މިއަދު ބޭއްވި ރަސްމިއްޔާތުގައި މާލޭގެ މޭޔަރު ކަމަށް އާދަމް އާޒިމް ހުވާ ކުރައްވަނީ .-- ފޮޓޯ: ނިޝާން އަލީ / މިހާރު
22 ޖެނުއަރީ 2024 - 21:36
6 comments
މާލޭގެ މޭޔަރު ހޮވުމަށް ބޭއްވި ބައި-އިލެކްޝަން ކާމިޔާބު ކުރެއްވި އިދިކޮޅު އެމްޑީޕީގެ ކެންޑިޑޭޓް އާދަމް އާޒިމް އާއި ކައުންސިލް މެމްބަރު ކަމަށް އިންތިހާބުވި ތިން ބޭފުޅުން މަގާމުގެ ހުވާ ކުރައްވައިފި އެވެ.
މާލޭގެ އާ މޭޔަރު ކަމަށް އާޒިމް ހުވާ ކުރެއްވީ މިރޭ ދަރުބާރުގޭގައި އެކަމަށްޓަކައި ބޭއްވި ހާއްސަ ރަސްމިއްޔާތެއްގަ އެވެ.
އެ ރަސްމިއްޔާތުގައި އާޒިމްގެ އިތުރުން ހެންވޭރު ދެކުނު ދާއިރާގެ ގޮނޑި ކާމިޔާބު ކުރެއްވި ޕީއެންސީގެ ކެންޑިޑޭޓް އައިމިނަތު ރިޝްފާ އާއި މާފަންނު ދެކުނު ދާއިރާގެ ކައުންސިލްގެ ގޮނޑި ކާމިޔާބު ކުރެއްވި ޕީއެންސީގެ ކެންޑިޑޭޓު ހަސަން ނިޒާމްގެ އަދި އެމްޑީޕީ ޓިކެޓުގައި އިންތިހާބުވި އަހުމަދު ރިޝްވާން ވެސް ވަނީ މަގާމުގެ ހުވާ ކުރައްވާފަ އެވެ.
ހުވާ ކުރުމަށް ބޭއްވި ރަސްމިއްޔާތުގައި މާލޭގެ މޭޔަރު އާދަމް އާޒިމް އިގުރާރުގައި ސޮއި ކުރައްވަނީ.-- ފޮޓޯ: ނިޝާން އަލީ / މިހާރު
ހުވާ ކުރުމުގެ ރަސްމިއްޔާތުގެ ކުރިން، ރިޝްވާން މިއަދު ވަނީ އެމްޑީޕީ ދޫކުރައްވައި ޕީއެންސީއަށް ސޮއިކުރައްވާފަ އެވެ.
މާލޭގެ މޭޔަރުކަމުގެ މަގާމު ހުސްވީ އެ މަގާމުގައި ހުންނެވި ޑރ. މުހައްމަދު މުއިއްޒު ރިޔާސީ އިންތިހާބުގައި މިދިޔަ އަހަރު ވާދަކުރައްވައި އިންތިހާބު ކާމިޔާބުކުރެއްވުމުންނެވެ.
މޭޔަރުކަމުގެ އިތުރުން މާފަންނު ދެކުނު ދާއިރާ އާއި ހެންވޭރު ދެކުނު ދާއިރާ އާއި މެދުހެންވޭރު ދާއިރާގެ މެމްބަރުކަމުގައި ތިއްބެވި ބޭފުޅުން ވެސް ސިޔާސީ މަގާމުތަކަށް އައްޔަންކުރެއްވުމުން ވަނީ ކައުންސިލް މެމްބަރުކަމުން އިސްތިއުފާ ދެއްވައި ސަރުކާރުގެ މަގާމްތަކަށް ވަޑައިގެންފަ އެވެ.
ހުވާ ކުރުމަށް ބޭއްވި ރަސްމިއްޔާތުގައި ރައީސް، ޑރ. މުހައްމަދު މުއިއްޒު އަދި މާލޭގެ މޭޔަރު އާދަމް އާޒިމް ބައިވެރިވަނީ.-- ފޮޓޯ: ނިޝާން އަލީ / މިހާރު
މާލެ ސިޓީ ކައުންސިލްގައި 19 މެމްބަރުން ތިއްބަވާއިރު، މި މަހު ވަނީ ކައުންސިލްގައި ތިބި މެމްބަރުންގެ ތެރެއިން އެމްޑީޕީގެ މެމްބަރަކާއި ޑިމޮކްރެޓްސްގެ މެމްބަރެއް ވެސް ޕީއެންސީއާ ގުޅިފަ އެވެ. އެއާ އެކު ކައުންސިލްގައި ތިބި ސަރުކާރުގެ ކޯލިޝަނަށް ނިސްބަތްވާ މެމްބަރުންގެ އަދަދު 13 އަަށް މިހާރު ވަނީ އިތުރުވެފަ އެވެ.
އިތުރު ލިޔުންތައް
މަގްބޫލް ލިޔުންތައް
Mihaaru Print Edition
Download Mihaaru News App
Offline Alerts
SMS 'sub mihaaru' to 5454
ކޮމެންޓްތައް
ފޮނިޓައްޕު ހަސަނު
23 January 2024
ނޫސްތަކުގެ ފަލަސުރުޚީގައި މާލަސްތަކެއް ނުވެ ޖަހާނެ "އާޒިމް ޕީއިންސީއާއި ގުޅިވަޑައިގެންފި". ރިޔާސީ އިންތިޚާބުގެ ވޯޓުފިޔަވައި ކައުންސިލު ވޯޓަކަށް ވިޔަސް، ރައްޔިތުންގެ މަޖްލިސް ވޯޓަކަސް ބުއްދިވެރިގޮތަކީ މިއިން އިންތިޚާބެއްގައި ވޯޓު ނުލުން. ވާޓުލާމީހާ ގިނަފަހަރަށް ވޯޓުލަނީ ޕާޓީގެ ހައިސިއްޔަތުން ނަމަވްސް ހޮވުނީމަ ކޮންމެ މީހަކު ވެސް މިވަނީ ބަތާހަރާމާ އަށް. ވަގުތު ދުއްވާލައިގެން ވޯޓު ލުމުގެ މާކަ ބޮޑުބޭނުމެއް ނެތް.
ތަފާތުކުރުން
23 January 2024
ޑިސްކްރިމިނޭޓް ޕާޓީގެ މޭޔަރ ހުވާކޮށްފައި ފުރަތަމަ ދެއްކި ވާހަކަ ފަށައިގަތީ ތަފާތުކުރުމާއެކު. މާލޭ ރައްޔިތުން، ދަފުތަރު ރައްޔިތުންނޭ ކިޔައިގެން. މާލޭ ރައްޔިތުންނާއި ދަފުތަރު ރައްޔިތުންނަކީ ދެރަށެއްގެ ރައްޔިތުން ހެއްޔެވެ؟ ދަފުތަރު ރައްޔިތުންނަކީ ކޮންރަށެއްގެ ރައްޔިތުން ހެއްޔެވެ؟ ގޯތި ދިންއިރު ޑިސްކްރިމިނޭޓްކުރި ގޮތަށް އަނެއް އާ ބޮޅެއް ގަތާލަން އުޅުއްވަނީތޯއެވެ؟ މި މާލޭގައި ސައުތު އެފްރިކާގައި އޮތް ކަހަލަ ތަފާތުކުރުމެއް ބާއްވަން ބޭނުންވަނީ ހެއްޔެވެ؟
ލޮބުވެތި ރައްޔިތުން
23 January 2024
އާނއެކޭ... މަގާރަށްވެސް ހާދަ ރުޅިއެކޭ އައީ.. ރައީސުންވެސް ހަނިމާދޫ ރައްޔިތުން ތުރާކުނު ރައްޔިތުންނެކޭ ނުކިޔަ..
ޒަކަރިއްޔާޔާ
23 January 2024
މަރުހަބާ މެޔާރ އާޒިމް... ކޮންމެސިޔާސީ ޕާރޓީ އެއްގަ ހުއްޓަސް އާޒީމް ރައްޔިތުންގެ ބަސް އަހާ ގާބިލް ބޭފުޅެއް.
ގުއްބުއްދީން ހިކްމަތްޔާރް
22 January 2024
މުއިއްޒު މިހާރުވެސް ކައުންސިލަރެއް ދަމައިގަނެފި. މިދާމަގުން އާޒިމްވެސް ޖަހައިގަނެދާނެތީ ބިރުގަނޭ.
ބޭކާރުވާހަކަ
22 January 2024
ބުރިޖެއް ނެތްތާކު މާލޭމީހުން އުޅެން ބޭނުމެއް ނޫނޯ ބުނާއިރު ހުޅުމާލެ ނޫންތާކަށް ބުރިޖެއް އެބައޮތްތޯ. އަޅަންއުޅެ ނޭޅޭ ބުރިޖުވެސްއޮތީ ތިލަފުއްޓާހަމައަށް. އެހެންވީމާ މާލޭމީހުން ގިރާވަރު ފަޅަކަށްވެސް ނުދާނެތާދޯ..