ރައީސް ވިދާޅުވީ، ކިނބިދޫ-ވޭމަންޑޫ ކޯޒްވޭ ބިލާހެއްގެ ގޮތުގައި އޮތް އޮތުން ނިމުމަކަށް ގެނެސް ހަގީގަތަށް ހަދައިދޭނެ ކަަމަށް

ތ. ކިނބިދު އާއި ވޭމަންޑޫއާ ދެމެދު އަޅާ ކޯޒްވޭ ބިލާހެއްގެ ގޮތުގައި އޮތް އޮތުން ނިމުމަކަށް ގެނެސް، ހަގީގަތަކަށް ހައްދަވައި ދެއްވާނެ ކަމަށް ރައީސް ޑރ. މުހައްމަދު މުއިއްޒު މިއަދު ވިދާޅުވެއްޖެ އެވެ.

މިދިޔަ އަންގާރަ ދުވަހު ތ. އަތޮޅަށް ފެއްޓެވި ދަތުރުފުޅުގައި މިއަދު ކިނބިދޫގައި ވާހަކަފުޅު ދައްކަވަމުން ރައީސް ވިދާޅުވީ، ތަރައްގީ ބައްޓަން ކުރުމުގައި ދަތުރުފަތުރުގެ ނިޒާމު ވަރަށް މުހިންމު ދައުރެއް އަދާކުރާ ކަމަށާއި އެއް ރަށުން އަނެއް ރަށަށް އަދި އެއް އަތޮޅުން އަނެއް އަތޮޅަށް ދަތުރުކުރެވޭނެ ގޮތްތައް އޮތުމަކީ މުހިންމު ކަމެއް ކަމަށެވެ.

ރައީސް ވިދާޅުވީ، ރާއްޖޭގެ ރަށްރަށް ތަރައްގީ ކުުރުމުގައި ދަތުރުފަތުރުގެ ނިޒާމު ވައިގެ މަގުންނާއި ބްރިޖުތަކުން ގުޅައިލުމަށް އިސްކަން ދެއްވާނެ ކަމަށެވެ.

މި ރަށާއި ވޭމަންޑޫ ކޯޒްވޭއަކުން ގުޅާލުމަށް ކުރަން ޖެހޭ މަސައްކަތްތައް ނިމުމުން، ދެ ރަށް އެއްފަސްވާނެ ކަމުގެ ޔަގީންކަން ރައީސް މިއަދު މިއަދު ވެސް ވަނީ ދެއްވައިފަ އެވެ.

"ކޯޒްވޭއަކީ ބިލާހެއްގެ ގޮތުގައި އޮތް އޮތުން ނިމުމަކަށް އައިސް ހަގީގަތަކަށް އިރާދަކުރެއްވިއްޔާ ހަދައިދޭނަން،" ރައީސް ވިދާޅުވި އެވެ.

މި ދެ ރަށުގެ ދެމެދުގައި ކޯޒްވޭ އެޅުމަކީ ރައީސް މުއިއްޒުގެ ރިޔާސީ ވައުދެކެވެ. އެ މަނިކުފާނު މިއަދު ވިދާޅުވީ، ކެމްޕެއިންގައި ދެއްކެވީ ވޯޓު ހޯއްދެވުމުގެ ވާހަކަފުޅެއް ނޫން ކަމަށާއި އެ ދުވަހު ވެސް ދެއްކެވީ އެކަން ކުރެވޭނެ ކަމަށް ގަބޫލުފުޅު ކުރެވޭ އަދި ކޮށްދެއްވާނެ ކަންކަމުގެ ވާހަކަ ކަމަށެވެ.

ވޭމަންޑޫ-ކިނބިދޫގެ ކޯޒްވޭގެ އިތުރުން ތ. އަތޮޅުގައި މަޑިފުށީ-ދިޔަމގިލީ ކޯޒްވޭ އެޅުމަކީ ވެސް ރައީސް މުއިއްޒުގެ ރިޔާސީ ވައުދެކެވެ. ދެ ކޯޒްވޭގެ މަސައްކަތް ވެސް ނިންމައިދޭނެ ކަމަށް މިއަދު ވިދާޅުވި އެވެ.

ރަށްރަށުގެ މަޝްރޫއުތައް ހިންގުމުގައި ތަރުތީބު ކޮށްގެން ކުރިއަށް ގެންގޮސް، ހުރިހާ ކަމެއް ވެސް ނިންމައިދޭނެ ކަމަށް ރައީސް ވިދާޅުވި އެވެ. ވިދާޅުވީ، އެންމެ އިސްކަން ދެއްވާނީ ކޯޒްވޭ އަށް ކަމަށާއި އިތުރު ކަންކަން ތަރުތީބުގެ ތެރެއިން ނިންމައިދޭނެ ކަމަށެވެ.

ވޭމަންޑުއަކީ ތ. އަތޮޅުގައި ވެރިކަން ކުރާ ރަށަށް ވުމާ އެކު، ގިނަ ހިދުމަތްތައް ވެސް ގާއިމުވެފައި ހުރީ ވޭމަންޑޫގަ އެވެ. ވޭމަންޑު އާއި ކިނބިދޫ ގުޅައިލުމުގެ އެ މަޝްރޫއަކީ އެއް ރަށުން އަނެއް ރަށަށް ފަސޭހަކަމާއެކު ދަތުރުކޮށް، ދުމަތްތައް ލިބުމުގައި ލުއި ފަސޭހަ ކުރުމަށް ސަރުކާރުތަކުން އަބަދުވެސް ކުރިއަށް ގެންދާނެ ކަމަށް ބުނަމުން އައި މަޝްރޫއެކެވެ.

އެއް ފަޅެއްގައި އޮތް ވޭމަންޑު އާއި ކިނބިދޫގެ ދުރުމިނުގައި ހުންނަނީ 4.6 ކިލޯމީޓަރެވެ. ގުޅައިލާ ކޯޒްވޭ އެޅުމަށް އެ ދެ ރަށުގެ ދެމެދުގައި އޮތް ފަޅުރަށް، އެލާ ވަނީ މިދިޔަ ވެރިކަމުގައި ސަރުކާރަށް ނަގައިފަ އެވެ.