ސ. ގަން އެއާޕޯޓު ތަރައްގީ ކުރުމުގެ އަމަލީ މަސައްކަތް ރައީސް ފައްޓަވައިދެއްވައިފި

ގަން އިންޓަނޭޝަނަލް އެއާޕޯޓް (ޖީއައިއޭ) ބޮޑުކުރުމުގެ އަމަލީ މަސައްކަތް ރައީސް އިބްރާހިމް މުހައްމަދު ސޯލިހް މިއަދު ރަސްމީކޮށް ފައްޓަވައި ދެއްވައިފި އެވެ.

އެ މަޝްރޫއު ފައްޓަވައިދެއްވީ ގަމުގައި ބޭއްވި ރަސްމިއްޔާތެއްގަ އެވެ. އެ ރަސްމިއްޔާތުގައި ރައީސްގެ އަރިހުގައި އިންޑިއާގެ މިނިސްޓަ އޮފް ސްޓޭޓް ފޯ އެކްސްޓާނަލް އެފެއާޒް ވީ. މުރަލީދަރަން ބައިވެރިވެވަޑައިގެންނެވި އެވެ.

ގަން އެއާޕޯޓް ތަރައްގީ ކުރަން އިންޑިއާގެ ރެނާޓާސް ކުންފުންޏާ ހަވާލުކޮށްފައި ވަނީ މިދިޔަ މާޗް މަހު އެވެ. އެ ގައުމުގެ އެގްޒިމް ބޭންކުގެ ލައިން އޮފް ކްރެޑިޓްގެ ދަށުން ހިންގާ މަޝްރޫއަށް އެގްޒިމް ބޭންކުން ދޫކުރަނީ 800 މިލިއަން ޑޮލަރުގެ ލޯނެކެވެ.

އެ މަޝްރޫއުގެ ދަށުން ޑިއުޓީ ފްރީ ފިހާރަތަކާއި ރެސްޓޯރެންޓްތަކާއި ލައުންޖް ވަސީލަތްތަކުގެ އިތުރުން އާ ކޮންޓްރޯލް ޓަވަރަކާއި ފަޔާ ސްޓޭޝަނެއް ވެސް ގާއިމުކުރާނެ އެވެ.

އެއާޕޯޓަށް ބޭނުންވާ ކޯލްޑް ސްޓޯރޭޖާއެކު ޒަމާނީ ކާގޯ ވަސީލަތްތަކާއި އެއާޕޯޓުގެ މަގުތަކާއި ޕާކިން ސަރަހައްދެއް ވެސް ހަދާނެ އެވެ.

އެ މަޝްރޫއު ނިމޭއިރު ޕަސިންޖަރުންނަށް ހިދުމަތް ދިނުމަށް އެއާޕޯޓްގައި 18 ކައުންޓަރު ހަދާނެ އެވެ. އޭގެ އިތުރުން އަހަރަކު 1.5 މިލިއަން ފަސިންޖަރުންނަށް ހިދުމަތް ދެވޭ ފެންވަރުގެ ޓާމިނަލެއް ހުންނާނެ އެވެ.

"ސަރަހައްދީ އިގްތިސޯދީ ނާރެެހެއްގެ ގޮތުގައި އައްޑޫ ސިޓީ ތަރައްގީ ކުރުމަކީ މުޅި ރާއްޖޭގެ ތަރައްގީ ބޭނުން ނަމަ ކޮންމެހެން ކުރަންޖެހޭ ކަމެއް. އަޅުގަނޑުމެން މި ކުރަނީ އެ މަސައްކަތް. މި ދެންނެވި މަގްސަދު ހާސިލް ކުރުމަށްޓަކައި ކުރަންޖެހޭ ކަންކަމުގެ ލިސްޓުގެ ނަމްބަރު އެކެއްގައި އެ ވަނީ ގަން އިންޓަނޭޝަނަލް އެއާޕޯޓް،" ގަން އިންޓަނޭޝަނަލް ބޮޑުކުރުމުގެ މަޝްރޫއު ރަސްމީކޮށް ފެށުމުގެ ހަފުލާގައި ރައީސް އިބްރާހިމް މުހައްމަދު ސޯލިހު ވިދާޅުވި އެވެ.

Gan International Airport bodukurun India ge Renaatus ah

The most trusted news source in the Maldives

Mihaaru

ގަން އެއާޕޯޓްގެ ތަރައްގީއާ އެކު، އައްޑޫގެ ޓުއަރިޒަމް ބެޑް ކެޕޭސިޓީ އިތުރުކުރުމަށް ގިނަ މަސައްކަތްތަކެއް ކުރަމުން އަންނަ ކަމަށް ވެސް ސަރުކާރުން ވަނީ ބުނެފަ އެވެ. އެގޮތުން 2082 އެނދުގެ އިންޓަރގްރޭޓަޑް ޓުއަރިޒަމް މަޝްރޫއެއްގެ ގޮތުގައި ހަންކެޑެ ތަރައްގީ ކުރުމަށްޓަކައި ކޮންޓްރެކްޓަރާ އެކުގައި މިދިޔަ މާޗް މަހުގައި ވަނީ ސޮއިކޮށްފަ އެވެ.

ޓޫރިޒަމަށް އަމާޒު ކޮށްގެން ފަސް ރަށެއް ހިއްކުމުގެ މަސައްކަތް އައްޑޫގެ ބިން ހިއްކުމުގެ މަޝްރޫއުގެ ތެރެއިން ކުރާ ކަމަށް ސަރުކާރުން ބުނެ އެވެ.

އެގޮތުން ގެސްޓް ހައުސް ހެދުމަށް އައްޑޫން ބިން ދޫކޮށްފައިވާ ފަރާތްތަކަށް އެކަމަށް ބޭނުންވާ ލޯނު ލިބޭނެ އިންތިޒާމްތައް ހަމަޖެއްސުމުގެ މަސައްކަތް ކުރެވެމުންދާ ކަމަށް ރައީސް އިބްރާހިމް މުހައްމަދު ސޯލިހު ވިދާޅުވީ އިއްޔެ އެވެ.