މާފަންނު ސަހަރާ ހުސްކުރުމުގެ މަސައްކަތް ފަށައިފި

މާފަންނު ސަހަރާގެ ގަބުރުތައް ނަގައި، އެ ބިން އެއްކޮށް ހުސްކުރުމުގެ މަސައްކަތް މާލޭ ސިޓީ ކައުންސިލުން ފަށައިފި އެވެ.

މާލޭ ސިޓީ ކައުންސިލްގެ މީޑިއާ އޮފިޝަލް އައިމިނަތު ޝަތުފާ ވިދާޅުވީ މާފަންނު ސަހަރާ ހުސްކުރުމުގެ މަސައްކަތް އަމިއްލަ ބަޔަކާ ހަވާލުކޮށް، އަމަލީ މަސައްކަތް މިދިޔަ ހަފުތާގައި ފަށާފައިވާ ކަމަށެވެ.

މާފަންނު ސަހަރާ ހުސްކުރަން އެ ސަހަރާގެ އެއްބައި މިހާރު އޮތީ ޓިނާއި ދާ ޖަހައިގެން ބަންދުކޮށްފަ އެވެ.

އިސްލާމިކް މިނިސްޓްރީގެ ބަހެއް ނުލިބޭތީ އެ ސަހަރާއިން ނަގާ މިނިކަށިތައް ގެންދަނީ ކޮންތާކަށް ކަމެއް އަދި ނޭނގެ އެވެ. ސިޓީ ކައުންސިލުން ބުނި ގޮތުގައި، އެ އެއްޗެހި ގެންދާނެ ތަނެއް ނިންމާނީ އިސްލާމިކް މިނިސްޓްރީންނެވެ.

މާފަންނު ސަހަރާ ހުސްކޮށްދޭނެ ބަޔަކު ހޯދަން ސިޓީ ކައުންސިލުން އިއުލާންކުރީ މިދިޔަ އޮގަސްޓް މަހު އެވެ. އެތަން ހުސްކުރުމުގެ މަސައްކަތް ކުރަން ޖެހޭނީ އެ ކައުންސިލާއި އިސްލާމިކް މިނިސްޓްރީން ކަނޑައަޅާފައިވާ އުސޫލާ އެއްގޮތަށް އަދި މައުލޫމާތު ކަރުދާހުގައިވާ މިންގަނޑުތަކާއި އެއްގޮތަށް ކަމަށް ވެސް އެ އިއުލާނުގައި ބުނެފައިވެ އެވެ.

ސިޓީ ކައުންސިލުން ކުރިން ބުނި ގޮތުގައި، ހުސްކުރަނީ މާފަންނު ސަހަރާގެ 36،153 އަކަފޫޓްގެ ސަރަހައްދެކެވެ. އެއީ މުޅި ސަހަރާގެ ބިމެވެ.

މީގެ ކުރިން ވެސް ބައެއް ސަހަރާތައް އެކި ބޭނުންތަކަށް ހުސްކޮށްފައިވެ އެވެ. އޭގެ ތެރޭގައި މާފަންނު ސަހަރާގެ އިތުރުން ހެންވޭރު ސަހަރާ އާއި މައްޗަންގޮޅި ސަހަރާގެ ބައެއް ވެސް ހިމެނެ އެވެ. އެ ތަންތަން ހުސްކޮށް، ކަށިތައް ނަގައި އެހެން ތަނަކަށް ގެންގޮސް ވަޅުލި އެވެ.

މާފަންނު ސަހަރާ ހުސްކުރަން އެ ތަނުގެ އެތެރޭގެ ބައެއްގައި ދާ ޖަހައިގެން ބަންދުކޮށްފައި.-- ފޮޓޯ: ނިޝާން އަލީ | މިހާރު

ސަހަރާތަކުން ގަބުރު ހުސްކުރުމާ ގުޅޭ ގޮތުން، އިސްލާމީ ފަތުވާދޭ އެންމެ މަތީ މަޖިލީހުން 2017ގައި ރައުޔު ނެރެފައިވެ އެވެ. އެ މަޖިލީހުގައި އޭރު ތިއްބެވި ދީނީ އިލްމުވެރިން އިއްތިފާގުވެފައި ވަނ،ީ މާލެ އާއި އަތޮޅު ތެރޭގެ ރަށްރަށުގައި ހުރ،ި ދުވަސްވެ އިންދިރާސްވެފައިވާ ގަބުރުސްތާނުތައް އިހްތިރާމާ އެކު ކޮނެ، އެ ތަންތަނުން ފެންނަ މިނިކަށިތައް އިހްތިރާމާ އެކު އެހެން ގަބުރުސްތާނެއްގައި ވަޅުލުމަށް ފަހު އެ ގަބުރުސްތާންތަކުގެ ބިން، އާންމު މަސްލަހަތު ހިމެނޭ ކޮންމެ ކަމެއްގައި ބޭނުން ކުރެވިދާނެ ކަމަށެވެ.

މާފަންނު ސަހަރާ އެއްކޮށް ހުސްކުރަނީ އެ ތަނުގައި ޕާކިން ބިލްޑިންއެއް އެޅުމަށެވެ.

މިހާރުގެ ރައީސް ޑރ. މުހައްމަދު މުއިއްޒު މާލޭގެ މޭޔަރަކަށް ހުންނެވިއިރު އެ މަސައްކަތް ފެށި ނަމަވެސް އޭރު ދައުލަތުން އެ ބިން ސިޓީ ކައުންސިލާ ހަވާލުނުކޮށްގެން އެ މަސައްކަތް އޮތީ ނުފެށި އެވެ.

މާފަންފު ސަހަރާއަކީ މީހުން ވަޅު ނުލާތާ ވަރަށް ގިނަ ދުވަސް ވެފައިވާ ތަނެކެވެ. އެ ސަހަރާގެ ހުޅަނގު ފަރާތުން މަޖީދީމަގަށް ވާ ގޮތަށް މިހާރު ވެސް ޕާކިން ޒޯނެއް އޮތީ ހަދައިފަ އެވެ. އެއީ ވެސް ބައެއް ގަބުރުތައް ނަގައި، އެތަން ހުސްކުރުމަށް ފަހު އެވެ.

Maafannu saharaa ge gaburu thah nagai ethan huskoddheyne bayaku hoadhanee

The most trusted news source in the Maldives

Mihaaru

އެ ސަހަރާ ހުސްކުރާނެ ބަޔަކު ހޯދަން ސިޓީ ކައުންސިލުން އިއުލާންކުރުމުން ތާރީހު ދިރާސާކުރައްވާ ބައެއް ބޭފުޅުން ކަންބޮޑުވުން ވެސް ފާޅުކުރެއްވި އެވެ. އެއީ އެ ސަހަރާގައި ނޮވެމްބަރު 3، 1988 ގެ ޓެރަރިސްޓް ހަމަލާގައި ޝަހީދުވި އާންމުންގެ ބައެއް މީހުންގެ މަހާނަތައް އެ ތަނުގައި ހުރުމުންނެވެ.