ހިމަ ބިހި ޖެހިފައިވާ އިތުރު މީހެއް، ކުރީ ކޭސްއާ ގުޅުމެއް ނެތް

ރާއްޖެއިން ނައްތާލާފައިވާ ހިމަބިހީގެ އިތުރު ކޭސްއެއް ރިޕޯޓު ކޮށްފައިވާ ކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ބުނެފި އެވެ.

އެޗްޕީއޭއިން ބުނީ ހިމަބިހި ޖެހިފައި ހުރި މީހަކު ފެނުނީ އިއްޔެ ކަމަށާއި އެ މީހާ އަކީ ރާއްޖެއިން ބޭރުން ބަލި ޖެހިގެން އައި މީހެއް ކަމަށެވެ.

އެ މީހާގެ ފަރާތުން ބަލި އިތުރަށް ފެތުރުމުގެ ފުރުސަތު އޮތީ ކިހާ މިންވަރަކަށްތޯ ބެލުމަށްޓަކައި އޭނާއާ ބައްދަލުވެފައިވާ މީހުންގެ މައުލޫމާތު ހޯދުމަށް މަސައްކަތް ކުރަމުންދާ ކަމަށް ވެސް އެޗްޕީއޭން ބުންޏެވެ.

މީގެ އިތުރުން އެޗްޕީއޭން ބުނީ ވެކްސިން ނުޖަހާ މީހުން ދެނެގަނެ އެމީހުންނަށާއި ބަލި ޖެހިފައިވާ މީހާ ދިރިއުޅޭ ސަރަހައްދުގައި ދިރިއުޅޭ މީހުންނަށް ވެކްސިން ޖެހުމުގެ މަސައްކަތް ކުރާނެ ކަމަށެވެ.

ނަމަވެސް، އިއްޔެ ފެނުނު މީހާ އާ މިދިޔަ މަހު ފަހުކޮޅު ފެނިފައިވާ ކޭސްއާ ގުޅުމެއް އޮތް ކަމަށް އަދި ފާހަގަކުރެވިފައިނުވާ ކަމަށް ބުންޏެވެ.

ހިމަބިހީގެ އަލާމަތްތައް:

- ހުން އައުން.

- ހަމުގައި ރަތް ބިހިތަކެއް ނެގުން.

- ކެއްސުން.

- ނޭފަތުން އަރިދަފުސް ފޭބުން.

- ލޯ ރަތްވުން.

އެފަދަ އަލާމާތެއް ފެނިއްޖެ ނަމަ ލަސްނުކޮށް ސިއްހީ ހިދުމަތްތެރިއެއްގެ ލަފާ ހޯދުމަށް އެޗްޕީއޭ އިން އިލްތިމާސް ކުރެ އެވެ.

ރާއްޖެ އިން ހިމަބިހި ނައްތާލީ 2017 ވަނަ އަހަރު އެވެ. އެކަމަކު އޭގެ ފަހުން 2020 ވަނަ އަހަރު އާއި މި އަހަރުގެ މާޗް މަހު އައްޑޫން ވެސް ކުޑަކުއްޖަކު ޕޮޒިިޓިވްވެފައި ވެ އެވެ.