އަންނަ ސެޕްޓެމްބަރު މަހު ބާއްވާ ރިޔާސީ އިންތިހާބަށް އެމަނިކުފާނު ހެއްދެވި ކޯލިޝަނަކީ މިހާތަނަށް ރާއްޖޭގައި ހެދި އެންމެ ބޮޑު ކޯލިޝަން ކަމަށް ރައީސް އިބްރާހިމް މުހައްމަދު ސޯލިހު މިއަދު ވިދާޅުވެއްޖެ އެވެ.
އެމްޑީޕީން ރިޔާސީ އިންތިހާބުގެ ކެމްޕެއިނަށް ތައްޔާރުވުމުގެ ގޮތުން މިއަދު އިއްޒުއްދީން ސްކޫލް ހޯލުގައި ބޭއްވި މޮޓިވޭޝަނަލް ސެޝަންއަށްފަހު ރައީސް ވިދާޅުވީ އެމަނިކުފާނުގެ ކޯލިޝަންގައި 77،700 މެމްބަރުން މިހާރު އެބަ ތިބި ކަމަށެވެ. އެއީ ކޯލިޝަންގައި ހިމެނޭ ޕާޓީތަކުގެ މެމްބަރުންގެ ޖުމްލަ އަދަދެވެ.
މިއީ މިހާތަނަށް ރާއްޖޭގައި ނުކުންނަ މެމްބަޝިޕް އެންމެ ބޮޑު ކޯލިޝަން: ރައީސް
އަންނަ ރިޔާސީ އިންތިހާބަށް އެމްޑީޕީން ވަނީ އަދާލަތު ޕާޓީ އާއި މޯލްޑިވްސް ޑިވެލޮޕްމަންޓް އެލަޔަންސް (އެމްޑީއޭ) އާއެކު ކޯލިޝަން ހަދައިފަ އެވެ.
"މިއީ މިހާތަނަށް ރާއްޖޭގައި ނިކުންނަ މެމްބަޝިޕް އެންމެ ބޮޑު ކޯލިޝަން،" ރައީސް ވިދާޅުވި އެވެ.
އެމްޑީޕީއާ އެކު ކޯލިޝަންގައި ހިމެނޭ އެހެން ޕާޓީތަކުން ވެސް ރައީސް އިބްރާހިމް މުހައްމަދު ސޯލިހުގެ ރިޔާސީ ކެމްޕޭން މިހާރު ވަނީ ފަށައިފަ އެވެ. އެގޮތުން އެމަނިކުފާނަށް ތާއީދު ހޯދުމަށް މާލެ އާއި ރަށްރަށުގައި ކެމްޕެއިން ހަރަކާތްތައް ދަނީ ބާއްވަމުންނެވެ.
މި ސަރުކާރު ހިންގާ ކޯލިޝަންގައި ހިމެނޭ ޖުމްހޫރީ ޕާޓީން މި އިންތިހާބުގައި ރައީސްއާ އެކު މަސައްކަތް ކުރަން ދިން ދައުވަތު ގަބޫލު ނުކޮށް، އިންތިހާބުގައި ވަކިން ވާދަކުރަން ވަނީ ނިންމައިފަ އެވެ.
ރައީސް ދެވަނަ ދައުރަކަށް ކެމްޕޭން ފެށްޓެވިއިރު، އުފެދުނު ހިޔާލު ތަފާތުވުންތަކަށް ފަހު އެމްޑީޕީގެ ރައީސް މުހައްމަދު ނަޝީދު އެ ޕާޓީން ވަކިވެ ވަޑައިގެން އަދި އެމަނިކުފާނު ފަޅީގައި ތިއްބެވި މެމްބަރުން ވަނީ ދަ ޑިމޮކްރެޓްސްގެ ނަމުގައި އާ ޕާޓީއެއް އުފައްދައިފަ އެވެ. އެ ޕާޓީން ވެސް ރިޔާސީ ކެންޑިޑޭޓަކު ނެރޭނެ ކަން އޮތީ އިއުލާންކޮށްފަ އެވެ.
އެމްޑީޕީން ބަޔަކު ވަކިވިޔަސް އަދި ޖޭޕީން ވަކިން ރިޔާސީ އިންތިހާބުގައި ވާދަކުރިޔަސް، މި އިންތިހާބު އެއް ބުރުން ކާމިޔާބުކުރެވޭނެ ކަަމަށް އެމްޑީޕީގެ ލީޑަޝިޕްގެ ބޭފުޅުން ވިދާޅުވެ އެވެ.