މެޗުގައި ބާސާގެ ޔަމާލަށް އުޅެންޖެހުނީ ބަނޑަށް އުނދަގޫވުމުގެ ވޭނުން އަރައި ނުގަނެވިގެން

ޕޯޓޯ (އޮކްޓޫބަރު 5) - ޗެމްޕިއަންސް ލީގުގައި ބާސެލޯނާ ރަށުން ބޭރުގައި ރޭ ޕޯޓޯއާ ދެކޮޅަށް ކުޅުނު މެޗުގައި ޒުވާން ލަމީން ޔަމާލަށް ބަނޑަށް އުނދަގޫވުމުގެ ވޭނުނގައި އުޅެން ޖެހިއްޖެ އެވެ.

ބާސާ އިން 1-0 އިން މޮޅުވި މެޗުގެ ފުރަތަމަ 11 ގައި ހިމެނިގެން ކުޅެން ނުކުތް 16 އަހަރުގެ ފޯވާޑަކީ ޔަމާލް ޗެމްޕިއަންސް ލީގުގައި ފުރަތަމަ 11 ގައި ހިމެނިގެން ކުޅެން ނުކުތް އެންމެ ޒުވާން ކުޅުންތެރިޔާ އެވެ.

ޔަމާލް ރޭގެ މެޗަށް ނުކުތްއިރު އުމުރަކީ 16 އަހަރާއި 83 ދުވަހެވެ. މީގެ ކުރިން ރެކޯޑް އޮންނަނީ 1994 ގައި ބެލްޖިއަމްގެ އެންޑަލެޗް އަށް ޗެމްޕިއަންސް ލީގު މެޗެއް ސްޓާޓް ކުރި ނައިޖީރިއާގެ ސެލެސްޓައިން ބަބަޔަރޯ އަތުގަ އެވެ. އޭރު އޭނާގެ އުމުރަކީ 16 އަހަރާއި 86 ދުވަހެވެ. އެ މެޗުގައި އޭނާ އަށް ރަތް ކާޑެއް ވެސް ދެއްކި އެވެ.

މެޗުގެ ފަހު ވަގުތު ޔަމާލް ބަދަލުކުރަން ޖެހުނުއިރު، ކޯޗު ޒަވީ ހެނާންޑޭޒް ބުނީ އޭނާގެ ބަނޑަށް އުނދަގޫ ވާވަރުން މެޗު ފުރިހަމަ ނުކުރެވުނީ ކަމަށެވެ. ޔަމާލް ބަދަލުކުރީ 73 ވަނަ މިނިޓުގައި ލިބުނު ބްރޭކެއްގައި އޭނާ ފާހާނާއަށް ގޮސް، 10 މިނިޓް ހޭދަވި އެވެ. ގިނަ ވަގުތެއް 10 ކުޅުންތެރިންނާ އެކު ބާސާ ކުޅެން ޖެހުމުން ޒަވީ ނިންމީ އެތަން ފީބައްދަން ޔަމާލްގެ ބަދަލުގައި އެހެން ކުޅުންތެރިޔަކު އެރުވުމަށެވެ.

"ލަމީން [ޔަމާލް] އަށް އުނދަގުލެއް ވާކަން އޭނާ އަހަރެން ގާތު ބުނި، ބަނޑަށް ތަދުވާތީވެ. އަހަރެމެން ބެލީ މެޗުތެރޭން ލިބުނު ބްރޭކެއްގައި ރަނގަޅުވޭތޯ، އެކަމު ކުރިއަށް ނުގެންދެވުނު،" ޔަމާލް ބަދަލުކުރަން ޖެހުނު ސަބަބާ ގުޅޭގޮތުން ޒަވީ ބުންޏެވެ.

ބާސެލޯނާގެ ހަމައެކަނި ގޯލު ފުރަތަމަ ހާފުގެ އިތުރު ވަގުތުގައި، އިލްކާއި ގުންޑޮއާންގެ އެހީތެރިކަމާ އެކު ޖަހައިދިނީ ބަދަލު ކުޅުންތެރިއެއްގެ ގޮތުގައި އެރި ފެރާން ޓޮރޭޒް އެވެ. ކޯޗު ޒަވީ އޭނާ ކުޅެން ނެރުނީ މި ހާފުގެ ވަރަށް ކުރީކޮޅު ސްޓްރައިކަރު ރޮބާޓް ލެވަންޑޯސްކީ އަށް އަނިޔާ ވެގެންނެވެ.

މެޗަށް ފަހު ނޫސްވެރިންނާ ވާހަކަ ދައްކަމުން ޒަވީ ވަނީ ލެވަންޑޯސްކީގެ އަނިޔާ ސީރިއަސް ކަމަށް ބުނެފަ އެވެ.

ފަހު ހާފުގައި ޕޯޓޯ އިން ވަނީ މޮޅަށް ކުޅެ ގޯލު ޖަހަން ގިނަ ފުރުސަތުތައް ވެސް ހޯދައިގަ އެވެ. މެޗު ނިމެން ގާތްވެފައި ވަނިކޮށް އޭރިއާ ތެރެއިން ޔާއޯ ކަންސެލޯ އަތުގައި ބޯޅަ ޖެހުނު ކަމަށް ބަލައި އެޓީމަށް ޕެނަލްޓީއެއް ދޭން ވެސް ރެފްރީ ނިންމި އެވެ. ނަމަވެސް ވީއޭއާރު ރިވިއުއަށް ފަހު ނިންމުން ބަދަލުކުރަން ޖެހުނީ އެވެ. އިރުކޮޅެއް ފަހުން އެޓީމުގެ މަހްދީ ޓަރޭމީ އޯވާހެޑް ކިކަކުން ގޯލަށް ބޯޅަ ފޮނުވާލި ނަމަވެސް އޮފްސައިޑް ވުމުން ގޯލު ބަލައެއް ނުގަތެވެ.

މެޗުގެ އިތުރު ވަގުތުގައި ބާސެލޯނާގެ މިޑްފީލްޑަރު ގަވީ އަށް ވަނީ ދެވަނަ ރީނދޫ ކާޑަކާ އެކު ރަތް ކާޑެއް ދައްކައިފަ އެވެ.

މި ގުރޫޕުގައި ހިމެނޭ ޔޫކްރޭނުގެ ޝަކްތާ ޑޮނެސްކުން ވަނީ ރަށުން ބޭރުގައި ބެލްޖިއަމްގެ އޭންޓްވާޕް އާ ދެކޮޅަށް ކުޅުނު މެޗުގައި ފަހަތުން އަރައި 3-2 އިން މޮޅުވެފަ އެވެ.

ގުރޫޕް އީ ގައި ހިމެނޭ އެތުލެޓިކޯ މެޑްރިޑުން 3-2 އިން ނެދަލެންޑްސްގެ ފެއިނޫޑް ބަލިކުރިއިރު، އެ ގުރޫޕުގައި ހިމެނޭ ސްކޮޓްލެންޑުގެ ސެލްޓިކާ ވާދަކޮށް ލާޒިއޯ މޮޅުވީ މެޗުގެ އެންމެ ފަހު މިނިޓުގައި ޕެޑްރޯ ޖަހައިދިން ގޯލުން 2-1 އިންނެވެ.

މެންޗެސްޓާ ސިޓީން ރޭ އާރުބީ ލައިޕްޒިގް ބަލިކުރީ 3-1 ގެ ނަތީޖާއަކުންނެވެ. އެ ގުރޫޕުގައި ހިމެނޭ ޔަންގް ބޯއީޒް އާއި ރެޑް ސްޓާ ބެލްގްރޭޑް ބައްދަލުކުރި މެޗު ނިމުނީ 2-2 އިން އެއްވަރު ވެގެންނެވެ.