ފުރާޅުގައި ސޯލާ ޕެނަލް ހަރުކުރުމުގެ ފުރުސަތު ހުޅުވާލައިފި

އަމިއްލަ ގެތަކުގެ ފުރާޅުގައި ސޯލާ ޕެނަލް ހަރުކޮށްގެން ހަކަތަ އުފެއްދުމަށް ސަރުކާރުން ފެށި "މަގޭ ސޯލާ" ޕްރޮޖެކްޓުގައި ބައިވެރިވުމުގެ ފުރުސަތު އިއްޔެ ހުޅުވާލައިފި އެވެ.

ތިމާވެއްޓާ ބެހޭ މިނިސްޓްރީން ކުރި އިއުލާނެއްގައި ބުނީ މި ޕްރޮޖެކްޓް ފެށީ އާންމުން ކަރަންޓަށް ކުރާ ހޭދަ ކުޑަކުރުމަށާއި ރާއްޖޭގައި ލިބެން ހުރި ހަކަތައިގެ ވަސީލަތްތަކުގެ ބޭނުންކުރުން އިތުރުކުރުމަށް އަދި ރާއްޖޭގައި ބޭނުންކުރާ ހަކަތައިގެ 33 ޕަސެންޓް އިޔާދަކުރަނިވި ހަކަތައަށް ހެދުމަށް ސަރުކާރުން ކަނޑައަޅާފައިވާ އަމާޒަށް ވާސީލުވުމަށް ކުރާ މަސައްކަތުގެ ދަށުން ކަމަށެވެ.

އެ އިއުލާނުގައި ބުނި ގޮތުގައި، "މަގޭ ސޯލާ" ޕްރޮގްރާމުގައި އަމަލުކުރުމަށް ހަމަޖެހިފައިވާ ގޮތަކީ؛

• ސޯލާ ޕީވީ ސިސްޓަމް ފޯރުކޮށްދޭނީ ހަމައެކަނި ގެތަކަށް.

• ގެތައް ކަނޑައަޅާނީ އާއްމުކޮށް ހުޅުވާލުމުން އެކަމަށް އެދި ހުށަހަޅާ ފަރާތްތަކުގެ ތަރުތީބުން.

• މި ޕްރޮގްރާމަށް އެދި ހުށަހަޅާނީ ފެނަކަ ކޯޕަރޭޝަންގެ ވެބްސައިޓް މެދުވެރިކޮށް.

• ސޯލާ ޕީވީ ސިސްޓަމް ހަރުކުރެވޭނެ ގެތަކާއި ގެތަކަށް ދޫކުރެވޭ ސޯލާ ޕީވީ ސިސްޓަމްގެ ސައިޒު ކަނޑައަޅާނީ ނެޓް މީޓަރިން އުސޫލުގެ ދަށުން، އަދި ގޭބިސީތައް ސާވޭކުރުމަށް ފަހު.

• މި ޕްރޮގްރާމްގެ ދަށުން ފޯރުކޮށްދޭ ސޯލާ ޕީވީ ސިސްޓަމަކަށް އެޑްވާންސް ޕޭމަންޓެއް ނުނަގާނެ. ނަމަވެސް، ހަރުކުރުމުގެ ފީގެ ގޮތުގައި ސިސްޓަމުގެ އަގުގެ 10 ޕަސެންޓް ނަގާނެ. އެ 10 ޕަސެންޓަށް ވާ ރުފިޔާ ކޮންޓްރެކްޓުގައި ސޮއިކުރާއިރު ދައްކަން ޖެހޭނެ.

Geygeyge furaalhugai solar panel haru kurumuge program eh fashanee

The most trusted news source in the Maldives

Mihaaru

މި ޕްރޮގްރާމްގައި އއ. އަދި އދ. އަތޮޅު ފިޔަވާ އެހެން ހުރިހާ އަތޮޅަކަށް ވަކި އަދަދަކަށް ސޯލާ ޕީވީ ސިސްޓަމް ފޯރުކޮށްދޭން ވަނީ ނިންމައިފަ އެވެ.

އެންމެ ގިނަ ސޯލާ ޕީވީ ސިސްޓަމްތައް ދެނީ އައްޑު އަށެވެ. އެއީ 88 ސޯލާ ޕީވީ ސިސްޓަމެވެ. ހުރިހާ އަތޮޅެއް ހިމެނޭ ގޮތަށް ޖުމްލަ 748 ސޯލާ ޕީވީ ސިސްޓަމް ފޯރުކޮށްދޭން މިނިސްޓްރީން ވަނީ ނިންމައިފަ އެވެ.

މި ޕްރޮގްރާމުގެ ދަށުން ދޫކުރަނީ ތިނެއް އަދި ފަސް ކިލޯވޮޓުގެ ސިންގަލް ފޭސް އަދި ތްރީ ފޭސް ސިސްޓަމްތަކެވެ. ތިން ކިލޯވޮޓުގެ ސިސްޓަމެއްގެ އަގަކީ 45،000ރ. އެވެ. އަދި ފަސް ކިލޯވޮޓުގެ ސިސްޓަމެއްގެ އަގަކީ 75،000ރ. އެވެ.

މިނިސްޓްރީގެ އިއުލާނުގައި ބުނި ގޮތުގައި، ސިސްޓަމްތަކަށް އަގު ނެގުމަށް ހަމަޖެހިފައި ވަނީ އެއްފަހަރާ ދައްކާ ގޮތަށް ނުވަތަ ފަސް އަހަރަށް ބަހާލައިގެން މަހުން މަހަކަށް ދައްކާ ގޮތަށް އިންސްޓޯލްމަންޓް އުސޫލުންނެވެ. އަދި އިންސްޓޯލްމަންޓަށް ނަގާ ނަމަ ކޮންމެ މަހެއްގެ ކަރަންޓު ބިލުގައި، މި ސިސްޓަމަށް އެ މަހަކު ދައްކަން ޖެހޭ އަދަދު ހިމަނާނެ އެވެ.

"މި ޕްރޮގްރާމުގެ ދަށުން ސޯލާ ޕީވީ ސިސްޓަމް ހޯދާ އެސިސްޓަމަށް މަހުން މަހަށް ކަރަންޓު ބިލުގައި ހިމަނައިގެން އަގު އަދާކުރާ ފަރާތްތަކުން އަގު ނުދެއްކުމުން އަމަލުކުރާނީ މިހާރު ވެސް ކަރަންޓު ބިލު އަދާނުކުރުމުން ހިނގާ އުސޫލު،" އެ އިއުލާނުގައި ބުންޏެވެ.

މިނިސްޓްރީން ބުނީ މި ޕްރޮގްރާމުގެ ދަށުން ހަރުކުރާ ސޯލާ ޕީވީ ސިސްޓަމްތައް މަރާމާތުކޮށް ބަލަހައްޓަން ޖެހޭނީ އެ ސިސްޓަމެއްގެ ވެރިފަރާތުން ކަމަށެވެ.

މި ޕްރޮޖެކްޓް ނިމުމުން ޖުމްލަ ހަތަރު މެގަވޮޓްގެ ކަރަންޓު އުފެއްދޭނެ ކަމަށް ތިމާވެއްޓާ ބެހޭ މިނިސްޓަރު ތޯރިގް އިބްރާހިމް ކުރިން ވިދާޅުވެފައިވެ އެވެ.

ރާއްޖެއިން ތެލަށް ބާރޯސާވާ ވަރު ކުޑަކުރުމަށްޓަކައި 2028 ވަނަ އަހަރުގެ ނިޔަލަށް ރާއްޖޭގައި އުފައްދާ ހަކަަތައިގެ 33 ޕަސެންޓަކީ އިޔާދަކުރަނިވި ހަކަތައަށް ހެދުމަކީ ރައީސް ޑރ. މުހައްމަދު މުއިއްޒުގެ ވައުދެކެވެ.