ރީޖަނަލް އެއާޕޯޓްސް ކޮމްޕެނީ (އާރްއޭސީއެލް)ގެ ދަށުން އޮޕަރޭޓްކުރާ ހަނިމާދޫ އިންޓަނޭޝަނަލް އެއާޕޯޓުގައި އެއް އަހަރު ދުވަހުގެ މެދުކެނޑުމަކަށް ފަހު އިންޓަނޭޝަނަލް ދަތުރުތައް އަލުން ފަށައިފި އެވެ.

ހަނިމާދޫ އެއާޕޯޓުގެ އިންޓަނޭޝަނަލް ދަތުރުތަކަށް މެދުކަނޑާލަން ޖެހުނީ އެއާޕޯޓު ތަރައްގީކުރުމަށް ފެށި ޕްރޮޖެކްޓު އަވަހަށް ނިންމަން، އެ ތަން އޮޕަރޭޓްކުރާ ގަޑިތަކަށް ގެނައި ބަދަލުތަކުގެ ސަބަބުންނެވެ. ހަނިމާދޫ އެއާޕޯޓުގައި މެދުކެނޑުމަކަށް ފަހު ފެށި ދަތުރުތައް އޮންނާނީ ހަފްތާއަކު ދެ ދުވަހު އެވެ.

ހަނިމާދޫ އެއާޕޯޓު ތަރައްގީކުރުމުގެ ޕްރޮޖެކްޓުގެ ދަށުން އެ ތަނުގައި އަޅާމުންދާ 2،465 މީޓަރުގެ އާ ރަންވޭގެ 1،200 މީޓަރުގެ މަސައްކަތް މިހާރު ވަނީ ނިމިފަ އެވެ. އަދި މިދިޔަ ހުކުރު ދުވަހު އާ ރަންވޭގެ ނިމުނު ބައި ރަސްމީކޮށް ވަނީ ހުޅުވައިފަ އެވެ.

އާރްއޭސީއެލް އިން ބުނީ އާ ރަންވޭގެ ނުނިމި ހުރި މަސައްކަތްތައް މި މަހުގެ ތެރޭގައި ނިނޭނެ ކަމަށެވެ.