ގަދަ ވިއްސާރާގައި 48 ގަޑިއިރުތެރޭ ޕާކިސްތާނުން 320 މަރު

ޕާކިސްތާނުގައި މިދިޔަ މަހު ވިއްސާރައިގެ ސަބަބުން ފެން ބޮޑުވެފައިވާ މަގަކުން ކާރެއް ދުއްވާފައި އަންނަނީ: މި ދުވަސްވަރު ވެސް ވިއްސާރަވެ އެތައް ބަޔަކު ވަނީ މަރުވެފައި. -- ފޮޓޯ: އޭއެފްޕީ

16 އޯގަސްޓް 2025 - 11:21

1 comments

ޕާކިސްތާނަށް ކުރަމުންދާ ގަދަ ވިއްސާރާގައި ގައުމުގެ އެކި ސަރަހައްދުތަކުގައި ހިނގި ކުއްލިއަކަށް ފެންބޮޑުވުމުގެ އެކި ހާދިސާތަކުގައި މިދިޔަ 48 ގަޑިއިރު ތެރޭ މަރުވި މީހުންގެ އަދަދު 321 އަށް އަރައިފި އެވެ.

ޕްރޮވިންޝަލް ޑިޒާސްޓާ މެނޭޖްމަންޓް އޮތޯރިޓީން ބުނި ގޮތުގައި މަރުވި މީހުންގެ ތެރެއިން އެންމެ ގިނަ މީހުން މަރުވެފައިވަނީ ޚައިބަރު ޕަޚްތޫންޚުވާގެ ފަރުބަދަމަތީ ސަރަހައްދުން ކަމަށެވެ.

އޮފިޝަލުން ވިދާޅުވީ ގަދަ ވިއްސާރާގައި އެންމެ ގިނަ މީހުން މަރުވީ ފެންބޮޑުވުމުގެ ހާދިސާތަކުގައި ކަމަށެވެ.

ކުރިއަށް އޮތް ވަގުތުތަކުގައި ވެސް ޕާކިސްތާނުގެ ހުޅަނގު އުތުރުގެ ސަރަހައްދަށް ބޯކޮށް ވާރޭ ވެހޭނެ ކަމަށް ލަފާކޮށް މޫސުމާ ބެހޭ ގައުމީ އިދާރާއިން ވަނީ ރައްކާތެރިކަމުގެ ފިޔަވަޅުތައް އެޅުމަށް އިލްތިމާސްކޮށްފަ އެވެ.

ޕްރޮވިންޝަލް ރެސްކިއު އެޖެންސީން އޭއެފްޕީއަށް ބުނި ގޮތުގައި، މަރުވެފައިވާ މީހުން ހޯދުމަށާއި ގެއްލުން ލިބުނު ނުވަ ޑިސްޓްރިކްޓެއްގައި ރިލީފްގެ މަސައްކަތުގައި ގާތްގަނޑަކަށް ދެ ހާހެއްހާ ރެސްކިއު ވޯކަރުން ހަރަކާތްތެރިވަމުން އެބަ ގެންދެ އެވެ.

މޫސުން ރަނގަޅުވާނެ ކަމަށް އަދިވެސް ނުބެލެވޭތީ، ނުރައްކާ ބޮޑު ހިސާބުތަކުން ރައްކާތެރި ހިސާބުތަކަށް މީހުން ގެންދިއުމުގެ މަސައްކަތް ވެސް ކުރަމުން އަންނަ ކަމަށް ވެސް އޮފިޝަލުން ވިދާޅުވި އެވެ. -- އޭއެފްޕީ