ސިޔާސީ މުވައްޒަފުންގެ އަދަދުގެ ރެކޯޑެއް ނުގެންގުޅެން: ފިނޭންސް މިނިސްޓްރީ

ރައީސް އައްޔަން ކުރައްވާ ސިޔާސީ މުވައްޒަފުންގެ މައުލޫމާތާއި ޖުމުލަ އަދަދަކީ ފިނޭންސް މިނިސްޓްރީން ރިކޯޑްކޮށް، ބަލަަހައްޓަމުންދާ މައުލޫމާތުތަކެއް ނޫން ކަމަށް އެ މިނިސްޓްރީން ބުނެފި އެވެ.

އެކަމަކު، ރައީސް އޮފީހުގައި ކުރިން ބޭއްވި ނޫސްވެރިންގެ ދެ ބައްދަލުވުމެއްގައި އޭރުގެ ފިނޭންސް މިނިސްޓަރު މުހައްމަދު ޝަފީގު ވިދާޅުވެފައި ވަނީ ސިޔާސީ މުވައްޒަފުންގެ ޖުމުލަ އަދަދާ ގުޅޭ މައުލޫމާތުތައް އެ މިނިސްޓްރީގައި ހުންނާނެ ކަމަށެވެ.

އެ މައުލޫމާތުތައް ދެއްވާނެ ކަމަށް ޝަފީގު އޭރު ވިދާޅުވިޔަސް އޭނާ އިސްތިއުފާ ދެއްވުމާ ހަމައަށް އެކަމެއް ނުކުރައްވަ އެވެ.

އެހެންވެ، އޭގެ ތަފުސީލް ހޯދަން މައުލޫމާތު ހޯދައި ލިބިގަތުމުގެ ގާނޫނުގެ ދަށުން "މިހާރު" އިން ހުށަހެޅުމުން ފިނޭންސް މިނިސްޓްރީން ދިން ޖަވާބުގައި ބުނީ، ސިޔާސީ މަގާމުތަކަށް އައްޔަންކުރާ މުވައްޒަފުންގެ އަދަދާއި އެ މުވައްޒަފުންގެ ވަނަވަރާއި އަދި މުވައްޒަފުންނާ ގުޅޭ އެއްވެސް މައުލޫމާތެއް އެ މިނިސްޓްރީން ރެކޯޑްކޮށް، ބަލަހައްޓަމުން ނުދާ ކަމަށެވެ. ވަކިވަކި މިނިސްޓްރީތަކުގައި އަދި އިދާރާތަކުގައި ތިބި ސިޔާސީ މުވައްޒަފުންގެ މުސާރައިގެ ކަންކަމަކީ އެ މިނިސްޓްރީއަކުން ނުވަތަ އިދާރާއަކުން ބަލަހައްޓާ ކަންކަން ކަމަށް ފިނޭންސް މިނިސްޓްރީގެ ޖަވާބުގައި ވެ އެވެ.

ފިނޭންސް މިނިސްޓްރީން ބުނިގޮތުގައި، އެއީ ދައުލަތުގެ އެންމެހައި މުވައްޒަފުންގެ މުސަރާ އާއި އިނާޔަތްތަކާ ގުޅޭ މަސައްކަތް ކުރާ މިނިސްޓްރީ ކަމަށް ވިޔަސް، އެ ތަނުން ބަލަހައްޓާނީ ދައުލަތުގެ ކޮންމެ މިނިސްޓްރީއަކާއި މުއައްސަސާއެއް އަދި އިދާރާއެއްގައި މަސައްކަތްކުރާ މުވައްޒަފުންގެ މުސާރަ އާއި އިނާޔަތްތަކުގެ ޖުމުލަ މައުލޫމާތެވެ.

ފިނޭންސް މިނިސްޓްރީން ބުނީ، ސިޔާސީ މުވައްޒަފުންގެ މުސާރަ އަށް ކުރާ ހޭދައަކީ ސަރުކާރުގެ މުޅި މުސާރަ އާއި އިނާޔަތްތަކަށް ކުރާ ހޭދައިގެ ހަތަރު ޕަސެންޓަށް ވުރެ ދަށް އަދަދެއް ކަމަށެވެ. އެއީ މުޅި ދައުލަތުގެ ބަޖެޓުގެ އެއް ޕަސެންޓު ކަމަށް ވެސް ބުންޏެވެ.

Siyaasee muvazzafun ge namakee zaathee mauloomaatheh: Raees Office

The most trusted news source in the Maldives

Mihaaru

ސަރުކާރުން ވަނީ މާދަމާ އިން ފެށިގެން ސިޔާސީ މުވައްޒަފުންގެ މުސާރަ އިން 10 ޕަސެންޓް ކުޑަކުރަން ނިންމައިފަ އެވެ. މިނިސްޓްރީން ބުނި ގޮތުގައި އެ ބަދަލާ އެކު، ސިޔާސީ މުވައްޒަފުންގެ މުސާރަ އަށް ދައުލަތުގެ މުޅި ބަޖެޓުން ހޭދަވާ 1 ޕަސެންޓުގެ 10 ޕަސެންޓް ސަލާމަތް ކުރެވޭނެ އެވެ.

މައުލޫމާތު ހޯދައި ލިބިގަތުމުގެ ގާނޫނުގެ ދަށުން "މިހާރު" އިން ވަނީ ސަރުކާރުގެ ހުރިހާ މިނިސްޓްރީތަކެއްގެ ސިޔާސީ މުވައްޒަފުން ހޯދަން އެ މިނިސްޓްރީތަކަށް ވަކިވަކިން ވެސް ހުށަހަޅައިފަ އެވެ. މިހާތަނަށް އެ މައުލޫމާތު ހާމަކޮށްފައިވަނީ ބައެއް މިނިސްޓްރީތަކުންނެވެ. މިހާތަނަށް ހާމަކޮށްފައިވާ އަދަދުތަކަށް ބަލާއިރު ސިޔާސީ މުވައްޒަފުންގެ އަދަދު 1،496 އަށް އަރަ އެވެ.

ބައެއް މިނިސްޓްރީތަކުން މިހާތަނަށް ސިޔާސީ މުވައްޒަފުންގެ އަދަދު ހާމަކޮށްފައިނުވާއިރު، ސަރުކާރުގައި ސިޔާސީ މުވައްޒަފުންގެ އަދަދު 700 އަށް ވުރެ މަތި ނުވާނެ ކަމަށް ކުރިން ވަނީ ބުނެފަ އެވެ.