ލަލީގާގެ މެޗުތައް ވަގަށް ދެއްކި މައްސަލާގައި 32 މިލިއަން ޑޮލަރު ދައްކަން ހުކުމް ކޮށްފި އެވެ.
ލަލީގާ ވަގަށް ދެއްކި ޕްލެޓްފޯމަކީ ޕައިރެސީ ޕްލެޓްފޯމެއް ކަމަށްވާ ރޮޖާޑައިރެކްޓާ އެވެ. އެ ވެބްސައިޓް ހިންގުމުގެ އަޑީގައި ހުރީ އިގޯ ސިއޯނޭ ކިޔާ މީހެކެވެ. މާލްޓާގައި ދިރިއުޅެމުން ދަނިކޮށް އޭނާ ހައްޔަރުކޮށް މިހާރު ވަނީ ކޯޓަށް ގެންގޮސްފަ އެވެ.
ތަހުގީގުން ހާމަވީ ލަލީގާގެ މެޗުތައް ވަގަށް ސްޓްރީމް ކޮށްގެން އޭނާ 32 މިލިއަން ޑޮލަރު ހޯދާފައިވާ ކަމަށެވެ.
މިދިޔަ ހަފުތާގައި އޭނާގެ މައްޗަށް ހުކުމް ކުރީ ބަދަލުގައި އެ ފައިސާ ލަލީގާގެ ރަސްމީ ސްޓްރީމް ޕާޓްނަރު މީޑިއާ ޕްރޯ އަށް ދެއްކުމަށެވެ.
ލަލީގާގެ ރައީސް ހާވިއާ ޓެބާސް ވިދާޅުވީ ސިއޯނޭ ހައްޔަރުކޮށް އިންސާފާ ހަމައަށް ގެންދިއުމަކީ ލިބުނު ކާމިޔާބެއް ކަމަށެވެ.
"އެ މީހުން ފެއިލްވީ. އެއީ ފެއިލްވާނެ ބައެއް. ގޫގުލް، ކްލައުޑްފެއާ އަދި އެހެނިގެން [އިންޓަނެޓް ޕްލެޓްފޯމްތަކުން] ދިޔައީ މި ވައްކަމުގެ ތެރެއިން ފައިސާ ހޯދަމުން،" ޓެބާސް އެކްސްގައި ލިޔުނެވެ.