އަރިދަފުސް ރޯގާ މިދިޔަ މަހު ވަރަށް ގިނަ، 40،000 ކޭސް ރިޕޯޓުކުރި

ރާއްޖޭގައި އަރިދަފުސް ރޯގާ ޖެހިގެން ރިޕޯޓުކުރި އަދަދު މިދިޔަ މަހު އިތުރުވެފައިވާ ކަމަށް ހެލްތު ޕްރޮޓެކްޝަންސް އެޖެންސީ (އެޗްޕީއޭ) ގެ ތަފާސްހިސާބުތަކުން ދައްކައިފި އެވެ.

ތަފާސްހިސާބުތަކުން ދައްކާ ގޮތުން މިދިޔަ އޮކްޓޫބަރު މަހާއި ނޮވެމްބަރު މަހު 70،000 މީހަކަށް ރޯގާ ޖެހިގެން ރިޕޯޓުކޮށްފައިވެ އެވެ. އެއީ އޮކްޓޫބަރު މަހު 29،515 މީހަކާއި ނޮވެމްބަރު މަހު ރިޕޯޓްކުރި 40،504 މީހެކެވެ.

މިއީ މިދިޔަ އަހަރުގެ މިހާތަނަށް އަރިދަފުސް ރޯގާ ޖެހިގެން ރިޕޯޓުކުރި އަދަދާ އަޅާބަލާއިރު އިތުރު އަދަދެކެވެ.

އެޗްޕީއޭ އިން މިއަދު ބުނީ މި އަހަރުގެ އޮކްޓޫބަރު މަހާ އަޅާބަލާ އިރު، އިންފުލުއެންޒާގެ އަލާމާތްތައް ހުރެގެން ޓެސްޓް ކުރި މީހުންގެ އަދަދު ވެސް ޖެހިގެން އައި ނޮވެމްބަރު މަހު އިތުރު ކަމަށެވެ. މި އަހަރުގެ މިހާތަނަށް 2،375 ޓެސްޓް ކުރިއިރު އޭގެ ތެރެއިން 476 ސާމްޕަލް ޕޮޒިޓިވްކަން ތަފާސްހިސާބުތަކުން އެނގެ އެވެ.

ޑެންގީ ހުމުގެ ތަފާސްހިސާބަށް ބަލާއިރު އޮކްޓޫބަރު މަހަށް ވުރެ ނޮވެމްބަރު މަހު ޑެންގީ ޖެހުނު މީހުންގެ އަދަދު ވެސް އިތުރެވެ. އޮކްޓޫބަރު މަހު 126 ޑެންގީ ކޭސް ރިޕޯޓުކޮށްފައިވާ އިރު ނޮވެމްބަރު މަހުގެ އަދަދަކީ 140 އެވެ. އެކަމަކު މިއީ މިދިޔަ އަހަރުގެ މިހާތަނާ އަޅާބަލާއިރު ދަށް އަދަދެކެވެ.

ބޭރަށް ހިންގާ ރޯގާއެއް ވެސް މިދުވަސްވަރު ފެތުރެމުންދާއިރު މިދިޔަ އޮކްޓޫބަރު މަހު 3،164 އަދި ނޮވެމްބަރު މަހު 3،635 ކޭސް ރިޕޯޓުކޮށްފައިވާ ކަމަށް އެޗްޕީއޭ އިން ބުންޏެވެ.

އާންމު ބަލިތައް ފެތުރޭ އަދަދު މި ދުވަސްވަރު އިތުރުވަމުންދާތީ އެޗްޕީއޭ އިން ވަނީ ބަލިތަކުން ރައްކާތެރިވުމަށް ފިޔަވަޅުތައް އަޅަން ވެސް އިލްތިމާސް ކޮށްފަ އެވެ.