އިންތިހާބު އެއްކޮށްލުމުން 70 މިިލިއަން ސަލާމަތް ކުރެވޭނެ: ފަލާހް

ރައްޔިތުންގެ ހިޔާލު ހޯދުމަށްޓަކައި ފެންނަ ނުފެންނަ ވޯޓް ނެގުމުގެ ބިލް (ރިފަރެންޑަމް ބިލް)ގެ އެއް ބޭނުމަކީ އިންތިހާބުތައް އެއްފަހަރާ ބޭއްވުން ކަމަށާއި އެއީ ދައުލަތަށް ހަރަދު ކުޑަވާނެ ކަމެއް ކަމަށް ޕީއެންސީގެ ޕާލިމެންޓްރީ ގްރޫޕްގެ ލީޑަރު އިބްރާހީމް ފަލާހު މިއަދު ވިދާޅުވެއްޖެ އެވެ.

ރިފަރެންޑަމް ބިލް ދިރާސާކޮށް، މިނިވަން މުއައްސަސާތަކުގެ ކޮމިޓީން ފޮނުވި ރިޕޯޓަށް މަޖިލީހުގެ މިއަދުގެ ޖަލްސާގައި ކުރި ބަހުސްގައި ފަލާހު ވިދާޅުވީ އެ ބިލު އޮތްގޮތުން، ރިޔާސީ އިންތިހާބާއި މަޖިލީހުގެ އިންތިހާބުގެ މަރުހަލާ މިހާރަށް ވުރެ ކުރުވާނެ ކަމަށެވެ. އޭނާ ވިދާޅުވީ އެއީ ހަރަދުކުޑަވާނެ ކަމެއް ކަމަށެވެ.

"ކުރު ކުރުމުގެ ސަބަބުން، ދައުލަތުގެ ބަޖެޓުން 70 މިލިއަން ރުފިޔާ ސަލާމަތް ކުރެވޭނެ. އެެހެންވީމާ ދިވެހި ރައްޔިތުންނަށް މިއަދު ސާފުވާނެ އެމްޑީޕީއަކީ ހަރަދު ކުޑަކުރުމުގެ ސިޔާސަތު ޒައްޒެއްގެ މިންވަަރަށް ވެސް [ބޭނުންވާ] ބައެއް ނޫންކަން،" ފަލާހު ވިދާޅުވި އެވެ.

ރިފަރެންޑަމް ބިލު ފާސްކުރަން އެމްޑީޕީގެ މެމްބަރުން ވޯޓު ނުދޭނެ ކަމަށް އެމްޑީޕީގެ ބައެއް މެންބަރުން މިއަދު ވިދާޅުވުމުން، ފަލާހް ވިދާޅުވީ އެއީ އިންތިހާބުތަކަށް ދައުލަތުން ކުރާ ހަރަދު ކުޑަކުރުމާ ދެކޮޅަށް ކުރާ ކަމެއް ކަމަށެވެ.

އެހެން ނަމަވެސް ބިލަށް ވޯޓު ނުދޭނެ ސަބަބެއް ކަމަށް އެމްޑީޕީގެ ޕާލަމެންޓްރީ ގްރޫޕްގެ ލީޑަރު، ހިތަދޫ ދެކުނު ދާއިރާގެ މެންބަރު އިބްރާހީމް ނާޒިލް ވިދާޅުވީ އެ ބިލަށް ވޯޓު ނުދޭނެ ސަަބަބަކީ މިނިވަން މުއައްސަސާތަކުގެ ކޮމިޓީން ބިލު ދިރާސާކުރި އިރު، ޕީއެންސީއަށް ނިސްބަތްނުވާ ގަލޮޅު ދެކުނު ދާއިރާގެ މެމްބަރު މީކާއިލް އަހުމަދު ނަސީމް ފާޅުކުރެއްވި ކަންބޮޑުވުން ތަަކަށް ރިއާޔަތްކޮށްފައި ނުވާތީ ކަމަށެވެ.

މިއަދުގެ ޖަލްސާގައި މީކާއިލް ވިދާޅުވީ ރިފަރެންޑަމް ބިލު މިހާރު އޮތީ ހިޔާލު ހޯދުމުގެ ވޯޓުތަކުން ވަކި ނަތީޖާއެއް ނެރެން މަގުފަހިވާ ގޮތަށް ކަމަށެވެ.

Badhalu thakaaeku, referendum bill committee in faas koffi

The most trusted news source in the Maldives

Mihaaru

އެކި ކަންކަމުގައި ރައްޔިތުންގެ ހިޔާލު ހޯދުމަށް ބިލެއް މަޖިލީހަށް ހުށަހެޅީ ރައީސް މަގާމުގެ ހުވާކުރައްވާ ދުވަސް ނޮވެމްބަރު 17 ގެ ބަދަލުގައި ނޮވެމްބަރު 11 އަށް ބަދަލު ކުރުމާއި ރިޔާސީ އިންތިހާބާއި މަޖިލިހުގެ އިންތިހާބު އެއްކޮށް ބޭއްވުމުގެ އިތުރުން ރިޔާސީ އިންތިހާބުގެ ދެވަނަ ބުރު އުވާލުމާ މެދު ރައްޔިތުންގެ ފެންނަ ނުފެންނަ ވޯޓަކަށް ދިއުމަށެވެ. ނަމަވެސް އެ ނޫން ވެސް ގައުމީ މުހިންމު ކަންކަމުގައި ވެސް ފެންނަ ނުފެންނަ ވޯޓަށް ދިއުމުގެ ފުރުސަތު އެ ބިލުގެ ދަށުން އޮވެ އެވެ.

އެ ބިލުގައިވާ ގޮތުން، ރައްޔިތުންގެ ފެންނަ ނުފެންނަ ވޯޓަށް އަހަން ޖެހެނީ ގާނޫނުއަސާސީގައިވާ އަސާސީ ހައްގުތަކަށް އިސްލާހު ގެނައުމާއި މަޖިލީހުގެ ދައުރާއި ރިޔާސީ ދައުރާއި ރައީސް އިންތިހާބު ކުރާ ގޮތާއި ރާއްޖޭގެ ސަރަަހައްދާ ގުޅޭ ކަންކަމުގަ އެވެ. އަދި ގާނޫނުއަސާސީއަށް އިސްލާހެއް ގެނައުމަށް މަޖިލީހުން ފާސްކުރާ ބިލެއް ތަސްދީގުނުކޮށް އަނބުރާ މަޖިލީހަށް ފޮނުވާ ހާލަތްތަކުގައި ވެސް އެ ބިލުގެ ދަށުން ވޯޓު ނަގަން ޖެހެ އެވެ.

ގައުމީ މައްސަލަތަކުގައި އާންމުންގެ ހިޔާލު ހޯދަން ފެންނަ ކަމަށް ރައީސަށް ފެނިވަޑައިގަންނަވާ ނަމަ، އެ ގާނޫނުގެ ދަށުން ހިޔާލު ހޯދަން ވޯޓަށް އެހިދާނެ ކަމަށް ބަޔާންކުރާއިރު އެފަދަ ހާލަތްތަކާއި އާންމުންގެ ވޯޓަށް އަހަން އެމަނިކުފާނަށް ލާޒިމުވާ ހާލަތްތަކުގައި އެކަން ކަނޑައަޅަން ޖެހެނީ ރައީސް ސޮއި ކުރައްވާ ނެރުއްވާ ގަރާރަކުންނެެވެ. އަދި ވޯޓަށް އަހަން ޖެހޭ ހާލަތެއް އޮތް ކަމަށް މަޖިލީހަށް ފެންނަ ހާލަތުގައި ވެސް ގަރާރެއް ފާސްކުރަން ޖެހެ އެވެ.