ކޮޕް29: ހޫނުވި ބަހުސްތަކަށް ފަހު ވެސް ނިންމާލީ ފަގީރު ގައުމުތަކަށް 300 ބިލިއަން ދޭ ގޮތަށް

މޫސުމީ ބަދަލުތަކުގެ ގެއްލުމުގެ ބަދަލަށް މުއްސަނދި ގައުމުތަކުން މަދުވެގެން އަހަރަކު ޓްރިލިއަން ޑޮލަރު ދިނުމަށް ގޮވާލައި އަޒަރްބައިޖާންގައި އެކްޓިވިސްޓުން މުޒާހަރާކުރަނީ. -- ފޮޓޯ: އޭއެފްޕީ

24 ނޮވެމްބަރ 2024 - 06:14

3 comments

މޫސުމަށް އަންނަ ބަދަލުތަކާ ދެކޮޅަށް މަސައްކަތްކުރުމަށް، ފަގީރު ގައުމުތަކަށް މުއްސަނދި ގައުމުތަކުން އަހަރަކު 300 ބިލިއަން ޑޮލަރުގެ އެހީ ދިނުމުގެ އެއްބަސްވުން 200 ވަރަކަށް ގައުމުގެ ތާއީދާ އެކު ފާސްކޮށް ކޮޕް29 ސަމިޓް އެންމެ ފަހުން ނިންމާލައިފި އެވެ.

އަޒަރްބައިޖާންގެ ބަކޫގައި ބޭއްވި ސަމިޓްގެ ރަސްމީ ވަގުތު ހަމަވެގެން ދިޔައިރު ވެސް މާލީ އެހީގެ އެއްބަސްވުމަކަށް ނާދެވި ބަހުސްތައް ހޫނުވެ، ފަގީރު ގައުމުތަކުން ވަނީ މަޝްވަރާތަކުން ވަކި ވެސް ވެފަ އެވެ. އެއާ އެކު މުޅި ސަމިޓު ވެސް ބޮޑު ނާކާމިޔާބީއަކުން ނިމިދާނެ ކަމުގެ ބިރު ހީވެފައި އޮއްވައި އަލުން ކުރި މަސައްކަތުން އެއްބަސްވުން ފާސްކޮށް އިއުލާނުކުރެވުނީ އަޒަރްބައިޖާން ގަޑިން ހޮނިހިރު ދުވަހުގެ ރޭ 11:39 ގަ އެވެ.

އދ.ގެ މޫސުމާ ބެހޭ ސަމިޓްގެ ފެށިތާ ދެ ހަފްތާ ފަހުން ވެވުނު މި އެއްބަސްވުން އިއުލާނުކުރެއްވީ ސަމިޓްގެ ރައީސް އަޒަރްބައިޖާންގެ އިކޮލޮޖީ އެންޑް ނެޗުރަލް ރިސޯސަސް މިނިސްޓަރު މުޚްތާރް ބަބަޔޭވް އެވެ.

މުއްސަނދި ގައުމުތަކުން ހުކުރު ދުވަހު ހުށަހެޅީ އެ ގައުމުތަކުގެ ސަބަބުން ތިމާވެއްޓަށް ލިބެމުންދާ ގެއްލުންތަކުގެ ބަދަލެއްގެ ގޮތުން އަދި މޫސުމީ ނުރައްކާތަކާ ކުރިމަތިލުމަށް، 2035 އަންނަ އިރު އަހަރަކު 250 ބިލިއަން ޑޮލަރު، ފަގީރު ގައުމުތަކަށް ދިނުމަށެވެ.

ފަގީރު އަދި ތަރައްގީވަމުން އަންނަ ގައުމުތަކުން ޑިމާންޑްކުރަމުން ދިޔައީ މަދުވެގެން 1 ޓްރިލިއަން ޑޮލަރު ލިބެންޖެހޭނެ ކަމަށެވެ. އެކަމަކު މިއީ "ފެލައިލުމެއް" ކަމަށް ސިފަކޮށް، މުއްސަނދި ގައުމުތަކުން އެގޮތަށް އެއްބަހެއް ނުވި އެވެ. އެންމެ ފަހުން ރޭ ފާސްކުރި 300 ބިލިއަނަކީ މިހާރު ދެމުން އަންނަ މާލީ އެހީއަށްވުރެ 100 ބިލިއަން އިތުރު އަދަދެކެވެ.

އދ.ގެ ސެކްރެޓަރީ ޖެނެރަލް އެންޓޯނިއޯ ގުޓަރެސް ވަނީ މޫސުމީ ބަދަލުތަކުގެ ގެއްލުން އެންމެ ބޮޑަށް ލިބޭ ގައުމުތަކުން ބޭނުންވި ގޮތަށް އެއްބަސްވުން ގާއިމު ނުވުމުން އެކަމާ ކަންބޮޑުވުން ފާޅުކުރައްވައިފަ އެވެ.

COP29: Maalee ehee aa medhu dhebasve, kudhi gaumuthah mashvaraain vaki vejje

The most trusted news source in the Maldives

Mihaaru

ގުޓަރެސް ވިދާޅުވީ މާލީ ކަންކަމާއި މޫސުމީ ބަދަލުތަކާ ކުރިމަތިލައި ނުރައްކާ ކުޑަކުރުމުގެ ކަންކަމުގައި މިއަށްވުރެ ރަނގަޅު އެއްބަސްވުމަކަށް އާދެވޭނެ ކަމަށް އޭނާ އުންމީދުކުރެއްވި ކަމަށެވެ. އޭނާ ނެރުއްވި ބަޔާނެއްގައި ވަނީ ގައުމުތަކުން މި އެއްބަސްވުމަކީ، ތިމާވެށީގެ މައްސަލަތަކާ ކުރިމަތިލުމުގެ ބިންގަލެއްގެ ގޮތުގައި ދެކިގެން އެއާ އެއްގޮތަށް މި ވަގުތު ކުރިއަށް ދިއުމަށް ގޮވާލައްވައިފަ އެވެ.

"މި އެއްބަސްވުމަށް އިހުތިރާމްކޮށް، އެއަށް ފުރިހަމައަށް އަމަލުކުރަން ޖެހޭނެ،" ގުޓަރެސް ވިދާޅުވި އެވެ.

"އެއްބަސްވި ގޮތަށް އަވަހަށް ފައިސާއަށް ދޭންޖެހޭނެ. މި އާ އަމާޒަށް ވާސިލުވުމަށް ހުރިހާ ގައުމުތަކެއް އެކުގައި މަސައްކަތް ކުރަން ޖެހޭ."