ވެސްޓްމިންސްޓާ (މެއި) - ދުނިޔޭގެ އެންމެ ދުވަސްވީ ޝާހީ ވެރިކަން، ޔުނައިޓެޑް ކިންގްޑޮމްގެ ޝާހީ ރަސްކަމަށް، އިއްޒަތާއި ޝަރަފާ އެކު ޗާލްސް ފިލްޕް ޖޯޖް (ޗާލްސް 3) ރަސްމީކޮށް މިއަދު ވަޑައިގެންފި އެވެ.
ޗާލްސްގެ އަނބިކަނަބަލުން ކަމީލާ އަށް ވަނީ ރާނީގެ ޝަރަފު ވެސް ރަސްމީ އިއްޒަތުގައި މިއަދު އަރުވައިފަ އެވެ. އިނގިރޭސި އެންމެ ތާރީހީ ސިޓީ ވެސްޓްމިންސްޓާސްގައި ބޭއްވި ރަސްމިއްޔާތަށް 2،200 އިއްޒަތްތެރިން ވަޑައިގެންނެވި އެވެ. އެއީ ކުރިން ޝާހީ ތަހުތުގައި އިންނެވި ޗާލްސްގެ މަންމާފުޅު ރާނީ އެލިޒަބަތު 1953 ގައ ތަހުތަށް ވަޑައިގަތުމަށް ބޭއްވި ޝާހީ ރަސަމިއްޔާތަށް ވަޑައިގެންނެވި އިއްޒަތްތެރިންނަށް ވުރެ މަދު އަދަދެކެވެ. އެލިޒަބަތު ޝާހީ ތަހުތަށް ވަޑައިގަތުމަށް ބޭއްވި ރަސްމިއްޔާތަށް 8،000 އިއްޒަތްތެރިން ވަޑައިގަތެވެ.
އިނގިރޭސި ދިފާއީ ވުޒާރާއިން ބުނީ ޗެލްސް ރަސްކަމާ ހަވާލުވެވަޑައިގަތުމުގެ މުނާސަބަތުގައި 1.42 މޭލު ސަރަހައްދެއްގައި އަސްކަރީ ހެވިކަމާއި ހުނަރު ދައްކާލުމުގެ ހަރަކާތް އޮންނާނެ ކަމަށެވެ.
ޗާލްސްގެ ޝަރަފުގައި ބޭއްވި ރަސްމިއްޔާތުގެ ބައެއް މައުލޫމާތު:
- 19 މިލިޓަރީ ބޭންޑް.
- ކޮމަންވެލްތުގެ 33 ގައުމެއްގެ މަންދޫބުން.
- 250 އަސް.
- 4،000 އަސްކަރީ އޮފިޝަލުން
"މިއީ 70 އަހަރުގެ ތެރޭގައި ކުރިއަށް ގެންދާ އެންމެ ފުރިހަމަ އަސްކަރީ ހުނަރު ދައްކާލުމުގެ ހަރަކާތް،" އެ ގައުމުގެ ދިފާއި ވުޒާރާއާ ހަވާލާދީ އިނގިރޭސި މީޑިއާތަކުން ބުންޏެވެ.
ރަސްކަމަށް ޗާލްސް ވަޑައިގަތުމުގެ ހަފުލާ ވެސްޓްމިންސްޓާގައި އަމާންކަމާ އެކު ކުރިއަށް ގެންދިޔަ ނަމަވެސް ލަންޑަންގައި އިނގިރޭސި ރަސްކަމާ ދެކޮޅު މީހުން ނުކުމެ މުޒާހަރާ ވެސް ކުރި އެވެ، އިނގިރޭސި މީޑިއާތަކުން ރިޕޯޓްކޮށްފައިވާ ގޮތުގައި އިނގިރޭސި ވިލާތް ޖުމްހޫރީ ދައުލަތަކަށް ބަދަލު ކުރުމަށް ކޭމްޕޭން ކުރާ ހަރަކާތުގެ އިސް ލީޑަރު ވަނީ ހައްޔަރުކޮށްފަ އެވެ.
"ރިޕަބްލިކް" ގެ ނަމުގައި ހަރަކާތްތެރިވާ އެކްޓިވިސްޓުން ވަނީ ރީނދޫ ދިދަތައް ހިފައިގެން ނުކުމެ ޗާލްސް އާއި އިނގިރޭސީ ޝާހީ ރަސްކަމާ ދެކޮޅަށް އަޑު އުފުލައިފަ އެވެ. ރިޕަބްލިކްގެ ޗީފް އެގްޒެކެޓިވް ގްރަހަމް ހައްޔަރު ކުރީ ޗާލްސްއާ ދެކޮޅަށް މަގުމަތީ ހަރަކާތުގައި އުޅެނިކޮށެވެ.
ރިޕަބްލިކްގެ ޑައިރެކްޓާ ހެރީ ސްޓްރެޓަން، ބުނީ އެ ހަރަކާތުގައި ބޭނުންކުރި ވޭނެއް ވެސް ފުލުހުން ބަލައި ފާސްކުރި ކަމަށާއި އަދި އެ ގުރޫޕްގެ އިތުރު ހަ އެކްޓިވިސްޓަކު ވެސް ހައްޔަރު ކުރި ކަމަށެވެ.
އިނގިރޭސި ވިލާތުގެ ޝާހީ ވެރިކަމުގެ ދަަށުގައި އޮންނަ ވޭލްސްގެ ކާޑިފްގެ މަގުތަކަށް ރިޕަބްލިކްގެ މެންބަރުން ނުކުތީ "އަހަރެންގެ ރަސްގެފާނު" ނޫން ކަމަށް ބުނެ އަޑު އުފުލުމަށެވެ. އެކަމަކު ވޭލްސް އިން މީހަކު ހައްޔަރުކޮށްފައެއް ނުވެ އެވެ.