ނިމާ އީގަލްސް އަށް؛ ބަރާބަރަށް މުސާރަ ނުދެވޭއިރު ކުޅުންތެރިން ރަށު ޓީމަށް ކުޅެން ފުރުސަތު ދޭން ޖެހޭ

އީގަލްސްއިން ކުޅުންތެރިންނަށް ބަރާބަރަށް މުސާރަ ނުދެވޭއިރު ރަށު ޓީމަށް ކުޅެން އެ ކުޅުންތެރިންނަށް ފުރުސަތު ދޭން ޖެހޭ ކަމަށް، އެ ކްލަބްގެ ކުރީގެ އެސިސްޓެންޓް ކޯޗު އަހްމަދު ނިމާދު (ނިމާ) އިލްތިމާސް ކޮށްފި އެވެ.

މިހާރު ކުރިއަށްދާ ގޯލްޑް ކަޕްގައި ކުޅުން، އީގަލްސްއިން ވަނީ އެ ޓީމުގެ ކުޅުންތެރިންނަށް މަނާ ކޮށްފަ އެވެ. އެ ޓީމުގެ މިޑްފީލްޑަރު ނިޝާމް މުހައްމަދު ރަޝީދު (ޕޮގް) އޭނާގެ އުފަން ރަށް، ބ. އޭދަފުށީ ޓީމަށް ކުޅެން ދޫކޮށް ދިނުމަށް އެދި އެ ރަށު ކައުންސިލުން ފޮނުވި ސިޓީ އަށް އީގަލްސްއިން ދިން ޖަވާބުގައި ބުނެފައި ވަނީ ގޯލްޑް ކަޕަކީ ރާއްޖޭގެ ފުޓްބޯޅަ އަށް އަދި ކުޅުންތެރިންނަށް ވެސް އެއްވެސް ފައިދާއެއް ވާނެ މުބާރާތެއް ނޫން ކަމަށެވެ.

ނިޝާމް އޭދަފުށީ ޓީމަށް ދޫކުރާނީ އޭނާގެ ރލީޒް ފީގެ ގޮތުގައި 200،000.ރ ދިނުމުން ކަމަށް އީގަލްސްއިން ވަނީ ބުނެފަ އެވެ.

އީގަލްސްގެ އެ ސިޓީއާ ގުޅިގެން "މިހާރު" ގައި ޖެހި އެ ޚަބަރު، ފޭސްބްކްގައި އަމިއްލަ މީހަކު ޝެއާކޮށްފައިވާ ޕޯސްޓަށް ނިމާދު ވަނީ ކޮމެންޓް ކޮށްފަ އެވެ. އޭނާ ބުނީ އީގަލްސްގެ ކުޅުންތެރިން އެހެން ރަށްރަށުގައި ބާއްވާ މުބާރާތްތަކުގައި ކުޅެމުންދާ ކަމަށެވެ.

"ކުޅެން ފުރުސަތު ދިނުން އެއީ މަ ދެކޭ ގޮތް. އެހެން ރަށްރަށުގައި އޮންނަ މުބާރާތުގައި ވެސް ތިބުނާ ކުޅުންތެރިން ކުޅެމުންދަނީ،" ނިމާގެ ކޮމެންޓްގައި ލިޔެފައި ވެ އެވެ.

"ބަރާބަރަށް މުސާރަ ނުދެވިގެން އުޅޭއިރު އަދި (އަމުދުން) ކުދިންގެ އަމިއްލަ ރަށްރަށަށް ކުޅުމުގެ ފުރުސަތު ދޭން ޖެހޭ. މިވަގުތަކީ މާލޭގައި ލީގެއް ވެސް އަދި އެފްއޭއެމްގެ އެހެން މުބާރާތެއް ވެސް ހިނގަމުންދާ ދުވަސްވަރެއް ނޫން."

މާޒިޔާ ފިޔަވައި، ރާއްޖޭގެ އެއްވެސް ކްލަބަކުން ބަރާބަރަށް ކުޅުންތެރިންނަށް މުސާރައެއް ނުދެ އެވެ. އަންނަ ޖެނުއަރީގައި އާ ސީޒަން ފަށާނެ ކަމަށް އެފްއޭއެމުން ކްލަބްތަކަށް އަންގާފައި ވުމުން އިއްޔެ ޕްރީ ސީޒަންގެ ޕްރެކްޓިސް ފެށި މާޒިޔާއިން ވަނީ އޮފް ސީޒަންގައި ވެސް ކުޅުންތެރިންނަށް މުސާރަ ދީފަ އެވެ.

އީގަލްސްއިން އޮފް ސީޒަންގައި މުސާރަ ނުދެ އެވެ. އަދި ސީޒަން ތެރޭގައި ވެސް ބަރާބަރަށް މުސާރަ ނުދޭ މައްސަލަ ފެންތި ވެ އެވެ.