ވެރިކަމުގައި ތިބެ މުޒާހަރާކުރަން ނިކުންނަ ހިސާބަށް ކަންކަން ދާ ނަމަ ރައްޔިތުން އެކަމާ ވިސްނަން ޖެހޭ ކަމަށް ރައީސް އިބްރާހިމް މުހައްމަދު ސޯލިހު މިއަދު ވިދާޅުވެއްޖެ އެވެ.
ކ އަތޮޅުގެ ގުޅިއަށް ކުރެއްވި ކެމްޕެއިން ދަތުރުފުޅުގައި ރައީސް އިބްރާހިމް މުހައްމަދު ސޯލިހު ވިދާޅުވީ، ސަރުކާރުން އެންމެ ބޮޑު އިސްކަމެއް ދެނީ، ރައްޔިތުންނަށް އަމާން ރާއްޖެއެއް ގެނެސްދިއުމަށް ކަމަށެވެ. އެމަނިކުފާނު ވިދާޅުވީ، ރައްޔިތުންނަށް ހަލަބޮލިކަން ގެނައުމަކީ އެމްޑީޕީގެ ސިޔާސަތެއް ނޫން ކަމަށެވެ.
ރައީސް ވިދާޅުވީ، ގައުމުގެ އަމާންކަން ބަލަހައްޓަން ފުލުހުންނާއި ސިފައިން އެބަ ތިބި ކަމަށެވެ.
"ސަރުކާރުގައި ތިބެ ނުޖެހޭނެ އެގޮތަށް ކަންތައް [މުޒާހަރާ] ކުރާކަށް. އެ ތާރީހު ވެސް އަޅުގަނޑުމެންނަށް މާޒީވެ ހިނގައްޖެ. ދެން އައިސް ރާއްޖޭގެ ސިޔާސީ މަސްރަހު ބަދަލުވި ގޮތް ތިޔަބޭފުޅުންނަށް ފެނިވަޑައިގަންނަވާނެ،" ރައީސް ވިދާޅުވި އެވެ.
މިގޮތަށް މުޒާހަރާ ކުރަން ނުކުތީ ކޮން ބައެއް ކަމެއް ރައީސް ވިދާޅުނުވި ނަމަވެސް، އެމްޑީޕީން މިހާރު ވަކިވެވަޑައިގެންފައިވާ ކުރީގެ ރައީސް މުހައްމަދު ނަޝީދުގެ ވެރިކަމުގައި އޭރު ސަރުކާރު ހިންގި މައި ޕާޓީ އެމްޑީޕީން ވަނީ ސަރުކާރާ ދެކޮޅަށް މުޒާހަރާކޮށްފަ އެވެ.
ރައީސް ވިދާޅުވީ، މިދިޔަ ސަރުކާރުގައި ސިޔާސީ ފަރާތްތަކުން ތިބެން ޖެހުނީ ޖަލުގައި ކަމަށާއި އެ އުނދަގޫ ހާލަތުން ރާއްޖެ ސަލާމަތް ކުރެވި، މިހާރު އަމާން ބަނދަރަށް އާދެވިއްޖެ ކަމަށެވެ. އަދި ދެވަނަ ދައުރަކަށް ނުކުތީ ރައްޔިތުންނަށް ވެފައިވާ ވައުދުގެ 90 ޕަސެންޓު ފުއްދާފައި ކަމަށް ވިދާޅުވި އެވެ.
ރައީސް ވިދާޅުވީ، ރައްޔިތުންނަށް މުހިއްމީ ތަރައްގީ އާއި އަމާން ކަން ކަމަށާއި އެކަން އެމަނިކުފާނުގެ ވެރިކަމުގައި ގެނެސް ދެއްވާ ކަމަށެވެ.
