މަޖިލީހުގައި މިހާރު ތިއްބެވި އެމްއެންޕީއަށް ނިސްބަތްވާ ދެ މެންބަރުން --
21 ނޮވެމްބަރ 2023 - 10:07
9 comments
މޯލްޑިވްސް ނެޝަނަލް ޕާޓީ (އެމްއެންޕީ) ތަމްސީލުކުރައްވަމުން ގެންދެވި ވިލިމާލެ ދާއިރާގެ މެންބަރު ކަމުގައި ހުންނެވި އަހުމަދު އުޝާމް އެ ގޮނޑިން އިސްތިއުފާ ދެއްވުމާ ގުޅިގެން، އެ ޕާޓީއަށް މަޖިލީހުގައި ތަމްސީލު ކުރުމުގެ ފުރުސަތު ގެއްލިއްޖެ އެވެ.
މަޖިލީހުގައި މީގެ ކުރިން ތިއްބަވަނީ އެމްއެންޕީގެ ތިން މެންބަރުންނެވެ. އެއީ އުޝާމާއި ތިމަރަފުށީ ދާއިރާގެ މެންބަރު އަބްދުﷲ ރިޔާޒްގެ އިތުރުން ދަނގެތީ ދާއިރާގެ މެންބަރު މުހައްމަދު ނާޒިމެވެ. އުޝާމް އިސްތިއުފާ ދެއްވީ މި ސަރުކާރުގެ އެޓާނީ ޖެނެރަލް ކަމުގެ މަގާމު ލިބިވަޑައިގަތުމުންނެވެ.
އެމްއެންޕީ އުފައްދައި މަޖިލީހުގައި އެ ޕާޓީގެ ޕާލަމެންޓްރީ ގްރޫޕް (ޕީޖީ) ތަމްސީލް ކުރުމުގެ ފުރުސަތު ލިބުނީ ތިން މެމްބަރުން ތިއްބްވުމުންނެވެ.
މިއަދުގެ ޖަލްސާ ފައްޓަވަމުން މަޖިލީހުގެ ރައީސް މުހައްމަދު އަސްލަމް ވިދާޅުވީ، މަޖިލީހުގެ ގަވައިދުގައިވާ ގޮތުން މަޖިލީހުގައި ތަމްސީލު ކުރަން އެދޭ ޕާޓީގެ މެންބަރުންގެ އަދަދު އެއްވެސް ހާލަތެއްގައި ތިން މެންބަރުންނަށް ވުރެ މަދުވެއްޖެނަމަ، އެ ހައިސިއްޔަތު ގެއްލޭނެ ކަމަށެވެ.
"މޯލްޑިވްސް ނެޝަނަލް ޕާޓީ މަޖިލީހުގައި ތަމްސީލު ކުރަން މަޖިލީހުގެ 33 ވަނަ މާއްދާގެ ނ ގެ ދެ ވަނަ ނަންބަރުގެ ދަށުން އެ ޕާޓީ ތަމްސީލު ކުރުމަށް ލިބުނު ހައިސިއްޔަތު މިހާރު އެ ޕާޓީއަށް ގެއްލިފައިވާތީ މަޖިލީހުގެ 33 ވަނަ މާއްދާގެ ބ ގެ ދަށުން އެކަން އިއުލާނު ކުރަން،" އަސްލަމް ވިދާޅުވި އެވެ.
އަސްލަމް ވިދާޅުވީ، އެ ޕާޓީގެ މެންބަރުންގެ ގޮތުގައި ތިއްބެވި ރިޔާޒާއި ނާޒިމް މިހާރު މަޖިލީހުގެ ދަފްތަރުގައި ހިމެނިވަޑައިގަންނަވާނީ މިނިވަން މެންބަރުންގެ ގޮތުގައި ކަމަށެވެ.
މަޖިލީހުގައި ކުރިން އަމިއްލަ މެންބަރެއްގެ ގޮތުގައި ހުންނެވި ތުލުސްދޫ ދާއިރާގެ މެންބަރު ޕީއެންސީގެ ދަފްތަރުގައި ހިމަނާފައިވާ ކަން ވެސް މިއަދު ވަނީ އިއުލާނުކޮށްފަ އެވެ.
މަޖިލީހުގެ ދަފްތަރު މިހާރު އެކުލެވިގެންވަނީ އެމްޑީޕީގެ 56 މެންބަރުން، ޑިމޮކްރެޓްސްގެ 13 މެންބަރުން، ޕީޕީއެމްގެ ދެ މެންބަރުން، ޕީއެންސީގެ ދެ މެންބަރުން، އެމްޑީއޭގެ ދެ މެންބަރުން، ޖޭޕީގެ ދެ މެންބަރުން، އަދި މިނިވަން 4 މެންބަރުންނެވެ.
އިތުރު ލިޔުންތައް
މަގްބޫލް ލިޔުންތައް
Mihaaru Print Edition
Download Mihaaru News App
Offline Alerts
SMS 'sub mihaaru' to 5454
ކޮމެންޓްތައް
ވަކީލު
21 November 2023
މަޖިލިސް ގަވާއިދު ގެ 33 ވަނަ މާއްދާ އެއްކޮށް ކިޔާލުމުން މިވެގެން އުޅޭ ގޮތް ސާފުވާނެ. ޕީޕީއެމް ޕީއެންސީ އަދި ޖޭޕީ މެންބަރުންނަކީ ކުރިން އެޕާޓީގެ ނަމުގައި މަޖިލީހަށް އިންތިޚާބުވެފައި ތިބި މެންބަރުން. އެއާ ޚިލާފަށް ނާޒިމް ރިޔާޒް އަދި އުޝާމް އެމްއެންޕީ އާއި ގުޅުނީ މަޖިލިސް މެންބަރުންގެ ގޮތުގައި ތިބެގެން އަލަށް ޕާޓީއެއް ހަދައިގެން. ނާޒިމް ރިޔާޒް ތިބީ ޖޭޕީ ގައި އުޝާމް އިންޑިޕެންޑެންޓް. އެހެންވެ 33 ވަނަ މާއްދާގެ (ބ) ގައި އެބުނާ ގޮތް މިވީ.
ކުޑައާދަނު
21 November 2023
"ޕީޕީއެމްގެ ދެ މެންބަރުން، ޕީއެންސީގެ ދެ މެންބަރުން، އެމްޑީއޭގެ ދެ މެންބަރުން، ޖޭޕީގެ ދެ މެންބަރުން،" މިމީހުނަށް މަޖިލިސް ގައި ޕާޓީ ނަމުގައި ތަމްސީލުވަނީ ކޮން ގޮތަކަށް؟
މޮޑަފްް
21 November 2023
އެމްއެންޕީ ސުރުޚީއަށް އެރިގޮތެއް ނޭނގުނު ޕީޕީއެމްޢާ ޕީއެންސީގެ ވެސް ހައިސިއްޔަތު ގެއްލުނީނު
ސްމޭޝ
21 November 2023
ދެން ކީއްވެ ބާ؟ ޕީޕީއެމް 2 ޕީއެންސީ 2 އެމްޑީއޭ 2 ޖޭޕީ 2 ތިބެގެން އެޕާޓީތައް މަޖުލީހުގައި ތަމްސީލުވަނީ؟ ކަބަރު ލިޔާ މީހާ މިފަދ ަކންކަން ކިޔުންތެރިންނަށް ސާފުކޮށްދިނުމުގެ ޒިންމާ އޮތްކަމަށް ދެކެން!
ވޯލް
21 November 2023
ވޯޓު ދިން ރައްޔިތުންނަށް ދޯކާދީފަ އަމިއްލަ މަންފާއަށް ބޮޑު ވަޒިފާއަކަށް. މިކަހަލަ މީހުން ހޮވުން ހުއްޓާލަންޖެހޭ. ރައްޔިތުންނަށް ޚިދުމަތް ކުރަންޔާ ރައްޔިތުންގެ މަޖިލީހަށްވުރެ ބޮޑަށް ޚިދުމަތް ކުރެވޭނެ އެހެން ވަޒީފާއެއް ނޯންނާނެ.
ދާރިޔާ
21 November 2023
އިންޕީޗު ކުރެވޭނެތަ މި އަދަދުން
ސަހަރޯހީވޭ.
21 November 2023
އެހެންވީމަ މަޖިލީހުގަ މިހާރު ތިއޮތީ އެންމެ 2 ޕާޓީއެއްނޫންތޯ؟ ދެން ހުސް މިނިވަން މެމްބަރުން.
ގެދާނޯމޮސް
21 November 2023
އުންމީދު ކޮށްގެން ތިބީ އެޓާނީ ގެ މަގާމަށް ޖަމީލު އިސްކުރައްވާނެ ކަމަށެވެ. ނަމަވެސް ހިލަމެއް ނުވެކަންކަން ދާގޮތުން ޕީޕީއެމްގެ ރުކުގައި އެޅި ކާށިތަށް ގޮބޮޅިއަށް ވެ ނުގޭނޭވަރަށް ހަރުވެ ކިރުނުފެލި ގޮސްދާނެއެވެ.
ސަސި.
21 November 2023
އިތުރު ކަމަކަށް ހަރަދުނުކޮށް ތިޔަ ޕާޓީ އުވާލަން އުޅެބަލަ.