ވޭމަންޑޫ-ކިނބިދޫ ކޯޒްވޭގެ މަސައްކަތާ އެކު އެލާ ޓޫރިޒަމަށް ތަރައްގީކޮށްދޭނަން: ރައީސް

ތ. ކިނބިދު އާއި ވޭމަންޑޫ ގުޅާލުމަށް އަޅާ ކޯޒްވޭގެ މަސައްކަތް ކުރިއަށް ދާނީ އެ ދެ ރަށް ކައިރީ އޮންނަ އެލާ، އިންޓަގްރޭޓެޑް ޓޫރިޒަމް އައިލެންޑެއްގެ ގޮތުގައި ތަރައްގީކުރުމާ އެކު ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.

ކިނބުދޫ-ވޭމަންޑޫ ކޯޒްވޭގެ މަޝްރޫއުއަކީ ރައީސްގެ ރިޔާސީ ވައުދުފުޅެކެވެ.

ތ. އަތޮޅަށް ކުރައްވާ ދަތުރުފުޅުގައި، އެ އަތޮޅުގެ ވޭމަންޑޫ ރައްޔިތުންނާ ބައްދަލުކުރައްވައި ރައީސް ވިދާޅުވީ ކިނބިދު އާއި ވޭމަންޑޫގެ ދެމެދުގައި ހުރި ދުރުމިނަށް ބަލާއިރު ސަރުކާރުގެ ބަޖެޓުން ހޭދަކޮށްގެން ސީދާ ޕީއެސްއައި ޕްރޮޖެކްޓެއްގެ ގޮތުގައި އެ މަސައްކަތް ކުރިއަށް ގެންދިއުމަށް ވުރެ، ފައިދާ ބޮޑުވާނީ ކޮންޓްރެކްޓާ ފައިނޭންސިން އުސޫލު ފަދަ ގޮތަކަށް އެކަން ހިންގުމުން ކަމަށެވެ.

އެހެންވެ، މި މަހުގެ 22 ގައި ކޮންސްޓްރަކްޝަން މިނިސްޓްރީން އެކަމަށް އިއުލާންކޮށްފައިވާ ކަން ރައީސް ފާހަގަކުރެއްވި އެވެ.

"މި ދޭތެރޭގައި ދުރުމިން ހުރި ގޮތާއި މި ދެތެރޭގައި ކޯޒްވޭ އެޅުމަށް އެންމެ ފީޒިބަލްވާނެ ގޮތަކީ އަޅުގަނޑުމެންނަށް ފެންނަ ގޮތުގައި ސަރުކާރުގެ ބަޖެޓުން ސީދާ ޕީއެސްއައިޕީ ޕްރޮޖެކްޓެއްގެ ގޮތުގައި ގެންދިއުމުގެ ބަދަލުގައި މިގޮތަށް ކުރިއަށް ގެންދަން،" ރައީސް ވިދާޅުވި އެވެ.

ރައީސް ވިދާޅުވި ގޮތުގައި ކޯޒްވޭގެ މަޝްރޫއު ކުރިއަށް ގެންދާނީ އިންޓަގްރޭޓެޑް ޓޫރިޒަމް އައިލެންޑެއްގެ ގޮތުގައި، އެ ދެ ރަށް ދޭތެރޭގައި އޮންނަ އެލާގައި އިންވެސްޓްކުރަން ފުރުސަތު ލިބޭ ގޮތަށެވެ. އޭރުން އެ މަޝްރޫއު ނަގާ ފަރާތަކަށް ކޮރޮސް ސަބްސިޑީ މޮޑެލަކަށް އެކަން ކުރިއަށް ގެންދެވޭނެ ކަމަށާއި އެ ކުރާ އިންވެސްޓްމަންޓް ރިިކަވާ ކުރުމަށް އެހެން މޮޑެލްސްތައް ޕްރޮޕޯސްކުރެވޭ ގޮތަށް އިންވެސްޓާ ލޯން ފައިނޭންސް އާއި ކޮންޓްރެކްޓާ ފައިނޭންސް ފަދަ ކަންކަމަށް ވެސް ހުޅުވާލާފައިވާ ކަމަށް އެމަނިކުފާނު ވިދާޅުވި އެވެ.

ތ. އަތޮޅުގައި ޓޫރިޒަމް ކުރިއެރުވުމަކީ ވައުދުވެވަޑައިގަތް ގޮތަށް ކުރައްވާނެ ކަމެއް ކަމަށާއި އެއާއެކު، ކޯޒްވޭގެ ޕްރޮޖެކްޓަށް އިންވެސްޓްކުރާ ފަރާތްތަކުގެ ޝައުގުވެރިކަން ވެސް އުފެދިގެންދާނެ ކަމަށް ވިދާޅުވި އެވެ.

ޓޫރިޒަމް ނެތް ސަރަހައްދުތަކުގައި ޓޫރިޒަމް ކުރިއަރުވަން ތ. އަތޮޅާއި އިތުރު އެހެން ބައެއް އަތޮޅުތަކުގައި އިންވެސްޓްކުރަން މިދިޔަ ޖޫން މަހުގެ ތެރޭގައި، ދެ އަހަރު ދުވަހުގެ މުއްދަތަކަށް ޑިސްކައުންޓްތައް ދީފައިވާ ކަމަށް ރައީސް ވިދާޅުވި އެވެ. ވަރަށް ބޮޑެތި ލުއިތަކާ އެކު އިންވެސްޓްކުރަން ބޭނުންވާ ފަރާތްތަކަށް ރޭޓުތައް ބޮޑުތަނުން ދަށްކުރައްވާފައިވާ ކަަމަށް ރައީސް ވިދާޅުވި އެވެ.

އެ ލުއިތަކާ އެކު، ރައީސް ވިދާޅުވި ގޮތުގައި، ބައެއް ފަރާތްތަކުން ޓޫރިޒަމަށް އިންވެސްޓްކުރަން ވަނީ ހުށަހަޅައިފަ އެވެ.

"އިރާދަކުރެއްވިއްޔާ މި ދިން ލުއިތަކުގެ ބޭނުންކޮށްގެން މި އަތޮޅުގައި ޓޫރިޒަމް ފައްކާވާނެ،" ރައީސް ވިދާޅުވި އެވެ.

ވޭމަންޑުއަކީ ތ. އަތޮޅުގައި ވެރިކަން ކުރާ ރަށަށް ވާތީ، ގިނަ ހިދުމަތްތައް ވެސް ގާއިމުވެފައި ހުރީ އެ ރަށުގަ އެވެ. ދެ ރަށް ގުޅުވާލާ ކޯޒްވޭގެ ސަބަބުން އެއް ރަށުން އަނެއް ރަށަށް ފަސޭހަކަމާއެކު ދަތުރުކޮށް، ހިދުމަތްތައް ލިބުމުގައި ލުއި ފަސޭހަވާނެ އެވެ.

ވޭމަންޑޫ-ކިނބިދޫގެ ކޯޒްވޭގެ އިތުރުން ތ. މަޑިފުށީ-ދިޔަމގިލީ ކޯޒްވޭ އެޅުމަކީ ވެސް ރައީސް މުއިއްޒުގެ ރިޔާސީ ވައުދެކެވެ. ދެ ކޯޒްވޭގެ މަސައްކަތް ވެސް ނިންމައިދޭނެ ކަމަށް މިދިޔަ އަހަރުގެ ކުރީކޮޅު ތ. އަތޮޅަށް ކުރެއްވި ދަތުރުފުޅުގައި ރައީސް ވިދާޅުވެފައިވެ އެވެ.