ސްވިމިންގެ ގިނަ ރެކޯޑްތަކެއް، މީ ކުރިން ވާސިލު ނުވެއޮތް ރާސްތާއެއް

މިދިޔަ މަހު ގައުމީ ޓީމުގެ ފެތުންތެރިން 20 ރެކޯޑެއް މުގުރާލި އެވެ. އޭގެ ކުރިން ޖެނުއަރީ މަހު ލަންކާގައި ބޭއްވި މުބާރާތުން ދިވެހި އެތުލީޓުން ގިނަ މެޑަލްތަކެއް ހޯދި އެވެ.

ރާއްޖޭގެ އުންމީދީ ފެތުންތެރިޔާ މެރާލް އާއިން ލަތީފު ވަނީ ލަންކާގެ މުބާރާތުން ރަން މެޑަލް ވެސް ހޯދައިފަ އެވެ. ދިވެހި ޓީމުން ވަނީ ޖުމުލަ 15 މެޑަލް ހޯދައިފަ އެވެ. އެއީ ހަ ރިހި މެޑައްޔާއި އަށް ބްރޯންޒް މެޑަލް އެވެ.

އަހަރުގެ ފުރަތަމަ ދެ މަހު، ފެތުންތެރިން މި ހޯދި ކުރިއެރުންތަކަކީ ރާއްޖޭގެ ސްވިމިންގެ ތަޖުރިބާކާރުން ބުނާ ގޮތުގައި މީގެ ކުރިން ހާސިލު ނުވެ އޮތް ކަމެކެވެ.

ސްވިމިން އެސޯސިއޭޝަންގެ ސީނިއާ އޮފިޝަލަކު ވިދާޅުވީ މީގެ ކުރިން މިއަށް ވުރެ ގިނަ މުބާރާތްތަކުގައި ވެސް ފެތުންތެރިން ވާދަކޮށްފައިވާ ކަމަށެވެ. ނަމަވެސް އެ މުބާރާތްތަކުން މިހާ ގިނަ ރެކޯޑްތަކެއް ހެދިފައި ނެތް ކަމަށް ވިދާޅުވި އެވެ. ވިހި ރެކޯޑް ހެދި ތިން މުބާރާތުންނެވެ.

މުގުރާނުލެވި ގިނަ އަހަރުތަކެއް ވީ ރެކޯޑްތަކެއް ވެސް ފެތުންތެރިން ވަނީ މުގުރާލައިފަ އެވެ. އުމުރުން ހަގު އެތުލީޓުން ވެސް ދޫ ނުދީ ބޮޑެތި ކުރިއެރުންތަކެއް ހޯދި އެވެ.

ސްވިމިން - އަހަރުގެ ފުރަތަމަ ދެ މަހުގެ ސްޓޭޓަސް

- ފެބްރުއަރީ މަހު 20 ރެކޯޑް

- ޖެނުއަރީ މަހު 1 ރަން މެޑަލް

- ޖެނުއަރީ މަހު ހަ ރިހި މެޑައްޔާއި އަށް ބްރޯންޒް މެޑަލް

- ޖެނުއަރީ މަހު ޖުމުލަ 15 މެޑަލް

އެސޯސިއޭޝަނުގެ ތަޖުރިބާކާރު އޮފިޝަލް ވިދާޅުވި ގޮތުގައި، އެތުލީޓުންގެ މި ކުރިއެރުން ފާހަގަ ކުރެވޭ މައިލް ސްޓޯންއަކާ ހަމައަށް ދިއުމުގެ އެންމެ ބޮޑު ސަބަބަކީ އިންޑޯ ސްވިމިން ޕޫލްގައި ޕްރެކްޓިސް ކުރަން ފުރުސަތު ލިބުމެވެ.

ހުޅުމާލޭ ސްޕޯޓްސް ކޮމްޕްލެކްސްގައި ހުންނަ އިންޑޯ ޕޫލަކީ އިންޓަނޭޝަލް ސްޓޭންޑަޑަށް ފެތޭ ތަނެއް ނޫނެވެ. އެ ދިގުމިނާއި ފުޅާމިން އަދި އެ ފުންމިނެއް ވެސް އެ ޕޫލުގައި ނެތެވެ. އެކަމަކު އަހަރުތަކެއް ވަންދެން މޫދުގައި ޕްރެކްޓިސް ކުރަން ޖެހުން ނިމުމަކަށް އައީ އެ ޕޫލެވެ.

ގައުމީ ޓީމުގެ ޓްރޭނިންތަކަށް އެ ޕޫލް ބޭނުން ކުރާތާ މި ވީ އަދި ފަސް ވަރަކަށް އަަހަރެވެ. ބޮޑު ދިޔަވަރާއި ޕްލެޓްފޯމަށް ގުޑުން އަރުވާލާ ރާޅުތަކުގެ ތެރޭގައި ޕްރެކްޓިސް ކުރުމަށް ފަހު ޕޫލަކަށް ފީނާލަން އޭރު ފެތުންތެރިންނަށް ފުރުސަތު ލިބެނީ އިންޓަނޭޝަނަލް މުބާރާތެއްގަ އެވެ. ނުވަތަ މުބާރާތެއް ކައިރި ވުމުން ކައިރިވުމުން ތަމްރީނުކޮށްލުމަށެވެ. އެކަން ކުރަން ވެސް އޭރު ދާން ޖެހުނީ ބޭރު ގައުމަކަށެވެ.

"މިހާ ބޮޑު ކުރިއެރުމެއް މި ފާހަގަ ކުރެވުނީ ހަގީގަތުގައި ޕޫލް. ދާއިމީކޮށް ޕޫލުގައި ޕްރެކްޓިސް ކުރެވެން ފެށި އެވްރެޖްކޮށް ކުރު މުއްދަތެއްގެ ތެރޭގައި މި ތަފާތު ފެނިގެން މިދިޔައީ،" ސްވިމިން އެސޯސިއޭޝަންގެ އޮފިޝަލް ބުންޏެވެ.

ދެން ފެތުންތެރިންނަށް އޮތް ހުވަފެނަކީ އަމިއްލަ ގައުމުގައި ތިބެ އިންޓަނޭޝަނަލް ސްޓޭންޑަޑަށް ފެތޭ ޕޫލެއްގައި އެ ދިގުމިނާއި އެ ފުޅާމިން އަދި އެ ފުންމިން ލިބޭ ޕޫލެއްގައި ޕްރެކްޓިސްކޮށްލުމެވެ. ހުޅުމާލޭ ސްޕޯޓްސް ކޮމްޕްލެކްސްއާ ޖެހިގެން ދެކުނަށް އޮތް ބިން ވަނީ އެ ޕޫލް އެޅުމަށް ސްވިމިން އެސޯސިއޭޝަނާ ހަވާލު ކޮށްފަ އެވެ.

އެކަމަކު އަދި ވެސް މަސައްކަތް ނުފަށަ އެވެ. މުޅި ތަން ވަށައިގެން ޓިނު ޖަހައި ބައްދާލުން ފިޔަވައި މަސައްކަތާ ގުޅޭ އިތުރު އެއް ވެސް ކަމެއް ކޮށްފައެއް ނެތެވެ.