ފުވައްމުލަކުގެ ވިދުން ތިމަރަފުށިން ފަނޑުކޮށްލައިފި

ގޯލްޑް ކަޕްގެ އެންމެ ވިދުން ގަދަ ޓީމުގެ ގޮތުގައި ދެވަނަ ބުރާ ކުރިމަތިލި ފުވައްމުލަކާ އެއްވަރުކޮށް ތ. މަރަފުށިން، ފުވައްމުލަކުގެ ވިދުން ފަނޑުކޮށްލައިފި އެވެ.

ގައުމީ ފުޓްބޯޅަ ދަނޑުގައި މިއަދު ހަވީރު ކުޅުނު މެޗު އެއްވަރުވީ 1-1 ންނެވެ.

ފުވައްމުލަކުން ދެވަނަ ބުރާ ކުރިމަތިލީ، ފުރަތަމަ ބުރުގައި އެ ޓީމުން ކުޅުނު ހަތަރު މެޗުން ވެސް މޮޅުވެގެންނެވެ. ގުރޫޕް ތަކުގެ އެއްވަނަ ހޯދި ޓީމުތަކުގެ ތެރެއިން އެންމެ ގިނަ ޕޮއިންޓް ހޯދި ޓީމަކީ ވެސް ފުވައްމުލަކެވެ. އެންމެ ގިނަ ގޯލް ޖެހީ ވެސް އެ ޓީމެވެ.

އެކަމަކު ގުރޫޕް ސްޓޭޖް ފޯމެޓަށް ކުރިއަށް ގެންދާ ދެވަނަ ބުރުގެ ފުރަތަމަ މެޗުގައި އެ ޓީމަށް އެ ގަދަކަމެއް ނުދެއްކުނެވެ.

މެޗުގައި ފުރަތަމަ ލީޑް ނެގީ ވެސް ތިމަރަފުށިންނެވެ. މެޗު ފެށިގެން 10 ވަނަ މިނެޓްގައި ތިމަރަފުށީގެ ލަނޑު ޖެހީ އަލީ އިލްމާން އަހްމަދު މޫސާ އެވެ.

ތިމަރަފުއްޓަށް ލިބުނު ކޯނަރު، އާދަމް ނާސިހް ނެގީ ގޯލްގެ ކުރިމައްޗަށެވެ. ކުޑަ އޭރިއާގެ ތެރޭގައި ހުރެފައި އިލްމާން އެ ބޯޅައިގައި ބޮލުން ޖަހައި ގޯލްގެ ތެރެއަށް ވައްދާލި އެވެ.

އެކަމަކު އެ ޓީމަށް ލީޑްގައި ހިފަހައްޓާލެވުނީ 15 މިނެޓަށެވެ. މެޗުގެ 25 ވަނަ މިނެޓްގައި ފުވައްމުލަކަށް ނަތީޖާ ހަމަހަމަކޮށް ދިނީ ގާނާގެ ފޯވާޑް ކޯފީ އޯސޫ އެވެ.

އެ ޓީމަށް ނަތީޖާ ހަމަހަމަކޮށް ދިނުމުގައި 16 އަހަރުގެ މުހައްމަދު އިޔާޝްގެ ހިއްސާ ބޮޑެވެ. ހާފުގެ މެދެއްހާ ހިސާބުން އޭނާ އަށް ލިބުނު ބޯޅަ ކޯފީ އަށް ތަނަވެސްކޮށް ދިނެވެ. އެ ބޯޅަ ހިފައިގެން ގޮސް ތިމަރަފުށީގެ އޭރިއާގެ ތެރެއަށް ވަދެ ބޯޅަ ގޯލްގެ ތެރެއަށް ވައްދާލީ ގޯލްގެ ދަނޑީގައި ޖައްސާލާފަ އެވެ.

ދެވަނަ ހާފުގައި ދެ ޓީމަށް ވެސް ފުރުސަތުތައް ލިބުނެވެ. އެކަމަކު ގޯލަކަށް ބަދަލުކޮށްލެވޭނެ ގޮތެއް ނުވި އެވެ. ފުވައްމުލަކަށް ލިބުނު ހިލޭ ޖެހުންތަކުން އަލީ ޝަމާލް އަބްދުﷲ (ޝަންމު)، ތިމަރަފުށީގެ ފަހަތަށް ނުރައްކާ ކުރި އެވެ. އެކަމަކު ގޯލްގެ އެތެރެއަށް ބޯޅަ ވައްދާލެވޭ ގޮތެއް ނުވި އެވެ.