މިލާން ފުރަތަމަ މޮޅު ހޯދިއިރު 16 އަހަރުގެ ކަމަރްޑާ އަށް ރެކޯޑެއް

ޔުއެފާ ޗެމްޕިއަންސް ލީގުގައި ބެލްޖިއަމްގެ ކްލަބް ބްރޫގާ އަތުން 3-1 އިން މޮޅުވެ އިޓަލީގެ އޭސީ މިލާނުން ފުރަތަމަ މޮޅު ހޯދިއިރު، އެ ޓީމުގެ އުމުރުން 16 އަހަރުގެ ފޯވާޑް ފްރެންޗެސްކޯ ކަމަރްޑާ، މުބާރާތުގައި ކުޅުނު އިޓަލީގެ އެންމެ ހަގު ކުޅުންތެރިޔާގެ ރެކޯޑް ހަދައިފި އެވެ.

އިނގިރޭސި ފޯވާޑް ޓެމީ އަބްރަހަމް އަނިޔާގައި ހުރުމުން ބަދަލުގައި ސީނިއާ ޓީމުން ރޭގެ މެޗުގައި ފުރުސަތު ދިން މިލާނުގެ ޔޫތު ޓީމުގެ ފޯވާޑް ކަމަރްޑާ ކުޅެން އެރީ 75 ވަނަ މިނެޓުގަ އެވެ. އޭނާ ގޯލެއް ޖަހައި، މުބާރާތުގެ ތާރީހުގައި ލަނޑު ޖެހި އެންމެ ހަގު ކުޅުންތެރިޔާގެ ޝަރަފް ހޯދުމާ ގާތަށް ވެސް ދިޔަ އެވެ. އެކަމަކު ވީއޭއާރް އިން ބެލުމަށް ފަހު ރެފްރީ ނިންމީ އެއީ އޮފްސައިޑް ގޯލެއް ކަމަށެވެ.

މުބާރާތުގައި ކުޅުނު އިޓަލީ އަށް އުފަން އެންމެ ހަގު ކުޅުންތެރިޔާގެ ރެކޯޑް ކުރިން އޮތީ ޔުވެންޓަސްގެ ކުރީގެ ފޯވާޑް މޮއިސް ކީންގެ އަތުގަ އެވެ. އެ ރެކޯޑް މުގުރާލި ކަމަރްޑާ އަކީ އިޓާލިއަން ލީގުގައި އެންމެ ހަގު އުމުރެއްގައި ކުޅުމުގެ ޝަރަފް ވެސް އޮތް ކުޅުންތެރިޔާ އެވެ. އޭނާ އެ ރެކޯޑް ހެދީ މިދިޔަ ސީޒަނުގަ އެވެ.

މި އަހަރުގެ ޔުއެފާ 17 އަހަރުން ދަށުގެ މުބާރާތް އިޓަލީ އަށް ކާމިޔާބުކޮށްދީ މުބާރާތުގެ މޮޅު ކުޅުންތެރިޔާގެ މަގާމު ވެސް ހޯދި ކަމަރްޑާ މި ސީޒަނުގައި ރަސްމީކޮށް ކުޅެނީ އިޓަލީގެ ތިން ވަނަ ޑިވިޝަނުގައި ވާދަކުރާ މިލާނުގެ ޔޫތު ޓީމުގަ އެވެ.

ރޭ ސެންސީރޯގައި ބްރޫގާއާ ދެކޮޅަށް މިލާން ކުޅުނު މެޗުގައި އެ ޓީމުގެ ފުރަތަމަ ގޯލް 34 ވަނަ މިނެޓުގައި ޖެހީ އެމެރިކާ ފޯވާޑް ކްރިސްޓިއަން ޕުލިސިކް އެވެ. އާދަޔާހިލާފު ފޯމެއްގައި ހުރި ޕުލިސިކް މި ގޯލު ޖެހީ ސީދާ ކޯނަރަކުންނެވެ. އޭގެ ހަ މިނެޓު ފަހުން ބްރޫގާގެ ރަފައެލް އޮނީއެޑިކާ ކުރި ނުރައްކާތެރި ފައުލަކާ ގުޅިގެން ސީދާ ރަތްކާޑެއް ރެފްރީ ދެއްކި އެވެ.

އެކަކު މަދުކޮށް ކުޅުނު ނަމަވެސް ބްރޫގާ އިން ދެ ވަނަ ހާފުގެ ކުރީކޮޅު މެޗު ޑޮމިނޭޓްކޮށް 51 ވަނަ މިނެޓުގައި ކީރިއާނީ ސައްބޭގެ ގޯލުން އެއްވަރުކުރި އެވެ. އެކަމަކު ޓިޖާނީ ރެއިންޑާސްގެ ކައިރިކައިރީގައި ވައްދާލި ދެ ގޯލާ އެކު މިލާން ވަނީ އަލުން ކުރި ހޯދައި ތިން ޕޮއިންޓް ކަށަވަރުކޮށްފަ އެވެ.

މިލާން ވަނީ ފުރަތަމަ ކުޅުނު ދެ މެޗުން އިންގްލެންޑުގެ ލިވަޕޫލާއި، ޖަރުމަނުގެ ޗެމްޕިއަން ބެޔާ ލެވަކޫސަން އަތުން ބަލިވެފަ އެވެ.

މުބާރާތުގައި ރޭ އިޓަލީގެ ޔުވެންޓަސް ވަނީ ޖަރުމަނުގެ ވީއެފްބީ ސްޓުޓްގާޓް އަތުން 1-0 އިން ބަލިވެފަ އެވެ. މިއީ އާ ކޯޗު ތިއާގޯ މޮޓާގެ ކޯޗުކަމުގައި މި ސީޒަނުގައި ޔުވެންޓަސް ބަލިވި ފުރަތަމަ މެޗެވެ. ޔުވެންޓަސްގެ ކެޕްޓަން ޑަނީލޯ އަށް 84 ވަނަ މިނެޓުގައި ރަތްކާޑު ދައްކާފައިވަނިކޮށް، ސްޓުޓްގާޓް މި މެޗުން މޮޅުވި ގޯލް ޖެހީ އިތުރު ވަގުތުގެ ތެރޭގަ އެވެ. މި ލަނޑު ކާމިޔާބުކުރީ އެލް ބިލާލް ޓޫރޭ އެވެ.

ފުރަތަމަ މެޗުން ނެދަލެންޑްސްގެ ޕީއެސްވީ އެއިންދޯވެން އަތުން އަދި ދެ ވަނަ މެޗުން ޖަރުމަނުގެ އާރްބީ ލީޕްޒިގް އަތުން މޮޅުވި ޔުވެންޓަސް އޮތީ ހަ ޕޮއިންޓާ އެކު ތާވަލުގެ 11 ވަނައިގަ އެވެ. އެއް ވަނައިގައި ނުވަ ޕޮއިންޓާ އެކު އޮތީ އިންގްލެންޑުގެ އެސްޓަން ވިލާ އެވެ.