"ކްރިޝް 4"ގެ ލީޑަށް ރިތިކްއާ އެކު ޝްރައްދާ

ބޮލީވުޑްގެ ތަރި ޝްރައްދާ ކަޕޫރާއި ރިތިކް ރޯޝަން.

19 އޯގަސްޓް 2024 - 06:01

ބޮލީވުޑްގެ ސުޕަހީރޯ ފިލްމު ފްރެންޗައިޒް "ކްރިޝް"ގެ ހަތަރު ވަނަ ފިލްމުގައި ރިތިކް ރޯޝަންއާ އެކު ލީޑު ރޯލުން ފެންނާނީ ޝްރައްދާ ކަޕޫރް ކަމަށް ރިޕޯޓްތައް ބުނެފި އެވެ.

ޓައިމްސް ނައުގައި ބުނެފައިވާ ގޮތުގައި އެ ރޯލު މިހާރު ވަނީ ޝްރައްދާއަށް ހުށަހަޅައިފަ އެވެ. އަދި އޭނާ އެ ރޯލު ކުޅެން އެއްބަސްވި ކަމަށް ވެސް ބުންޏެވެ.

ނަމަވެސް، ފިލްމުގެ ޓީމުން މި ޚަބަރު އަދި ކަށަވަރުކޮށް ނުދެ އެވެ.

މި ރޯލު ވަނީ "ކްރިޝް 2 އަދި 3"ގައި ލީޑު ރޯލު ކުޅުނު ޕްރިޔަންކާ ޗޯޕްރާއަށް ވެސް ކުރިން ހުށަހަޅައިފަ އެވެ. ނަމަވެސް އޭނާ ބިޒީކަމުން ހަތަރު ފިލްމުގައި މި ރޯލު ކުޅެވެން ނެތްކަން މިހާރު އަންގާފައިވާ ކަމަށް ރިޕޯޓްތައް ބުންޏެވެ.

އެ ފިލްމުގެ ސްކްރިޕްޓް ލިޔުމުގެ މަސައްކަތް މިހާރު ވަނީ ނިމިފަ އެވެ. ސްކްރިޕްޓް ލިޔަނީ ފުރަތަމަ ތިން ފިލްމުގެ ސްކްރިޕްޓް ވެސް ލިޔުނު، ރިތިކްގެ ބައްޕަ ރާކޭޝް ރޯޝަން އެވެ. އަދި މިފަހަރު ވެސް ޑައިރެކްޓަރަކީ ހަމަ އޭނާ އެވެ.

"ކްރިޝް" ފްރެންޗައިޒްގެ ފިލްމުތައް ފެށީ މީގެ 20 އަހަރު ކުރިންނެވެ. އެންމެ ފުރަތަމަ ގެނެސްދިން ފިލްމަކީ "ކޮއި މިލް ގަޔާ" އެވެ. އެ ފްރެންޗައިޒްގެ ދެވަނަ ފިލްމު "ކްރިޝް" ގެނެސްދިނީ 2006 ގަ އެވެ. އަދި ތިންވަނަ ފިލްމު ގެނެސްދިނީ 2013 ވަނަ އަހަރުގަ އެވެ. އެ ތިން ފިލްމަށް ވެސް ބޮޑު ތަރުހީބެއް ލިބުނެވެ.

ޝްރައްދާގެ އާ ފިލްމު "ސްތުރީ 2" މިހާރު އަންނަނީ ސިނަމާތަކުގައި ދައްކަމުންނެވެ. އެ ފިލްމަށް ވަނީ ބޮޑު ތަރުހީބެއް ލިބިފަ އެވެ. މިދިޔަ ބުރާސްފަތި ދުވަހު ސިނަމާތަކުގައި ދައްކަން ފެށި އެ ފިލްމަށް ވަނީ ބޮކްސް އޮފީހުގައި އެންމެ ތިން ދުވަހުގެ ތެރޭގައި 135 ކްރޯޑް ރުޕީސް (16 މިލިއަން ޑޮލަރު) ލިބިފަ އެވެ.