ލިއަމްއާ އެކު ގެނެސްދޭ "ދަ ވިޗާ"ގެ އާ ސީޒަންގެ ޓްރެއިލާ ނެރެފި

ނެޓްފްލިކްސްގެ ފެންޓަސީ ޑްރާމާ ސީރީޒް "ދަ ވިޗާ"ގެ ހަތަރު ވަނަ ސީޒަންގެ ޓްރެއިލާ އާންމުކޮށްފި އެވެ.

"ދަ ވިޗާ"ގެ އާ ސީޒަންގައި ގެރެލްޓްގެ ރޯލުން ފެންނާނީ އޮސްޓްރޭލިއާގެ އެކްޓަރު ލިއަމް ހެމްސްވޯތު އެވެ. ދެ މިނެޓަށް ވުރެ ދިގު ޓްރެއިލާގައި އޭނާގެ ގިނަ މަންޒަރުތަކެއް ހިމަނާފައިވެ އެވެ.

ޔެނެފާގެ ރޯލުން އަންޔާ ޗަލޯޓްރާ އާއި ސިރީގެ ރޯލުން ފްރެޔާ އެލަން އާ ސީޒަންގައި ވެސް ފެންނާނެ އެވެ. އަދި ޖެސްކިއާގެ ރޯލުން ޖޯއި ބޭޓީ ފެންނާނެ އެވެ. އެ ރޯލުތައް ކުޅޭ އެކްޓަރުން ބަދަލުކޮށްފައި ނުވެ އެވެ.

ގެޒެލްޓްގެ ރޯލު ކުރިން ކުޅުނީ އިނގިރޭސި އެކްޓަރު ހެންރީ ކެވިލް އެވެ. ހެންރީ އެ ސީރީޒް ދޫކޮށްލީ އޭގެ އުފެއްދުންތެރިންނާ މެދުގައި ހިނގި ފަންނީ ދެބަސްވުންތަކެއްގަ އެވެ. އަދި އޭނާ މަސައްކަތްކުރާ އެހެން ޕްރޮޖެކްޓުތަކަށް ވަގުތު ދިނުމަށެވެ.

ލިއަމް ކުރިން ބުނެފައިވާ ގޮތުގައި، ވިޗާގެ ފޭނެއްގެ ހައިސިއްޔަތުން ގެރަލްޓްގެ ރޯލު ކުޅެން ލިބުމުން އޭނާ ހުރީ ވަރަށް އުފަލުންނެވެ.

"ހެންރީ ކެވިލް ގެރަލްޓްގެ ރޯލު ވަރަށް ފުރިހަމައަށް ވަނީ ކުޅެދީފައި. ވައިޓް ވޮލްފުގެ ކަނޑި އުފުއްލާލަން އަހަންނަށް ހަވާލުކުރުމަކީ ލިބޭ ބޮޑު ޝަރަފެއް،" ލިއަމް ބުންޏެވެ.

"ދަ ވިޗާ"ގެ ފުރަތަމަ ތިން ސީޒަނަށް ވަރަށް ބޮޑު ތަރުހީބެއް ލިބުނެވެ.

"ދަ ވިޗާ"ގެ ހަތަރު ވަނަ ސީޒަން ސްޓްރީމްކުރަން ފަށަނީ މި މަހު 30 ގަ އެވެ.