މާޒިޔާ ލީޑު ނަގާފައި ވަނިކޮށް ތުރުކުމެނިސްތާން ޓީމު ފަހަތުން އަރައި މޮޅުވެއްޖެ

އޭއެފްސީ ޗެލެންޖް ލީގުގައި ރާއްޖޭގެ ޗެމްޕިއަން މާޒިޔާއާ ވާދަކޮށް ތުރުކުމެނިސްތާންގެ ޗެމްޕިއަން އަރްކަޑާގް ފަހަތުން އަރައި 2-1 އިން މޮޅުވެއްޖެ އެވެ.

ކުވެއިތު ސިޓީގެ އަލް ކުވެއިތު ސްޕޯޓްސް ކްލަބް ސްޓޭޑިއަމްގައި މިރޭ ކުޅުނު މެޗުގެ ފުރަތަމަ ހާފު ނިމެނިކޮށް މާޒިޔާ އިން ލީޑު ނެގީ، ފަލަސްތީނުގެ ގައުމީ ޓީމަށް ކުޅޭ ޗިލީއަށް އުފަން މިޑްފީލްޑަރު ޖޮނަތަން ކަންޓިލާނާ އެވެ.

އަރްކަޑާގް މޮޅުވީ ދެވަނަ ހާފުގައި ޖެހި ގޯލުތަކުންނެވެ. އެގޮތުން އެއްވަރުކުރި ގޯލު 66 ވަނަ މިނިޓުގައި ޖެހީ ޑިޑާ ޑޫޑީއްޔޫ އެވެ. އޭގެ 10 މިނިޓު ފަހުން މޮޅުވި ލަނޑު ޖަހައިދިނީ ބެގެންކް އަކްމަންމެޑޯ އެވެ. މި ދެ ގޯލު ވެސް ޖަހާފައި ވަނީ ގޯލު ކުރިމަތީ ހުސްކޮށް ހުރެ ބޮލުން ބޯޅަ ގޯލަށް ފޮނުވާލައިގެންނެވެ.

މިރޭގެ މޮޅަކީ މިދިޔަ އަހަރުގެ އޭޕްރީލް މަހު އުފެދުނު އަރްކަޑާގް ޖެހިޖެހިގެން މޮޅުވި 58 ވަނަ މެޗެވެ. މިދިޔަ އަހަރުގެ ހުރިހާ މެޗެއް ކާމިޔާބު ކޮށްގެން ލީގާއި އެގައުމުގެ އެފްއޭ ކަޕް ކާމިޔާބު ކުރި އިރު، މިއަހަރު ލީގުގައި ބާކީ މެޗު އޮއްވައި އެޓީމުން ވަނީ ޗެމްޕިއަންކަން ޔަގީން ކޮށްފަ އެވެ. އަދި ކަޕް މުބާރާތުގެ ސެމީ ފައިނަލަށް ވެސް އެޓީމު އޮތީ ހޮވިފަ އެވެ.

އަރްކަޑާގް ޓީމުގައި މުޅިން ވެސް ތުރުކުމެނިސްތާނަށް ނިސްބަތްވާ ކުޅުންތެރިން ހިމެނޭ އިރު، ރާއްޖޭގެ ޗެމްޕިއަންކަން ޖެހިޖެހިގެން ހަތަރު އަހަރު ހޯދާފައިވާ މާޒިޔާ ޓީމު ނުކުތީ ރާއްޖޭޣެ ގައުމީ ޓީމުގެ ގިނަ ކުޅުންތެރިންގެ އިތުރުން ބިދޭސީ ހަ ކުޅުންތެރިންނާވެސް އެކު އެވެ.

އޭޝިއާގެ ތިންވަނަ ފަންތީގެ ކްލަބް ފުޓްބޯޅަ މުބާރާތުގައި މާޒިޔާ އާއި އަރްކަޑާގް އާއެކު ގުރޫޕް ބީގައި ދެން ހިމެނެނީ ކިރިގިސްތާންގެ އަބްދީޝް އަތަ ކަންޓް އާއި ކުވެއިތުގެ އަލް އަރަބީ އެވެ.

މި ގުރޫޕްގެ ފުރަތަމަ މެޗުގައި އަލް އަރަބީ ވަނީ 1-0 އިން އަބްދީޝް އަތަ ކަންޓް އަތުން ބަލިވެފަ އެވެ.

ކުވެއިތުގައި ސެންޓްރަލައިޒް ކޮށްގެން ކުރިއަށް ގެންދާ މި ގުރޫޕްގައި މާޒިޔާގެ ދެވަނަ މެޗުގައި އަންގާރަ ދުވަހުގެ ރޭ އަލް އަރަބީއާ ދެކޮޅަށް ކުޅޭނެ އެވެ. އަދި ފަހު މެޗުގައި އަބްދީޝް އަތަ ކަންޓްއާ ދެކޮޅަށް ނުކުންނާނީ ހުކުރު ދުވަހުގެ ރެއެވެ.