ދުންފަތާ ދެކޮޅަށް ނަތީޖާ ނެރެވޭނެ ހަތަރު އަހަރުގެ ޕްލޭނެއް އެކުލަވާލަނީ

ދުންފަތުގެ އިސްތިއުމާލުކުރުމުގެ މައްސަަލަ އަށް ދާއިމީ ހައްލެއް ހޯދުމަށް، ފިޔަވަހިތަކަކަށް ބަހާލައިގެން، ކުރިއަށް އޮތް ހަތަރު އަހަރުގެ ތެރޭގައި ފާހަގަކުރެވޭ ރަނގަޅު ނަތީޖާއެއް ހާސިލް ކުރެވޭނެ ޕްލޭނެއް އެކުލަވާލައި ކެބިނެޓަށް ހުށަހަޅުއްވަން ރައީސް ޑރ. މުހައްމަދު މުއިއްޒު ނިންމަވައިފި އެވެ.

ރައީސް އޮފީހުން މިރޭ ބުނީ، އެ ޕްލޭން ހުށަހަޅުއްވާނީ މި މަހުގެ 27 ގައި ބާއްވާ ކެބިނެޓްގެ ބައްދަލުވުމަށް ކަމަށެވެ. އެއީ ކެބިނެޓްގެ ލަފާގެ މަތިން ކުރައްވާ ކަމެއް ކަމަށް އެ އޮފީހުން ބުންޏެވެ.

ރައީސް އޮފީހުން ބުނިގޮތުގައި ރައީސް މުއިއްޒު އެގޮތަށް ނިންމެވީ އިއްޔެ ބޭއްވި ކެބިނެޓްގެ ބައްދަލުވުމުގައި މަޝްވަރާ ކުރެއްވުމަށް ފަހު އެވެ.

އެ ބައްދަލުވުމުގައި ވަނީ ދުންފަތާ ދުރު މުޖުތަމައުއެއް ބިނާކުރުމަށް އިޖުތިމާއީ ގޮތުން ހަރަކާތްތެރިވާ ފަރާތްތަކާއި ދުންފަތުގެ އިސްތިއުމާލުނުކުރާ ރަށްރަށް ފާހަގަކުރުމަށް އިނާމެއް ތައާރަފުކުރަން ނިންމައިފަ އެވެ.

ރައީސް އޮފީހުން ބުނީ، އެ އިނާމު ލިބޭ ރަށެއްގެ އިޖުތިމާއީ ކަމަކަށް މާލީ އެހީތެރިކަން ދިނުން ފަދަ ކަންކަން ހިމަނައިގެން މާސްޓަ ޕްލޭން އެކުލަވައިލުމަށް ރައީސް ނިންމަވާފައިވާ ކަމަށެވެ. އެ ޕްލޭންގައި، ދުންފަތާ ދުރުހެލިވާން ބޭނުންވާ މީހުންނަށް ކޮންމެ ރަށެއްގެ ސިއްހީ ހިދުމަތް ދޭ މަރުކަޒަކުން ހާއްސަ ފަރުވާ ހިލޭ ފޯރުކޮށްދޭން ހިމަނާނެ ކަމަށް ރައީސް އޮފީހުން ބުންޏެވެ.

ދުންފަތުގެ އިސްތިއުމާލުކުރުމުގެ މައްސަލައަށް ދާއިމީ ހައްލެއް ގެނައުމަށް މާސްޓަ ޕްލޭނެއް އެކުލަވައިލުމުގެ މަސައްކަތް ކުރަމުން އަންނައިރު ރާއްޖެ އަށް ވޭޕް އެތެރެ ކުރުމާއި ބޭނުންކުރުން މަނާކުރަން ރައީސް މުއިއްޒު ވަނީ ނިންމަވައިފަ އެވެ.

އެކްސްގައި އެކަން އިއުލާންކުރައްވައި ރައީސް މިދިޔަ ހޯމަ ދުވަހު ވިދާޅުވީ، ވޭޕްކުރަން ބޭނުންކުރާ ތަކެއްޗާއި އޭގެ ވަކިވަކި ބައިތައް އަންނަ މަހުގެ 15 ވަނަ ދުވަހުން ފެށިގެން ރާއްޖެ އެތެރެކުރުން މަނާކުރުމަށް އަޅަން ޖެހޭ ފިޔަވަޅުތައް އަޅަން ކަމާ ބެހޭ ފަރާތްތަކަށް އަންގަވާފައިވާ ކަމަށެވެ. ވޭޕްކުރާ ތަކެތި ބޭނުންކުރުމާއި ގެންގުޅުމާއި އުފެއްދުމާއި ވިއްކުމާއި އިޝްތިހާރު ކުރުމާއި ހިލޭ ބެހުން އަންނަ ޑިސެމްބަރު 15 އިން ފެށިގެން މަނާކުރުމަށް ބަދަލުތައް ގެނައުމަށް ވެސް އެ މަނިކުފާނު އެންގެވި އެވެ.

Raajjeygai vape manaa kurumaa gulhey islaahu thah mi hafthaagai Majleehah hushahalhanee

The most trusted news source in the Maldives

Mihaaru

ވޭޕް މަނާކުރުމަކީ ދުންފަތުގެ ބާވަތްތަކާ ދެކޮޅަށް މި ފަހުގެ ތާރީހުގައި ރާއްޖޭގެ ރައީސަކު އެޅުއްވި އެންމެ ހަރުކަށި ފިޔަވަޅެވެ.

ރައީސް މުއިއްޒު ވަނީ ސިނގިރޭޓާއި ބިޑިއަށް ނަގާ އިމްޕޯޓް ޑިއުޓީގެ ސްޕެސިފިކް ރޭޓް ތިން ރުފިޔާއިން އަށް ރުފިޔާއަށް ބޮޑުކުރުމާ އެކު ދުންފަތުން ނަގާ އެޑްވަލޮރަމް ރޭޓް 50 ޕަސެންޓް މަތިކުރުން ވެސް ނިންމަވައިފަ އެވެ.

އެ ބަދަލުތައް ގެންނަން މި ހަފުތާގައި މަޖިލީހަށް ފޮނުވާނެ ކަމަށް ރައީސް ވިދާޅުވެ އެވެ.