ޚަބަރު / ޑރ. މުހައްމަދު މުއިއްޒު، މާލޭގެ މޭޔަރު

ފަލަސްތީނުގެ ބިންތަކުން އިޒްރޭލުން ފައިބަން ޖެހޭ: މުއިއްޒު

އިންތިހާބީ ރައީސް ޑރ މުހައްމަދު މުއިއްޒު: އެމަނިކުފާނު ވަނީ އިޒްރޭލުން އަޅުވެތިކޮށްފައިވާ ފަަލަސްތީނުގެ ބިންތައް އެގައުމަށް އަނބުރާ ހަވާލުކުރުމަށް ގޮވާލައްވާފައި.-- ފޮޓޯ: ފަޔާޒު މޫސާ | މިހާރު

މާއިދާ މުހައްމަދު ރަޝާދު، މިހާރު

07 އޮކްޓޯބަރ 2023 - 20:26

66 comments

އިޒްރޭލުން ހިފާފައިވާ ފަލަސްތީނުގެ ބިންތައް މިހާރުން މިހާރަށް ދޫކޮށްލައި، އެ ބިންތައް ފަލަސްތީނަށް އަނބުރާ ހަވާލުކުރުމަށް އިންތިހާބީ ރައީސް ޑރ. މުހައްމަދު މުއިއްޒު މިއަދު ގޮވާލައްވައިފި އެވެ.

މުއިއްޒު އެގޮތަށް ގޮވާލައްވާފައި ވަނީ ފަލަސްތީނުގެ މިނިވަންކަމަށް މަސައްކަތްކުރާ ހަމާސް ޖަމާއަތުން އިޒްރޭލަށް ވަރުގަދަ ހަމަލާތަކެއް ދިނުމާ ގުޅިގެން އިޒްރޭލުން ފަލަސްތީނާ ދެކޮޅަށް ހަނގުރާމަ އިއުލާން ކޮށްފައި ވަނިކޮށެެވެ.

މުއިއްޒު މިރޭ ކުރެއްވި ޓްވީޓެއްގައި ވިދާޅުވީ ފަލަސްތީނަކީ މިނިވަން ދައުލަތެއް ކަމަށް އިޒްރޭލުން ބަލައިގަންނަން ޖެހޭ ކަމަށެވެ. އަދި ފަލަސްތީނުގެ ބިންތައް ފޭރުން ހުއްޓާލުމުގެ އިތުރުން 1967 ވަނަ އަހަރުގެ ކަނޑައަޅާފައިވާ ބޯޑަރާ އެއްގޮތަށް އިރުމަތީ ގުދުސްއަކީ ފަލަސްތީނުގެ ބައެއްގެ ގޮތުގައި ބަލައިގަތުމަށް މުއިއްޒު ގޮވާލައްވާފައިވެ އެވެ. އަދި އިރުމަތީ ގުދުސްއިން ބޭރުކޮށްލާފައިވާ ފަލަސްތީނުގެ ރެފިއުޖީނަށް އެތަނަށް އަނބުރާ ދެވޭނެ މަގު ހޯދައިދޭންޖެހޭ ކަމަށް މުއިއްޒުގެ ޓްވީޓްގައިވެފައި ވިދާޅުވެފަ އެވެ.

Israel should end the illegal occupation of Palestine immediately and return the lands forcefully seized from Palestinians. Israel should recognize Palestine as an independent state with East Jerusalem as its capital within 1967 borders and allow the immediate return of refugees.
— Dr Mohamed Muizzu (@MMuizzu) October 7, 2023

މުއިއްޒުގެ ޓްވީޓް

ހަމާސް އިން އިޒްރޭލަށް ކުއްލިއަކަށް ހަމަލާދޭން ފަށާފައި ވަނީ މިއަދު ހެނދުނެވެ. އެއްގަމާއި ކަނޑާއި ވައިގެ މަގުން ވެސް ހަމަލާ ދިނުމުގެ އިތުރުން އިޒްރޭލުން ހިސޯރު ކޮށްފައިވާ ފަލަސްތީނުގެ ބައެއް ބިންތައް ވެސް ހަމާސްގެ ކޮންޓްރޯލްގެ ދަށަށް މިހާރު ވަނީ ގެނެސްފަ އެވެ.

އެ ހަމަލާތަކުގައި އިޒްރޭލުގެ 40 އަށް ވުރެ މީހުން މިހާތަނަށް ވަނީ މަރުވެފަ އެވެ. އަދި 750 އަށް ވުރެ ގިނަ މީހުން ޒަހަމްވެފައިވާއިރު އިޒްރޭލު ސިފައިންގެ ގިނަ ބަޔަކު އަތުލައިގެންފައިވާ ކަމަށް ހަމާސް ޖަމާއަތުން ބުނެ އެވެ. އަދި ރައްދުގައި އިޒްރޭލުން ގާޒާއަށް ދިން ރޮކެޓް ހަމަލާތަކުގައި ފަލަސްތީނުގެ 100 އަށް ވުރެ ގިނަ މީހުން މިހާތަނަށް މަރުވެފައިވާ ކަމަށްވެ އެވެ.

Hamas ge varugadha hamalaa thakeh Israel ah, Israel in hanguraama iulaan koffi

The most trusted news source in the Maldives

Mihaaru

ހަމާސްގެ ކުއްލި ހަމަލާތަކާ ގުޅިގެން އިޒްރޭލުގެ ބޮޑުވަޒީރު ބެންޖަމިން ނަތަންޔާހޫ ވަނީ ފަލަސްތީނާ ދެކޮޅަށް ހަނގުރާމަ ފެށިކަން ރަސްމީކޮށް އިއުލާން ކުރައްވައިފަ އެވެ.