މިދިޔަ އަހަރު 28 ބިލިއަން ރުފިޔާގެ އާމްދަނީއެއް މީރާ އަށް ބަލައިގަތް

ދައުލަތުގެ ޓެކްސް އިދާރާ، މީރާ އަށް މިދިޔަ އަހަރު ލިބުނު އާމްދަނީ 28 ބިލިއަން ރުފިޔާ އަށް އިތުރުވެއްޖެ އެވެ.

މީރާ އިން އާންމުކުރި ތަފާސްހިސާބުތައް ދައްކާ ގޮތުން މިދިޔަ އަހަރު ޓެކްސްގެ ގޮތުގައި 23 ބިލިއަން ރުފިޔާ ލިބިފައިވާ އިރު ޓެކްސް ނޫން އެހެން އާމްދަނީގެ ގޮތުގައި ފަސް ބިލިއަން ރުފިޔާ ލިބުނެވެ.

ޓެކްސް އިން ލިބުނު އާމްދަނީގެ ތެރެއިން އެންމެ ބޮޑު އަދަދަކީ ޖީއެސްޓީގެ އަދަދުތަކެވެ. ޖީއެސްޓީގެ ޖުމްލަ އާމްދަނީ 14.4 ބިލިއަން ރުފިޔާގައި އުޅޭ އިރު އޭގެ ތެރެއިން 9.5 ބިލިއަން ރުފިޔާ ލިބުނީ ޓީޖީއެސްޓީގެ ގޮތުގަ އެވެ. މިދިޔަ އަހަރު އިންކަމް ޓެކްސް ޓެކްސްގެ ގޮތުގައި 5.9 ބިލިއަން ރުފިޔާ ލިބުނެވެ.

މިދިޔަ އަހަރު އެވްރެޖުކޮށް ހުރިހާ ބާވަތެއްގެ ޓެކްސްއަކުން ލިބުނު އާމްދަނީ ވަނީ އިތުރުވެފަ އެވެ. މީރާ އަށް ބަލައިގަތް ޖުމްލަ އާމްދަނީ ވަނީ އޭގެ ކުރީ އަހަރަށް ވުރެ 11 ޕަސެންޓު އިތުރުވެފަ އެވެ. މީރާ އަށް 2023 ވަނަ އަހަރު ލިބުނީ 25 ބިލިއަން ރުފިޔާ އެވެ.

ޓެކްސް ނޫން އެހެން ފީތަކާއި ކުލީގެ ތެރެއިން މީރާ އަށް އެންމެ ބޮޑު އަދަދެއް ލިބިފައި ވަނީ ރިސޯޓު ކުލިންނެވެ. ރިސޯޓު ކުލީގެ ގޮތުގައި 1.9 ބިލިއަން ރުފިޔާ ލިބިފައިވެ އެވެ. އެއީ އޭގެ ކުރީ އަހަރަށް ވުރެ ފަސް ޕަސެންޓު އިތުރު އަދަދެކެވެ.

މިދިޔަ އަހަރުގެ ވަކިވަކި މަސްތަކުގެ ތެރެއިން އެންމެ ބޮޑު އާމްދަނީއެއް ލިބުނީ ޖެނުއަރީ މަހު އެވެ. އެ މަހު ވަނީ 3.6 ބިލިއަން ރުފިޔާގެ އާމްދަނީއެއް ލިބިފަ އެވެ. ޖެނުއަރީ މަހުގެ އާމްދަނީ އެހާ ބޮޑުވީ އިންކަމް ޓެކްސް އާއި ބިޒްނަސް ޕްރޮފިޓާއި ރިސޯޓު ކުލީގެ ގޮތުގައި ލިބުނު އަދަދު އިތުރުވުމުންނެވެ.

މިދިޔަ އަހަރު ދެވަނައަށް އެންމެ ބޮޑު އާމްދަނީއެއް ލިބުނީ މާޗް މަހު އެވެ. އެ މަހު މީރާ އަށް 2.94 ބިލިއަން ރުފިޔާ ލިބުނެވެ. ތިން ވަނައަށް އެންމެ ބޮޑު އާމްދަނީއެއް ލިބުނީ، ޖުލައި މަހު އެވެ. އެއީ 2.93 ބިލިއަން ރުފިޔާ އެވެ. މީރާ އަށް މިދިޔަ އަހަރުގެ 8 މަހު ވަނީ ދެ ބިލިއަން ރުފިޔާ އަށް ވުރެ ބޮޑު އާމްދަނީއެއް ލިބިފަ އެވެ. އެ އަހަރު އެންމެ ކުޑަ އާމްދަނީއެއް ލިބުނީ މެއި މަހު އެވެ. އެ މަހު ބަލައިގަތީ 1.66 ބިލިއަން ރުފިޔާ އެވެ.

ޓެކްސް އިދާރާ އަށް ލިބުނު އާމްދަނީގެ ތެރެއިން 50 ޕަސެންޓަކީ ޖީއެސްޓީ އެވެ. އަދި 21 ޕަސެންޓަކީ އިންކަމް ޓެކްސްގެ ގޮތުގައި ލިބޭ އާމްދަނީ އެވެ.