ޕީޕީއެމް/ޕީއެންސީގެ ރިޔާސީ ކެންޑިޑޭޓް މުއިއްޒުގެ ކެމްޕެއިނަށް އދ. މަހިބަދޫގައި ބޭއްވި ޖަލްސާގައި އޭނާ ވާހަކަދައްކަވަނީ: ޕެންޝަން ފަންޑުގައި ފައިސާ ނެގޭ ގޮތަށް ހަމަޖައްސަވާނެ ކަމަށް އޭނާ ވިދާޅުވި --- ފޮޓޯ/ޕީޕީއެމް
14 ސެޕްޓެމްބަރ 2023 - 22:52
30 comments
ޕެންޝަން ފައިސާއިން އަމިއްލަ ގެދޮރު އިމާރާތް ކުރުމަށާއި ވިޔަފާރި ފެށުމަށާއި އަދި ތައުލީމު ހާސިލުކުރުމަށް ފައިސާ ނެގޭގޮތަށް ޕެންޝަންގެ ގާނޫނަށް ބަދަލު ގެންނަން ހުށަހަޅުއްވާނެ ކަމަށް ޕީޕީއެމް/ޕީއެންސީގެ ރިޔާސީ ކެންޑިޑޭޓް ޑރ. މުހައްމަދު މުއިއްޒު މިރޭ ވިދާޅުވެއްޖެ އެވެ.
ރިޔާސީ އިންތިހާބުގެ ދެވަނަ ބުރުގެ ކެމްޕެއިނަށް މިރޭ އދ. މަހިބަދޫގައި ބޭއްވި ޖަލްސާގައި މުއިއްޒު ވިދާޅުވީ ދައުލަތުގެ ޕެންޝަން ފަންޑުގައި 20 ބިލިއަން ރުފިޔާ އެބަހުރި ކަމަށެވެ. އަދި އަހަރަކު 100 މިލިއަން ރުފިޔާގެ ފައިދާ އެ ފަންޑަށް ޖަމާވަމުން އަންނަ ކަމަށާއި ނަމަވެސް އެ ފަންޑުގެ ގާނޫނު އޮންނަ ގޮތުން އާންމުންނަށް އެންމެ ރަނގަޅަށް ފައިދާ ނުކުރާ ކަމަށް އޭނާ ވިދާޅުވި އެވެ.
ޕެންޝަން ފަންޑުގައި ހުންނަ ފައިސާ މިހާރު ބޭނުންކުރެވެނީ ލޯނުގެ އުސޫލުން އެޕާޓްމަންޓް ގަތުމަށާއި ހައްޖުގެ އަޅުކަން އަދާކުރުމަށް އެކަންޏެވެ.
ޕީޕީއެމް/ޕީއެންސީގެ ރިޔާސީ ކެންޑިޑޭޓް ޑރ. މުހައްމަދު މުއިއްޒުގެ ކެމްޕެއިނަށް އދ. މަހިބަދޫގައި ބޭއްވި ޖަލްސާ.-- ފޮޓޯ: ޕީޕީއެމް
މުއިއްޒު ވިދާޅުވި ގޮތުގައި 65 އަހަރުވުމުން އަދި ބައެއް ފަހަރު 55 އަހަރުވުމުން ރިޓަޔާ ކުރާއިރު އެކަށީގެންވާ އަދަދެއްގެ ފައިސާ ޕެންޝަން ފަންޑުގައި ހުރިނަމަ ކޮންމެވެސް ވަރެއް ލިބެ އެވެ. ނަމަވެސް އުމުރުގެ 30 އަހަރަށް ވުރެ ދިގު މުއްދަތެއް ވަންދެން ކުރި މަސައްކަތުން ޕެންޝަނަށް ޖަމާވެފައިވާ ފައިސާ އިން ފަހު ވަގުތު މާ ބޮޑު ފައިދާއެއް ނުކުރާ ކަމަށާއި ޕެންޝަން ގާނޫނަށް ބަދަލު ގެންނަން ޖެހެނީ އެހެންވެ ކަމަށް އޭނާ ވިދާޅުވި އެވެ.
"މަޖިލީހުގެ އެހީތެރިކަމާ އެކީގައި ގާނޫނަށް ބަދަލު ގެނެސްގެން މި ފަންޑުން އަމިއްލަ ގެދޮރު ބިނާކުރުމަށްޓަކާ ފައިސާ ނެގޭނެ ގޮތް ހަމަޖެއްސުމާއި ދަރިން ކިޔަވަން ބޭރަށް ފޮނުވުމަށް ފައިސާ ބޭނުންކުރެވޭނެ ގޮތް ހެދުމަށް އަދި އަމިއްލަ ވިޔަފާރި ފެށުމަށްޓަކާ އިންވެސްޓްމަންޓެއްގެ ގޮތުގައި އެ މީހާ ޖަމާކުރި ފައިސާ އިން ކޮންމެ ވެސް ވަރެއް ނެގުމުގެ ފުރުސަތު ދިނުމަށް މިފަދަ ކަންކަމަށް ފަހިވާ ގޮތަށް ގާނޫނަށް ބަދަލު ގެނައުމަށް ހުށަހަޅާނަން." މުއިއްޒު ވިދާޅުވި އެވެ.
ރިޔާސީ އިންތިހާބުގެ ދެވަނަ ބުރުގެ ކެމްޕެއިނަށް ޕީޕީއެމް/ޕީއެންސީގެ ކެންޑިޑޭޓް ޑރ. މުހައްމަދު މުއިއްޒު އއ. ފެރިދުއަށް ވަޑައިގަތުން.-- ފޮޓޯ: ޕީޕީއެމް
މުއިއްޒު ވިދާޅުވީ އެ ފައިސާ ދޭނީ 30 ނުވަތަ 40 އަހަރު މަޑުކޮށްފައި ނޫން ކަމަށާއި ޕެންޝަން ފަންޑަށް ފައިސާ ޖަމާކުރާތާ މަދުވެގެން 10 އަހަރު ވުމުން އެ ކަންކަމަށް ފައިސާ ނެގޭނެ ގޮތް ހަދާނެ ކަމަށް އޭނާ ވިދާޅުވި އެވެ.
ޕެންޝަން ފަންޑު ދެމެހެއްޓުމުގެ އިތުރުން އިތުރު އިންވެސްޓްމަންޓްތަކަށް އެ ފަންޑުގެ ފައިސާ ބޭނުން ކުރެވޭ ގޮތް ހަދަން ޖެހޭ ކަމަށް ވެސް މުއިއްޒު ވިދާޅުވި އެވެ.
އިތުރު ލިޔުންތައް
މަގްބޫލް ލިޔުންތައް
Mihaaru Print Edition
Download Mihaaru News App
Offline Alerts
SMS 'sub mihaaru' to 5454
ކޮމެންޓްތައް
ޕެންޝަން ދާރިސް
16 September 2023
ކޮމެންޓްތައް ކިޔާލީމާ އެނގުނީ ޕެންޝަންގެ ބޭނުމާ އެކަންކުރާ ރަނގަޅު އުސޫލުތައް ރައްޔިތުންނަށް އޮޅުން ނުފިލާކަން. ޑރ. މުޢިއްޒުގެ އެ ވަޢުދަކީ މުޅި ނިޒާމަށް ހުރި ނުރައްކަލެއް. ޒިމްބާބުވޭ އަދި އާޖެންޓީނާ ފަދަ ޤައުމުތަކުން ކޮވިޑްގައި ޕެންޝަން ލާރިން ބައެއް ނަގަން ދޫކޮށްލީމާ އެތަންތަން އޮތް ހާލު ފެންނާނެ. އިންފްލޭޝަން އެހުރީ %75 އިން މަތީގަ. ރާއްޖޭގަ މިހުރީ %3 ގަ.
އަންދަލޫސިޔާ
16 September 2023
މިމީހުން ތަނެއްގަ ފައިސާފޮއްޗެއް އޮތިއްޔާ އެ ނަގާނެ. މުސްކުޅިވެ ގައިބާރު ދެރަވެ، ވަޒީފާ ނުލިބޭނެ ދުވަހު އަމިއްލަ ޚަރަދުކުރަން ހުންނާނެ ފައިސާކޮޅު ވެސް ހުސްކޮއްލަން ތިއުޅެނީ. ޒިމްބާބުވޭ ފަދަ ޤައުމުތަކުން ކުރާކަމެއް ތީ!
މުއިއްޒޫ
15 September 2023
ޕެންޝަން ފައިސާ ނުއެއް ދެވޭނެ ތޮގޮތަކަށް. ތިއީ ހަމަ ތާކުން ތާކު ނުޖެހޭކަމެއް. ތިވާހަކަ ދައްކަވަންވީ ރައީސްކަމަށް އައިއްސަ މަޖިލިސް އިންތިޚާބުގައި. ޕެންޝަން ފައިސާގަ މިހާރުވެސް ނުޖެހެވޭ. ހަދައިދޭންވީ ގޮތަކީ އުމުރު ދުވަހު މަސައްކަތްކުރި މަސައްކަތްތެރީންނާ އެނޫން މީހުންނާއި ޕެންޝަނުގެ ތަފާތު ގެނެސްދޭންވީ. އެކަންވެސް ކުރެވޭނީ މަޖިލީހަށް. ވީމާ މުއިއްޒު ބުންޏަސް ތީ ދެން ކަމުދާ ވާޙަކެއް ނޫން، ސަބަބަކީ ރައީސް އަކާ ގުޅޭކެއް ނޫން، މަޖިލީހާ ތި ގުޅެނީ.
ތިޔާއުޅެނީދޮވެލަން
15 September 2023
ޕެންޝަން ފަންޑުގައި ހުންނަ ފައިސާއަކީ ރިޓަޔަކުރުމުގެ ކުރިން ތަޅައިބާލަން ހުންނަ އެއްޗެއް ނޫން. ތިއުޅެނީ ކޮންމެވެސް އެއްޗެކޭ ކިޔައިގެން ޕެންޝަން ފަންޑުވެސް ދޮވެލަން. އޭރުން ގިނަމީހުން ރިޓަޔަރ ކުރާއިރު ފަންޑުގައި މުކޮސްވެސް ނުހުންނާނެ. ޒިންމާނަގާނެ މީހަކުވެސް ނުހުންނާނެ.
އަފުން
15 September 2023
ވަކި އުސޫލެއްގެ ދަށުން ވަކި ޚާއްޞަ ކަންތައްތަކަކަށް ކޮންމެވެސް ޕަސެންޓެއް ނެގޭ ގޮތަށް އޮތުމަކީ ރަނގަޅުކަމެއް. މިހާރު މިވާގޮތަކީ ބުރަ މަސައްކަތް ކޮށްގެން ހޯދާ އާމްދަނީން ބައެއް ކޮންމެ މަހަކު ޕެންޝަނަށް ޖަމާކުރާ މީހެކޭ، ދުވަހަކު އެންމެ ފައިސާފޮއްޗެއް ޕެންސަނަށް ޖަމާ ނުކުރާ މީހެކޭ 65 ވީމަ ހަމަ ހަމަ. އެއްވެސް އިންސާފުވެރިކަމެއް ނޯވޭ. މިކަން ބަދަލު ކުރަން ޖެހޭ.
ޢޭންޖަލް
15 September 2023
ޕެންޝަން ފަންޑު މަސައްކަތް ކުރާގޮތް ނޭނގޭތީ ތިހެން ތިބުނަނީ. މައުލޫމާތު އޮޅުންފިލުވުން މުހިންމު.
ޖަބީ55
15 September 2023
ރަނގަޅުކަމެއް. އެއީމިހާރު ފަންޑު އޮންނަނީ ސަރުކާރަށް ލޯނުދޭ ވަސީލަތަކަށް ވެފައި. އަނެއްކާ ފަންޑު އެހެން އޮއްވާ އެކިދިމާދިމާލުން ޕެންޝަންތައް އެބަދޭ. ސިވިލްސާވިސް ސިފައިންގެ ފުލުސް ކަސްޓަމް ފަނޑިޔާރުން މަޖިލިސް މިހެން ގޮސް އެންމެންހެން އެމީހުންގެ ވަކި ޕެންޝަނެއް އެބަ ގެންގުޅޭ. ވީމާ ރަނގަޅަށް ނިޒާމު ސެޓްނުކުރެވި އެއްބަކު ދައުލަތް ފެލާ ގޮތަށް ބާއްވާނެ ކަމެއް ނެތް. މުހިންމު ބޭނުންތަކަށް ފަންޑު ބޭނުންކުރެވޭ ގޮތް ހެދީމަ ތަންކޮޅެއް ރަނގަޅުވާނެ.
ޖަމީލް1
15 September 2023
މިހާރު މުއިއްޒުގެ ވިސްނުން އެބަރަގަނޅުވޭ މަގޭ ވޯޓް މިފަހަރު މުއިއްޒަށް
ހެހެހެހެހެ
15 September 2023
ހަލާކަށްތޯ ވޯޓުދެއްވަނީ. މިހުރިހާ ދުވަހު މުއިއްޒު ދެއްކެވި ހުރިހާ ރަނގަޅު ކަންތައްތައް އޮއްވައި ވޯޓެއް ދޭން ބޭނުންނުވެ ހަމައެކަނި ތާކުންތާކު ނުޖެހޭ ވާހަކައަށް ތިބުނީ ވޯޓު ދޭނަމޭ. ތިއަށްވުރެ ރަނގަޅުކޮށްލަބަލަ.
މާހުތޭ
15 September 2023
ފެންޝަން އަކީ ކޯއްޗެއްކަން ނޭނގޭ މީހުން ކުރާކަހަލަަ ވައުދެއް މިއީ!
ރިޔާޒު ރަށީދު
15 September 2023
ދެން ކީއްކުރާ އެއްޗެއް ޕެންޝަން ފަންޑަކީ؟ މުސްކުޅިވާ ދުވަހަށް ވާއިރު ހުލިކޮށްލެވޭ ގޮތަށް އޮންނަ އެއްޗަކަށް ވީމަ، ދެން އެބުރަ އުފުލަން ޖެހޭނީ ޔަންގް ޓެކްސް ޕެޔަރުން
ހަބީބު
15 September 2023
ވަރައް ރަނގަޅު ބަދަލެއް އަޅުގަނޑު ރިސޯޓުގަ ވަޒީފާ އަދާކުރާތާ 20 އަހަރުވެއްޖެ އަޅުގަނޑުބޭނުން ދެކޮޓަރީގެ ފިނިޝިން އެއްފަހަރާ ނިންމާލަން ކޮންމެ މަހަކު ޕެންޝަންފަންޑައް ފައިސާކަނޑާ ވީމާ ތިޔައީ ވަރައް މުހިންމު ނިންމުމެއް