ވ. އަތޮޅުގައި ހިންގަމުން އަންނަ ސިނަމަން ވެލިފުށި މޯލްޑިވްސް ރިސޯޓުގައި ޗުއްޓީ ހޭދަކުރަމުންދިޔަ ޓޫރިސްޓަކު ގެނބިގެން މަރުވެއްޖެ އެވެ.
ގެނބިގެން މިއަދު މަރުވީ ބެލަރޫސްގެ 64 އަހަރުގެ އަންހެނެކެވެ.
އެނގިފައިވާ ގޮތުގައި، އެ މީހާއަކީ ދިހަ ވަރަކަށް މީހުންނާ އެކު އެ ރިސޯޓަށް ޗުއްޓީ ހޭދަކުރަން ގޮސް އުޅުނު މީހެކެވެ.
އެމީހާ ގެނބިގެން ފަރުވާއަށް ގެންދިޔައީ ވ. ފެލިދޫގައި ހުންނަ އެ އަތޮޅު ހޮސްޕިޓަލަށެވެ. އެކަމަކު ހޮސްޕިޓަލުގެ ބަހެއް ނުލިބޭތީ، އޭނާ މަރުވީ އެތަނަށް ގެންދިޔަ ފަހުން ކަމެއް ނުވަތަ ނޫން ކަމެއް އަދި ނޭނގެ އެވެ.
އެނގިފައިވާ ގޮތުގައި އޭނާގެ ހަށިގަނޑު މާލެ ގެނައުމުގެ މަސައްކަތް މިހާރު އަންނަނީ ކުރަމުންނެވެ.
އެހެން ދެ ރަށެއްގައި ޗުއްޓީ ހޭދަކުރަމުން އައި ދެ ޓޫރިސްޓަކު ވެސް މި މަހު ވަނީ ގެނބިގެން މަރުވެފަ އެވެ. އެއީ ޗައިނާގެ ދެ ޓޫރިސްޓުންނެވެ.
