުވައްޒަފުންނަށް އެންމެ ރަނގަޅަށް ކަންތައް ކުރެވޭ ހިސާބަށް ގެންދެވޭ ވަގުތަކީ، ކުންފުނި އެންމެ މައްޗަށް ދާ ގަޑި. އެ ހިސާބަށް ނުގެންދެވޭ ނަމަ ކުންފުނި އަދި ރަނގަޅަށް ނުހިންގެނީ. މިދިޔަ އަހަރު އެކަނި ވެސް 16،000 ގަޑިއަށް ވުރެ އިތުރަށް މުވައްޒަފުންނަށް ޓްރެއިނިން ދީފައިވާނެ. މިދިޔަ އަހަރު އެކަނި 15 މުވައްޒަފަކަށް ޔޫރަޕްގެ ގައުމުތަކުން ސްކޮލާޝިޕް ދީފައި ހުންނާނެ. މި އަހަރު އިތުރު 10 މުވައްޒަފަކަށް ސްކޮލާޝިޕް ދޭން މިހާރު ރެޑީ ވަނީ.

ސްލިކްޑް މުވައްޒަފުން ހޯދުމަކީ އެހާ ފަސޭހަ ކަމެއް ނޫން. އެހެންވެ، ސްކިލް ޑިވެލޮޕް ކުރަން ވެސް އަޅުގަނޑުމެން މަސައްކަތަކެއް ކުރަން. އަޅުގަނޑުމެން އިޝްތިހާރުތައް ޖަހައިގެން ވެސް މީހުން ނުލިބިގެން ބޭރުން މީހުން އެބަ ގެންނަން ޖެހޭ. އެދޭ ގޮތެއް ނޫން، އެކަމަކު ތަރައްގީ ވަމުން އަންނަ ގައުމަކަށް ވާތީ ގިނަ މަސައްކަތް ކުރަން އެބަހުރި. މަސައްކަތް ލަސް ކުރެވޭކަށް ނެތް.

ކުރިއަށް އޮތް ދެތިން މަސް ތެރޭ ވެސް 400 ގާތް ކުރާ އަދަދެއްގެ އިތުރު މުވައްޒަފުން ނަގަން ޖެހޭނެ. އޭރުން ހަވާލުވެ ހުރި މަސައްކަތްތައް ބާރަށް ކުރިއަށް ގެންދެވޭނީ.

ސްކިލްޑް ވަޒީފާތައް ނޫން، އެޑްމިނިސްޓްރޭޓިވް ވަޒީފާތަކަށް ހުޅުވާލުމުން އެއް ވަޒީފާ އަށް 300 އަށް ވުރެ ގިނަ އެޕްލިކޭޝަން ވެސް ލިބިފައި އެބަހުރި. އެހެންވީމަ ފުދޭ ވަރަކަށް ޑިމާންޑް ބޮޑު އެމްޓީސީސީގެ ވަޒީފާތަކަށް. ސްކިލްޑް ވަޒީފާތަކަށް މީހުން ނުލިބެނީ. އެފަދަ ވަޒީފާތަކަށް ޝައުގުވެރިކަން ކުޑަ.

އަޅުގަނޑު އެންމެ އިސްކަމެއް ދެނީ އަޅުގަނޑު އެ ހުންނަ ތަނެއްގައި ހުރެފައި ދާއިރު އެތަނަކީ އަޅުގަނޑު ހަވާލުވި އިރަށް ވުރެ މާ ވަރުގަދަ، މާ ބޮޑު ތަނަކަށް ހަދައިދީފައި ދާން. އަޅުގަނޑު ބަލަން މަސައްކަތް ކުރާ އެންމެންނަކީ ގާބިލް މީހުންނަށް ހެދޭތޯ. އޯގާތެރިކޮށް ކަންކަން ކޮށްދެވޭތޯ.

އެމްޓީސީސީގެ މުވައްޒަފަކަށް އޮންނަ އުސޫލުގެ ތެރެއިން ކުރެވޭ އެއްވެސް ކަމެއް ނޯންނާނެ ނުކޮށްދީއެއް. އެހެންވީމަ މުވައްޒަފަކަށް ނުކޮށްދީ ނޯންނާނެ އެއް ކަމެއް ވެސް. އެއީ ކަންނޭނގެ އަޅުގަނޑާ މުވައްޒަފުންނާ ގާތް ގުޅުމެއް އުފެދޭ އެއް އެއް ސަބަބަކީ.

މި ސަރުކާރުން އެމްޓީސީސީއާ ހަވާލުކުރެވިގެން މި ވަގުތު ވެސް އަޅުގަނޑުމެން އެބަ ކުރިއަށް ގެންދަން 140 ޕްރޮޖެކްޓް. އަޅުގަނޑު ހަވާލުވި އިރު ގާތްގަނޑަކަށް 25 ޕްރޮޖެކްޓް މިތަނުގައި ކުރިއަށް ގެންދިޔައީ. މިއީ ފަސޭހަވެގެން ކުރާ ކަމެއް ނޫން. އުނދަގޫ މަސައްކަތްތަކެއްކަން އެނގިތިބެ މި ކުރަނީ.

އަޅުގަނޑުމެންގެ އަމާޒަކީ ގައުމު ތަރައްގީ ކުރަން ލިބުނު ފުރުސަތުގައި ވީހާ ވެސް ބާރަކަށް މަސައްކަތްތަކެއް ކޮށް ރައްޔިތުންނަށް ބޭނުންވެފައި ހުރި ކަންތައްތައް ވީ އެންމެ އަވަހަކަށް ހައްލު ކޮށްދިނުން. އެމްޓީސީސީގެ އަމާޒަކަށް ހެދީ ހަވާލު ކުރާ ކަންކަން ވީ އެންމެ އަވަހަށް ނިންމުން. އެންމެ ރަނގަޅު މީހުންނާއި އިކުއިޕްމެންޓާއި ރޭވުންތެރިކަން ބޭނުންކޮށްގެން މަސައްކަތްތައް ތަރުތީބުކޮށްގެން ކުރިއަށް މި ގެންދަނީ. އަދި މުވައްޒަފުންގެ ކަންކަން ނިންމަން ރެއާ ދުވާލު މަސައްކަތް ކުރާތީ މިކަންކަން މިވަނީ.

އަޅުގަނޑު އެންމެ ފުރަތަމަ އެމްޓީސީސީއާ ހަވާލުވި އިރު މިތަނުގެ އެކްސްކޯ ބައެއް ބޭފުޅުން ވިދާޅުވި އެމްޓީސީސީ އަށް ކުރެވޭނީ އެއް ބިލިއަން ރުފިޔާގެ މަސައްކަތޭ. އެއަށް ވުރެ ގިނައިން މަސައްކަތެއް ނުކުރެވޭނެއޭ.

މިދިޔަ ތިން އަހަރު އަޅުގަނޑުމެން އެބަ މަސައްކަތް ކުރަން ކޮންމެ އަހަރަކު އެވްރެޖުކޮށް 2.2 ބިލިއަން ރުފިޔާގެ މަސައްކަތް. އޭގެ ކުރީގައި ހާސިލުނުވާ އާމްދަނީ ތިން އަހަރުން ހޯދިއްޖެ. މިތަނުގައި ގަބޫލު ކުރަނީ އެމްޓީސީސީ އަށް ފައިދާ ވާނީ 100 މިލިއަން ރުފިޔާއަށް ވުރެ ދަށުންނޭ. މިދިޔަ ތިން އަހަރު ކޮންމެ އަހަރަކު 200 މިލިއަން ރުފިޔާގެ ފައިދާގައި އަހަރު ނިންމީ.

މީހުން ތިބެނީ މަސައްކަތް ކުރާ ހިތުން. އެކަމަކު މަގު ދައްކާ. ވިޝަންއެއް ހުރެގެން މަސައްކަތް ކުރާނެ ޓީމެއް އުފެއްދިއްޖެ ކަަމަށް އަޅުގަނޑު ގަބޫލު ކުރަނީ. މިހާރު އެންމެން ގަބޫލު ކުރޭ އެމްޓީސީސީއަކީ ކަންތައްތައް ކުރެވޭ، ކަންތައްތައް ކުރާނެ ބައެއް ކަން. އަދި އެކަން ދަމަހައްޓަން މާ ގިނަ މަސައްކަތް ކުރަން ޖެހޭ.

ކުދި ކަންކަން ކޮށްގެން ތިބޭކަށް އަޅުގަނޑުމެން ބޭނުމެއް ނޫން. އަޅުގަނޑުމެން ބޭނުންވަނީ ބޮޑެތި ޕްރޮޖެކްޓްތައް ހިންގާ ފެންވަރުގެ ކުންފުންޏަކަށް ހަދަން. ދިވެހި ރާއްޖޭގައި އުމްރާނީ ތަރައްގީގެ ބޮޑެތި ޕްރޮޖެކްޓްތައް ހިންގާ ކުންފުންޏަކަށް އެމްޓީސީސީ ހެދުމަކީ އަޅުގަނޑުގެ ހުވަފެން. އަޅުގަނޑުމެންގެ އަމާޒު.