މައްސަލައާ މެދު ވާހަކަ ދައްކާނީ މިހާރު ކުރިއަށްދާ ކަންކަން ނިމުމުން: ބައްސާމް

އެފްއޭއެމްގެ މައްޗަށް ކުރެވޭ ހިޔާނާތުގެ ތުހުމަތާ ގުޅިގެން އިތުރުކަންކަން ބެލުމަށް، ފުލުހުން އެ އިދާރާ އަށް ވަން މައްސަލައާ ބެހޭގޮތުން ވާހަކަ ދައްކާނީ މިހާރު ކުރިއަށްދާ ކަންކަން ނިމުމުންކަމަށް އެ އެސޯސިއޭޝަނުގެ ރައީސް ބައްސާމް އަދީލް ޖަލީލް ވިދާޅުވެއްޖެ އެވެ.

ފުލުހުން އެ ތަހުގީގު ފަށާފައިވަނީ ފީފާ އާއި އޭއެފްސީން ފޮނުވާ ފައިސާ އަމިއްލަ މީހުންގެ އެކައުންޓްތަކައް ޖަމާކޮށް މަނީ ލޯންޑަރިން އާއި ހިޔާނާތަށް ތުހުމަތުކުރެވޭ ކަންތައްތަކެއް ހިންގާ ކަމަށް ތުހުމަތުކުރެވިގެން ޕްރޮސިކިއުޓާ ޖެނެރަލްގެ އަމުރަކަށެވެ.

މައްސަލައާ ބެހޭގޮތުން ޕީޖީ އޮފީހުން ނެރުނު ބަޔާނުގައި ބުނީ އެފްއޭއެމްގެ މައްސަލަ ތަހުގީގު ކުރަން އެންގީ އެކި ފަރާތްތަކުން އެފްއޭއެމަށް ދޭ ފައިސާ އަށް އެ އެސޯސިއޭޝަންގެ އިސްވެރިން ހިޔާނާތްތެރިވެ، ކުށުގެ އަމަލުތައް ހިންގާކަމަށް ތުހުމަތުކުރެވޭތީ ކަމަށެވެ.

އެފްއޭއެމް އޮފީސް ބޭރުގައި ފުލުހުން ހަރަކާތްތެރި ވަނީ --- ފޮޓޯ: ފަޔާޒު މޫސާ | މިހާރު

އެހެންވެ އެކަމުގެ ތެރެއިން އެއްވެސް ހިސާބެއްގައި މަނީ ލޯންޑަރިން އާއި ވައްކަމާއި ހިޔާނާތާއި މަކަރާ ހީލަތުގެ ނުވަތަ އެ ނޫން ވެސް ޖިނާއީ ކުށެއްގެ މައްސަލައެއް ހިނގަމުންދާ ނަމަ އެ ކަމެއް ތަހުގީގުކޮށް، އެ މައްސަލާގައި ދައުވާއެއް ކުރެވެން އޮތް ބައެއްގެ މައްޗަށް ދައުވާކުރަން ފޮނުވުމަށް އަމުރުކޮށްފައިވާނެ ކަމަށް ވެސް ޕީޖީ އޮފީހުން ބުންޏެވެ.

ގައުމުތަކުގެ ފުޓްބޯޅަ އިދާރާތަކަށް ފުލުހުން ވަނުމަކީ، ތިންވަނަ ފަރާތެއް ވަނުން ކަމަށް ފީފާއިން ދެކެ އެވެ. ތިންވަނަ ފަރާތެއް ވަދެގެން، މި ސަރަހައްދުގެ އެންމެ ބޮޑު ތިން ގައުމުގެ ފުޓްބޯޅަ ފީފާއިން މީގެ ކުރިން ސަސްޕެންޑް ކޮށްފައި ވެއެވެ. އިންޑިއާ އާއި ޕާކިސްތާން އަދި ސްރީ ލަންކާ، ފީފާއިން މީގެ ކުރިން ސަސްޕެންޑް ކުރީ ތިންވަނަ ފަރާތެއް ވަނުމުންނެވެ.

އެކަމަކު ރާއްޖޭގެ މައްސަލައާ ބެހޭގޮތުން ފީފާއިން ވަކި ނިންމުމެއް މިހާތަނަށް ނިންމާފައެއް ނެތެވެ.

އެފްއޭއެމް ބަލާ ފާސްކުރުމުގެ މަސައްކަތް ފުލުހުން ކުރިއަށްދާއިރު، ބައްސާމް އެފްއޭއެމް އޮފީސް ކައިރީގައި --- ފޮޓޯ: ފަޔާޒު މުސާ | މިހާރު

އެފްއޭއެމްގެ އިދާރާ އަށް ވަދެ ފުލުހުން ހިންގަމުންދާ ތަހްގީގާ ގުޅިގެން، އެ އެސޯސިއޭޝަންގެ މީޑިއާ ގުރޫޕްގައި ނޫސްވެރި ސުވާލު ކުރުމުން ބައްސާމް ވިދާޅުވީ މިހާރު ކުރިއަށްދާ ކަންކަން ނިމުމުން އެކަމާ ބެހޭގޮތުން ވާހަކަ ދައްކާނެ ކަމަށެވެ.

ބައްސާމް އެފްއޭއެމްގެ އޮފީހަށް ވަނުމަށް ފުލުހުން ހުރަސްއަޅައިފައިވޭތޯ ސުވާލު ކުރުމުން އޭނާ ވިދާޅުވީ އެފަދަ އެއްވެސް ހުރަހެއް ކުރިމަތި ނުކުރާ ކަމަށެވެ.