އަންޗެލޮޓީގެ އެކްސްޕެރިމެންޓް ކާމިޔާބު!

މެޑްރިޑް (ނޮވެމްބަރު 25) – ކިލިޔަން އެމްބާޕޭ އާއި ވިނީޝިއުސް ޖޫނިއާ އާންމުކޮށް ކުޅުވާ މަގާމު ބަދަލުކޮށް ރެއާލް މެޑްރިޑްގެ ކޯޗު ކާލޯ އަންޗެލޮޓީ ހެދި އެކްސްޕެރިމެންޓް ކާމިޔާބު ވެއްޖެ އެވެ.

މި ސީޒަނުގައި އެމްބާޕޭ، ރެއާލް މެޑްރިޑާ ގުޅުނު ފަހުން ވެސް އޭނާ ކުޅެނީ ސެންޓަ ފޯވާޑެއްގެ ރޯލަށެވެ. އެ މަގާމުގައި އޭނާގެ ފަރާތުން މާ އެދެވޭ ކުޅުމެއް ނުދެއްކުނެވެ. އެކަން އެހެން ގޮތަކަށް ތަޖުރިބާކާ ކުރަން އަންޗެލޮޓީ ނިންމީ އެމްބާޕޭ އައި ވިނީޝިއުސްގެ މަގާމު ބަދަލު ކުރުމަށެވެ.

ސްޕެއިނުގެ ލީގުގައި ރޭ، ލެގަނޭޒާ ދެކޮޅަށް ކުޅުނުގެ މެޗުގައި އެމްބާޕޭ އަށް ކުޅުވީ ވައަތު ވިންގަށެވެ. ވިނީޝިއުސް އަށް ދިނީ ކުރިން އެމްބާޕޭ ބެލެހެއްޓި މައި ސްޓައިކަރުގެ މަގާމެވެ. މެޑްރިޑްގެ ޓައުން ސިޓީ ލެގަނޭޒްގައި ކުޅުނު މެޗުގައި ރެއާލްގެ ފުރަތަމަ ލަނޑު އެމްބާޕޭ ޖެހީ ވިނީޝިއުސްގެ ޕާހަކުންނެވެ.

މިދިޔަ ފީފާ ވިންޑޯގައި ފްރާންސްގެ ގައުމީ ޓީމަށް ނުދާން އެމްބާޕޭ ނިންމީ، ރެއާލްގައި އޭނާގެ ކުޅުން ރަނގަޅު ކުރުމަށެވެ. އޭނާ ގުޅުނީ ރެއާލްގެ ޒުވާން ޓީމު ކަސިއްޔާގެ ތަމްރީނުތަކަށެވެ.

ފީފާގެ ވިންޑޯ އަށް ފަހު ކުޅުނު ފުރަތަމަ މެޗުގައި އޭނާގެ އާ މަގާމުގައި ކުރީގެ ފޯމް އަލުން ފެނުނެވެ. މީގެ ކުރިން ޕީއެސްޖީގައި ވެސް އެމްބާޕޭ ވަނީ ވިންގަށް ކުޅެފަ އެވެ.

"މެދު ތެރޭގައި ފޯވާޑަކަށް ކުޅުމަށް ވުރެ ބޭރުގައި [އޭރިއާއިން ބޭރުގައި ވިންގަށް] ކުޅެން މާ ބޮޑަށް ވަރުބަލި ވާނެ. އެމްބާޕޭ ހުރީ ދެ ހަފުތާ ވަންދެން ލީގު މެދުކެނޑިފައި ވުމުން ވަރަށް ތާޒާކޮށް. ވިނީގެ ޕާހަކުން އެމްބާޕޭ ލަނޑު ޖެހީ،" އޭނާ ގެނައި ބަދަލުގެ ފައިދާ ފެނުމުން ހިތްހަމަޖެހިފައި ހުރި އަންޗެލޮޓީ ބުންޏެވެ.

ރެއާލްގެ ދެވަނަ ލަނޑު ޖެހީ، ރޭގެ މެޗުގައި ކަނާތު ބެކަށް ކުޅުނު ފެޑެރީކޯ ވަލްވާޑޭ އެވެ. އާންމުކޮށް މިޑްފީލްޑަށް ކުޅޭ ވަލްވާޑޭ، ކަނާތު ބެކަށް ކުޅުވީ އެ މަގާމުގައި ކުޅޭ ދެ ކުޅުންތެރިން ވެސް އަނިޔާގައި ތިބުމުންނެވެ.

އެ މަގާމުގައި ވަލްވާޑޭ ދެއްކި ކުޅުމާ އެކު އަންޗެލޮޓީ ސަމާސާ ރަގެއްގައި ބުނީ މިހާރު ދުނިޔޭގައި ހުރި އެންމެ މޮޅު ކަނާތު ބެކަށް ކުޅޭ ކުޅުންތެރިޔަކީ ވަލްވާޑޭ ކަމަށެވެ.

ރެއާލްގެ ތިންވަނަ ލަނޑު ޖެހީ ޖޫޑެ ބެލިންހަމް އެވެ. އެއީ ސީޒަންގައި އޭނާ ޖެހި ދެވަނަ ލަނޑެވެ.

ލިބުނު ތިން ޕޮއިންޓާ އެކު، ރެއާލުން ވަނީ އެއްވަނައިގައި އޮތް ވާދަވެރި ބާސެލޯނާއާ ހަތަރު ޕޮއިންޓަށް ފަރަގު ކުޑަކޮށްފަ އެވެ. ރެއާލް މެޗު ކުޅެފައި ވަނީ ބާސާ އަށް ވުރެ މަދުންނެވެ. ހޮނިހިރު ދުވަހުގެ ރޭ ސެލްޓަ ވިގޯއާ ދެކޮޅަށް ކުޅުނު މެޗުން ބާސާ އެއްވަވީ ފަހު ވަގުތު ސެލްޓައިން ޖެހި ދެ ލަނޑުންނެވެ.