އަހަރީ ދުވަހަށް ސޮނީ ހާޑްވެއާއިން ކުޑަގިރީގައި ގަސް އިންދައިފި

ސޮނީ ހާޑްވެއާގެ 55 ވަނަ އަހަރީ ދުވަސް ފާހަގަ ކުރުމުގެ ގޮތުން ކުޑަގިރީގައި 55 ގަސް އިންދައިފި އެވެ.

ސޮނީ ހާޑްވެއާއިން ބުނީ އަހަރީ ދުވަހާ ގުޅުވައިގެން ކުޑަގިރީގައި ގަސް އިންދަން ނިންމީ އެރަށަކީ މާލެ ސަރަހައްދުގައި ދިރިއުޅޭ އެންމެންވެސް ދަތުރު ދާން އޮންނަ ރަށަކަށްވުމުން, އެރަށް ފެހިކޮށް ބޭއްވުމަށް ކުރަމުންދާ މަސައްކަތްތަކަށް އެއްބާރުލުން ދިނުމަށް ކަމަށެވެ. އަދި މިއީ މިހާރު ކުރިއަށް ގެންދާ 5 މިލިއަން ގަސް އިންދުމުގެ ގައުމީ ޕްރޮގުރާމުގައި ބައިވެރިވެ, އެ ޕްރޮގުރާމަށް ވެސް އެއްބާރުލުން ދިނުމުގެ ގޮތުން ކުރިއަށް ގެންދިޔަ ހަރަކާތެއް ކަމަށް ސޮނީ ހާޑްވެއާއިން ބުންޏެވެ.

ސޮނީ ހާޑްވެއާއިން ކުޑަގިރީގައި އިންދި ގަސްތަކަކީ އާންމުކޮށް ރާއްޖޭގެ މާހައުލުގައި އާންމުކޮށް ހައްދައި އުޅޭ, ހިޔާ ލިބޭ ގަސްތަކެކެވެ. އެ ކުންފުނިން އިންދި 55 ގަހުގެ ތެރޭގައި ކުރެދި ގަހާއި މިދިލި ގަހާއި ކާނި ފަދަ ގަސް ވެސް ހިމެނެ އެވެ.

ރާއްޖޭގައި އެންމެ ގިނަ ދުވަސްވީ އެއް ހާޑްވެއާ ސްޓޯރު ކަމަށް ސޮނީ ހާޑްވެއާ އަކީ މުޖުތަމައަށް ދެމެހެއްޓެނިވި ގޮތުގައި ފައިދާކުރާ އެފަދަ އެކި މަސައްކަތްތަކުގައި ބައިވެރިވާ ކުންފުންޏެކެވެ.